Les Fartures

Comenzamos el programa falando con Juan Luis García, sumiller Murcia. Protagonizó ún de los bilordios del mundu gastronómicu asturianu cuando anunció qu'abandonaba Casa Marcial, d'aquella con 2 estrelles michelín y a piques d'algamar la tercera, pa empezar a trabayar mano a mano con Javi Farpón nel nuevu Asador de Abel - Casa Farpón. Falaremos con él d'esti cambéu, de la necesidá de la conciliación nel mundu la hostelería, y tamién, de sidra, que ye un mundu del que sabe abondo.

Acabamos el programa con Marcos Cienfuegos y los sos Sabores y Saberes. Ya pasaos unos meses de la cabera edición de Bocamina, fadremos balance, cuntaremos dalgún secretu de cocina, falaremos de too'l trabayu que lleva detrás y cómo facer pa valoralo, y, tamién, intentaremos saca-y dalguna información sobre la nueva edición de Bocamina.

Comenzamos el programa falando con Constance y Damien, del restaurante Native. Una pareya francesa que quedó namorada de Llastres, vendió'l so restauran en Perpiñán y decidieron mudase a Asturies p'abrir ún. Native ye una espaciu llibre, enllenu d'arte, ensin llendes y onde Damien esplora la so creatividá con productos de la redolada y munchos vinos naturales. Una bocanada d'aire frescu.

Acabamos el programa falando con Iván de la Plata, creador de Fenicia, empresa que cumple anguaño 25 años dedicada al mundu la gastronomía. Entama abondos eventos dientro y fora d'Asturies, ente ellos "Gijón de Sidra" o que ta furrulando agora mesmo, l'OktoberFest, únicu oficial na península dempués del de Madrid y Barcelona.

Comenzamos el programa falando con Isabel Rubio, de Finca El Ribeiro. Una economista que tornó a Asturies a facese cargu de la plantación de fabes de la so familia en San Cosme, y supo llevala a un mou de vida. Amás, planten arándanos y, agora tamién, aguacates.

Acabamos el programa falando con Jordi Merca, que vien a presentar a Uviéu’l so espectáculu "Yo Sobreviví a la EGB", nel teatru Filarmónica, a les 20h. Vamos falar con él de qué va, de lo bien que lo vais pasar, y tamién, de si Jordi sobrevivió a la EXB o non.

Comenzamos el programa falando con Tino Cortina, de Sidra Cortina.

Desde 1952 p'acabar siendo uno de los principales llagares d'Asturies. Sidra natural, sidra ecolóxico, sidra de xelu, sidraturismu o sicerturismu, espiches ... Una maquinaria nel Llagar La Ferrería de la Villa de la que vamos conocer un poquiñín más de la mano del so propietariu y enólogu.

Acabamos el programa con Juan Carlos Martínez, Direutor de Comunicación de Crivencar. Entamen pa esti 8 de Setiembre una edición especial de los sos 4 llagares de davezu, Trabanco, Muñiz, La Llarada y Fonciello, con una etiqueta conmemorativa del día d'Asturies, onde, cola so venta piensen plantar 1000 pumares nuna zona rural d'Asturies por determinar. Y ya de pasu, falaremos de Tierra Astur y la so importancia na gastronomía asturiana.

Empezamos el programa falando con Nel y Sonia, de Navaja Concept. Un nuevu restaurante qu'acaba d'abrir en Candas, con un conceutu prestosu qu'axunta desayunos con bollería propia y café especialidá, comida y cena. Amás tien la opción de facer un menú degustación namás pa 6 persones sentaes en butaques en frente a la so cocina abierta. Un conceutu qu'axunta Asturies, México y Asia. Va sorprendevos.

Acabamos el programa con Xurde Morán, que va llevanos nel Camín Primitivu a Santiagu a Grandas de Salime. Tamos na última villa enantes de salir d'Asturies, qu'ofrez una montonera d'actividaes culturales y tamién, fartones. Y nesti programa vamos falar d'elles, con especial enfotu n'A Reigada, ún de los templos gastronómicos del país.

Empezamos el programa falando con Tania Plaza, la guardesa del refuxu del Meicín, nel Parque las Ubinas. Tania va cuntanos la so historia, per interesante, y cómo ta cumpliendo'l so sueñu de vivir na montaña. Facer que l'abellugu del Meicín sia un abellugu pa tolos que vamos elli. Pero tamién falaremos de too'l trabayu qu'hai detrás, de les dures xornaes de trabayu que tienen, y cómo non, de la so famosa fabada.

Acabamos el programa con Javi Solís y Verónica García-Peña. Na so Casa Gris vamos falar de Peter Pan, del llibru. La versión orixinal, que tien coses abondo estremaes de les pelis edulcoraes de Disney. Y polo que cunten, presta muncho más!

Entamamos el programa con Santiago y Polonia, de La Gallina Clueca. Un restaurante de Sama de Llangréu, onde cocinen dempués de percorrer unos cuantos llugares cocinando. Falaremos con ellos de la so trayeutoria, de la so pasión pela cocina, y tamién de lo que ye Contrastes, un A6Manes, qu'entames cola xente d'Exencia y de Tramunte.

Acabamos el programa coles Palabres Vieyes de Borja Alcázar, del Abrelatas. Güei Borja vien a falanos de la importancia la industria'l Chicolate n'Asturies, onde llegamos tener más de 300 fábriques, la mayor parte pa consumu propio.

Entamamos el programa con Mohammed, de La Mesa de Básima, un cocineru palestín que lleva un tiempu viviendo n'Asturies. Equí atopó la forma de concienciar cola so cocina, faciendo unos cursos de cocina palestina mientres fala del xenocidiu que sufre'l so país.

Falaremos con él sobre qué pasa en Palestina, y tamién, sobre cocina palestina.

Acabamos el programa con Marcos Cienfuegos y los sos Sabores y Saberes. Güei Marcos vien acompañáu de Darío, de la Revista La Mercantil con más de 60 años d'antigüedá, y na que collabora'l propiu Marcos.

Comenzamos el programa falando con Manu y Taly, de Guañu, agricultura ecolóxica. Lleven años plantando fabes na zona d'Argüelles, ganando inclusive un añu’l concursu a la meyor faba d'Asturies. Y dende l'andanciu entamaron a vender les sos propies conserves en tarru cola so propuia fabada. Falaremos con ellos de ¡tarros, fabes y autoclaves!

Acabamos el programa falando con Xuan F. Piloñeta, del coleutivu Belenos. Xuán va falanos de la cultura'l pan nel país, desde los castros hasta l'actualidá, de miyu, escanda, trigu y tamién maíz colos sos múltiples usos, tamién los gastronómicos.

Comenzamos el programa falando con Bea Ortíz Tjiang, asturiana d'ascendencia asiática. Lleva años cocinando nes sos redes sociales y collaborando en dellos medios acercando la cultura asiática, de qu'aínda desconocemos abondo.

Acabamos el programa falando con David, Alberto y Pelayo, qu'organicen el Sequillo Sonoro, un festival de música n’Oseya de Sayambre al rodiu d'el Sequillo, una pasta con mantega y aguardiente típica d'aquella fastera, que culturalmente ye Asturies.