歡迎你返到嚟哲學即食麵（10），今餐，我哋要睇下一同零之間嘅對抗——講道生一嘅老子，遇上發明咗零呢個概念嘅印度文化。我哋會從一個睇落只不過係玩笑嘅「老子化胡說」入手，去睇下道家（玄學）同佛學喺魏晉時期嘅鬥爭——因為「老子化胡說」好明顯係認真講。

喺講「老子化胡說」之前，我哋先要講講「老子西出」嘅故事。 

道家人物，喺《史記》入面嘅形象都非常鮮明，以老子為例，其學以「自隱無名為務」，即係不求聞達，以摺為目的。為咗達到呢個目的，佢就唔想寫書，「居周久之，見周之衰，乃遂去。」見到周王室衰敗，諗住自己一個離開，點知去到關口，關令（即係管理關口嘅人）尹喜，就叫停老子，講到：「子將隱矣，彊為我著書。」（你依家就快隱居，不如寫低本書先走。）大概係老子唔寫嘅話，就無得出關，於是老子勉為其難，寫低五千言，亦即係後嚟所稱嘅《道德經》，就拂袖而去，「不知其所終」。

但係，自東漢起，民間就有聲音話老子唔係唔知去咗邊。原來老子當年出關之後，去咗天竺，教化當地人，呢種講法，就叫做「老子化胡」說。雖然聽落無稽，但空穴來風，未必無因。民間流傳嘅說話，並唔係中土人民生安白造出嚟，當時佛教徒亦有意為之……

注：裴應讀作pui4，我錯讀成kau4，十分抱歉。