குறிஞ்சி மலர்

நம்பிக்கைக்கும் துரோகத்திற்கும் இடையிலான நெடிய பாதையான வாழ்வில், வழியெங்கும் கிடைக்கும் பாடங்கள் படிப்பினைகள்.. இதுவே ஆண் -பெண் உறவின் நுட்பங்களை அந்தந்த பண்பாட்டு மரபுகளின் வரன்முறைகளுக்கு உட்பட்ட வகையில் இலக்கிய வடிவில் நுகரும் போது, கு ப ரா போன்ற பன்புல ஆளுமையின் பெருமையை வியக்காமல் இருக்க முடியவில்லை. அடிமனித இயக்கங்களை 1935லியே மிகத்திறம்பட கையாண்டுள்ள கு ப ரா, மேற்கத்திய -கிழக்கத்திய தத்துவப் பொழிவிற்கு பொது ஜன ஊடகமான சிறுகதை வடிவை தைரியமாக பயன்படுத்தி அதில் வெற்றியும் பெற்றுள்ளார்.

தமிழ் சிறுகதைகளின் ஆசான் என்ற அளவிற்கு, அந்த வடிவம் குறித்து யாரும் அறியாத 1930களில் வானொலி உரைகளால் கு ப ரா விழிப்புணர்வு ஏற்படுத்தினராம். அவரின் கன்னி முயற்சியாக உள்ள 1934-ன் 'நூர் உன்னிஸா' உணர்வு அளவிலும் சரி, வடிவ அமைப்பிலும் சரி, ஒரு முன்னோடி படைப்பாய் ஒளிர்கிறது...

1930களிலேயே பாரதியின் புலமை குறித்து அக்கால அறிஞர்கள் பத்திரிகைகள் வழியே நடத்திய இலக்கிய போர், பாரதி சங்கம் நிறுவி பாரதி படத்தை enlarge செய்து விழா எடுக்கப்பட்டது, ,முழு நேரமும் எழுத்து என்பதில் சமரசம் செய்யாத தமிழார்வம், திருவல்லிக்கேணி கடற்கரை அலையையும் விஞ்சிய வ ரா தலைமையிலான தமிழறிஞர் வாதங்கள் என பாரதி மறைந்த பிறகும் ஓயாத தாய் மொழியின் மறுமலர்ச்சி நடவடிக்கைகளை, கு ப ராவின் வாழ்க்கை குறிப்பினூடே எழுத்தாளர் சிட்டி இந்த முன்னுரையில் பகிர்ந்து கொண்டாலும், மொழிப்பற்றும், எழுத்துவன்மையும், உயர்ந்தகுணமும் பெற்ற கு ப ரா சொற்ப காலத்தில் காலமானது ஏற்றுக் கொள்ளமுடியாத உண்மையாகவே கால வெளியில் பதிந்துள்ளது.

தமிழ் சிறுகதை வடிவத்தை பிரபலப்படுத்திய முன்னோடி எழுத்தாளர் கு ப ரா. 42 ஆண்டுகளே வாழ்ந்தாலும் தமிழ் இலக்கிய சான்றோர் பாடி பரவும் எழுத்துவன்மைக்கு சொந்தக்காரர். கு ப ரா ஊக்கப்படுத்திய எழுத்தாளர்களில் முக்கியமானவரான சிட்டி, ஒரு பதிப்பில் வழங்கிய முன்னுரை, கு ப ராவின் வாழ்க்கை குறிப்பாகவே நம் அகத்தில் விரிகிறது.

பண்பாடும், மனப்பக்குவமும் இல்லாதவனுக்கு வரும் பதவிகளும் புகழ், பொருளாதார வளர்ச்சிகளும் அவனைத் தாறுமாறாகச் சீரழிக்கும். குரங்கு கைப் பூமாலையில் உள்ள பூக்கள் போல இங்கிதம், மென்மை, சகிப்புத்தன்மை என்ற அம்சங்கள் எல்லாம் அவனிடம் உருக்குலையும். - நா.பார்த்தசாரதி

மாற்றுக்கருத்தை கண்ணியமாக முன்வைப்பது, ஆதரித்து பிரச்சாரம் செய்வது ஏற்புடையது, அத்துமீறல் சரியல்ல என்பதாக ஒரு விவாதம் இப்பகுதியில். திருமலை பலரையும் கவரக்கூடிய பேச்சாற்றல் படைத்தவனாக ஏற்றம் பெறுகிறான். புகழ்மரத்தின் உச்சியில் கிறங்குகிறான். பேர் எடுக்கும் ஆர்வம் கரைபுரள்கிறது....

