Koɗo men hannde

Caggal nde mbattu maɓɓe gasi Najeriya, hooreeɓe CEDEAO jonnii ciwliiɓe laamu Niijeer happu ngu yontere fii jonnitugol laamu ngun e kadi ɓe fawii yagginere e hoore konunkooɓe ciwliiɓe laamu. E bi'ol maɓɓe ko maa tugaale laamu leydi ndin arta ka ɗe wonnoo ɗon. E nder pehe ɗe ɓe waawata ƴettude, hay huutorgol doole no waawi taweede e majje.  Hooreejo Caad Mahamat Idriis Debi Itnoo hewtii Ñaamey fii yewtugol hakkunde maɓɓe. Mbele ɗee lette no waawi artirde konunkooɓe Niijeer caggal ? Ko Dokteer Abdu BA hertorɗo dawro e nder CEDEAO woni koɗo men hannde. Himo jaaboo lamnde Ibrahiima Timbi BAH.

Keɗoɗen ɗoo jooni ñoggannde jewte waɗaaɗe ka taskaram On Tottaama Konngol e nder ndee yontere. Ko Faatumata SI SAAWAANE waɗani en.

Jonnde Afrik Ruusiya fu fuɗɗike hannde "Saint-Pétersbourg". Hooreeɓe leyɗe Afrik ɗuuɗuɓe no tawaa e mayre. Ɗum ko wano Makki Sall hooreejo Senegal, Asimi Goyta, hooreejo laamu faddewu Mali. Ko alhaali faggudu e deenaagu ɓuretee yewteede e nder ndee jonnde nde balɗe 2. Gila, Ruusiya e Ukreeniya, leyɗe hirnaange no fawi Mosku jukkanɗe. Afrik leyɗe ɗuuɗuɗe no jogii caɗeele deenaagu e faggudu. Ko holɗum ndee jonnde jibinta ? Ko Umaar Bari, hertorɗo dawro woni koɗo men hannde. Himo jaaboo lamnde Ibrahiima Timmbi Bah.

Leelugol toɓo e nder goɗɗe e leyɗe Afrik, guleeki (nguleendi) e giiteeli e nder leyɗe hirnaange, ɗii bonanndaaji no taskaa e ndee hitaande hikka. Alaa ko saabii ɗi, si wonaa mbayliigu weeyo. Oo alhaali accan batte mawɗe e nder nduu adunaaru. Ko ɗum, holli Dr Mammadu Lamiin BAH hertorɗo metewo. E bi’ol makko ko kuuɗe jamaa on saabi ɗii bonanndaaji. Ngam dartingol ɗii, neɗɗo kala hino haani immanaade kiwal taariindi, tuta leɗɗe, hiwa canɗi e maaje ɗee. Ko kanko woni koɗo men hannde. Himo jaaboo lamnde Ibrahiima Timmbi Bah.

Suudu Najeriya toppitiindu Metewo jeertinii wonnde diiwe ɗuuɗuɗe  heɓan caɗeele ilam (waameeji) e ndee hitaande hikka. Ɗum ko ado toɓo ngoo fuɗɗaade e hoore doole. E bi'ol ajensi on, diiwe 14 heɓan ɗii torraaji ndiyam.  Gila ɗuuɓi Najeriya no hawrude e caɗeele ilam. Gila hitaande 2012, ko 2022 woni hitaande ɓurnde tampinde leydi ndii. Koɗo men hannde ko Dokteer Barkinɗo Abdussalaam jannginoowo ka duɗal mawngal Mayduguuri wonngal rewo Najeriya. O yewtidii e Nasser Yuusuf Usmaan, nultondiraaɗo RFI Fulfulde.

Caggal nduu  yirbugol (yanugol) ndee huɓeere ka  komin  Matoto, Konaakiri, laamorde Gine,  ñannde 10 nduu lewru jeeɗiɗaɓuru, musiiba wonnooɗo sabu yimɓe 5wo maayde, Kalifatu Kannte, enjeniyeerjo hooreejo  eɓɓoore  ameriknaare noddirteende   "Design Planer Llc", no holla miijo makko ko faati e oo alhaali. Ko woni sabu yanugol cuuɗi, ko haanaa waɗeede ngam yo ɗum accu, hakkude hooreeɓe leydi, darnooɓe cuuɗi e ejeniyeerɓe ko hombo e ɓee ɓuri jogaade ella?

Shogel Mayga hooreejo jaagorɓe Mali  alat ƴaɓɓiinde ndee. Ɗum ko ñannde 16 lewru 7ɓuru Mopti tawi omo tawtoraa kawral pinal. O wii ko yo laamu ngu waɗu feere golle mum ɓura haala mum, sabu haala ɓola duumotaako, ko ɓamtaare duumotoo. Yimɓe ɗuuɗuɓe njiirii konnguɗi makko ɗii ko ñiŋoore  faade e laamu faddewu nguu o jeyaa e mum. Holno kaa haala haani yiireede ? Mansuur Li, ko moritaninaajo heertorɗo dawro, o hollii wonde kaa ɗoo haala ina soomi miijooji dawrugol.Keɗoɗen yewtere hakkunde makko e Umaar Mammadu SOW.

O yeewtidii e Umaar Mammadu SOW ko yowitii e  alhaali rafi kisal e ndenaagu e nder falnde Sahel, argol Wagneer merseneerɓe ruusnaaɓe e nder Afrik. Ɓe yewtii kadi ko yaltugol Minusma e nder Mali waawi battinde nder leydi ndii. Jeneraljo on hollii kadi wonde, ngayngu Faransi taskaangu e nder yoga e leyɗe Afrik, no waawi tawa sabu mum ko ŋakkere kaaldal e humpoto ngo ɓiɓɓe ɗen leyɗe jogaaki. Keɗoɗen yeewtere maɓɓe nde ɓe waɗi ka ñiiɓirde RFI Dakar.

Tuunus e Dental leyɗe Orop ciifii aadodal alat ƴaɓɓiinde ndee. Faandaare maggal ko haɓugol ɗanle ɗe ɗoftaaki sariya yaadu. Tuunus no jeyaa e leyɗe ɗo ɗannotooɓe taccirta faade Erop. Dental Erop fodii tottude laamu Tuunus miliyoonji 105 ngam wallitaade leydi ndii haɓugol ɗee oo mussiiba. Pr Abubakri Abba KAAN, ko horeejo fedde wi'eteende "Fedde Kawral Fulɓe Afrik" jooɗiinde Espaañ, walloore tumurankooɓe, e yi'annde makko, ngal ciifondiral safrataa ɗee caɗeele kaanuɗe ñawndeede gila to ɗe puɗi ɗon. Afrik ley Sahara. O yeewtidii e Umaar Mammadu SOW.

Caggal nde Dental Afrik toppitiingal fuku-koyngal waɗi urɓa muuɗun alkamisa faltiinde ko yowitii e tawtoregol kippuuji Afrik e ngoo foolotiro deesewal winndere fuku-koyngal 2026; Sega JALLO, cukku hooreejo "Feguifoot" njuɓɓudi Gine toppitiindi Fuku-koyngal, no holla miijo makko ko faati e ɓeydagol kippuuki afriknaaji tawtorteeɗi e deesewal winndere. Gila 2026, ko kippuuji jeenay (9) fijanta duunde nden. Si tawii ko e nder Afrik foolotiro ngoo yuɓɓinaa ko ɗi sappo (10) tawtata.  Sega JALLO no yewta kadi fii nafa e fartaŋe ɗe Afrik dañata ngol ɓeydagol kippuuji. Heɗoɗen mo e faandu haala Mammadu Jonngaasi BAH.