உள்பட்டணத்துக்காரர்களின் வன்முறையால் நிலைகுலைந்து, பின்னர் உடல்நலம் தேறி, அதே ஊரில் அவமானப்படுத்தியவர்கள் முன் எழுச்சியோடு வாழ்ந்து காட்ட முனைகிறான் திருமலைராஜன். சுயமரியாதை இயக்க பொன்னுசாமி அண்ணனின் அரவணைப்பில் வெட்டரிவாள் மீசையோடு காண்பவர் அஞ்சும் தோற்றத்தோடு உயர்கிறான். சண்பகத்தின் தர்ம சங்கடத்தையும் தீர்க்கிறான். பூரணசுதந்திர கோரிக்கை எழுந்த வேளையில், தென்னாட்டை திராவிடநாடாக ஆங்கிலேயருக்கு கீழ் தொடர நீதிக்கட்சி தீர்மானம் நிறைவேற்றிய நிகழ்வு இப்பகுதியின் ஊடாக குறிப்பிடப்பட்டுள்ளது. நன்றி -தமிழ்ப்புத்தகாலயம்.

1970களில் வெளியான ஆன்மாவின் ராகங்களில் சுதந்திர இந்தியாவின் முதல் இருபது வருடங்களில் வாழ்ந்த காந்தியவாதியின் சமூக பங்களிப்பை சிறப்பாக பதிவுசெய்த ஆசிரியர், அதற்கு பிந்தைய கால அரசியலை 1985ல் வெளியான மூலக்கனலில் பதிவு செய்திருக்கிறார் என நம்பும்படியான ஒரு முன்னுரையை இந்நாவலுக்கு எழுதியுள்ளார்..உண்மையில் , 1940களில் சுயமரியாதைக்காரனாக வாழ்வைத் துவங்கி படிப்படியாக , அரசியல் பாதையில் பயணப்படும் ஒருவனின் எழுச்சியையும் வீழ்ச்சியையுமே மூலக்கனலில் படைத்துள்ளார். பகுதி -2 ... இதோ..🙏🙏🙏

உப்பு சத்தியாகிரகம் துவங்கி 1970 வரையிலான காலக்கட்டத்தையும், காந்தியத்தால் ஈர்க்கப்பட்ட இரண்டு சகாப்தங்களையும் தமது ஆன்மாவின் ராகங்கள் நாவல் மூலம் நா பார்த்தசாரதி படைத்திருந்ததை பதினைந்து பகுதிகளாக நாம் கேட்டோம்..விட்ட இடத்தில் துவங்கலாம் என எண்ணி ஒரு நாவலைப் படைப்போம் என்று ஆசிரியர் முயன்றிருப்பார் என்பதை உறுதிப்படுத்தும் வகையில் 1970களுக்கு பிந்தைய தமிழக அரசியல்களத்தை பிரதிபலித்து கற்பனையாக படைத்திருப்பதாக மூலக்கனல் என்ற இந்த நாவலின் முன்னுரையில் குறிப்பிட்டுள்ளார் நா பார்த்தசாரதி. துடிதுடிப்போடு வாழ்வைத் துவங்கி, எழுச்சி- வீழ்ச்சியும் பெறும் கதைத்தலைவனைப்போலவே, கட்சிகள் பரபரப்போடு அரியணை ஏறுவதையும் அங்கே அரங்கேறுகின்ற அத்தனையையும் புனைவாக எடுத்துக்காட்டியுள்ளார் நா.பா. 1985ல் வெளியான நாவல். நன்றி: தமிழ் புத்தகாலயம் 🙏🙏🙏💐💐

இருபத்தைந்து - ஐம்பது காசுக்கு தபால் அட்டை விற்ற காலத்தை சேர்ந்தது நம் பால்யம். அதே அட்டை முக்காலணாவுக்கு விற்ற காலத்து கதை. ஊர்க்காரர்களுக்கு தபால் எழுதி உதவி செய்யும் போஸ்ட் மாஸ்டர். முக்கியஸ்தர்களுக்காக கடிதம் எழுத ஆங்கில மொழி பழக்கம் உடைய ஒரே படிப்பாளி. ஊரார் கடிதங்களை படிப்பதையும் பிழைப்பாகக் கொண்டுள்ள ஒருவர். சிறப்பான படங்கள் போட்ட காலண்டர்கள் வீடுதேடி வருவதால் அந்தஸ்தில் உயர்ந்து நிற்கும் மற்றொருவர்..என வெறிச்சோடி கிடக்கும் 1930 களின் கிராமத்தையும் தமது பாத்திரப்படைப்பால் பரபரப்படைய வைக்கிறார் ஆசிரியர். பாத்திரப்படைப்புகள் என நாம் கடந்து போக மறுக்கும் வகையில் உண்மைச் சமூக பிரதிபலிப்பாக நம்மை உணர வைக்கிறார். பாரதி குறிப்பிட்ட நடிப்புச்சுதேசிகளின் வேறு ? ? முகங்களை ஓரிடத்தில் உரைக்கிறார். தமிழ்நாடு , தமிழ்நாட்டார் போன்ற பிரயோகங்களை சரளமாக அப்போதே கையாண்டுள்ளது குறிப்பிடத்தக்கது.