Les Fartures

Comenzamos el programa falando con Moisés García, qu'acaba de ganar el premiu al Meyor Sumiller d'Asturies. Moisés trabaya en El Balcón de Bueño, La Esquina del Peso, n'Uviéu; y en Las Terrazas de Sardalla, en Ribeseya. 

Vamos falar con él de qué ye un sumiller, cómo ye que sabe tanto de tar na sala y de vinu. Tamién de vinos asturianos, y de sidra y cerveza. 

Acabamos el programa colos Entremeses Repunantes de Sara Ceballos, Sweetllaceria. Güei va repunar de les cápsules de café, de la xente que colleiciona vinu y -ATENTOS-, tenemos un mensaxe de la perra Celia pa la humanidá.

Güei tenemos un programa especial al rodiu la cerveza. Axuntamos a Pablo García, de Cervecería El Cabanón, que vien acompañáu de Mikel Rius, copropietariu de Cerveza La Pirata, coorganizador del Barcelona Beer Festival, del Festival InBrew y xuráu internacional de cerveza; y Alberto Benavides, direutor de la revista Bar&Beer, qu'acaba cumplir 25 años. 

Vamos falar con estos 3 espertos sobre¡l mundu cerveceru, l'industrial, l'artesanu, la llucha escontra'l poder económicu, lo difícil que ye sobrevivir nesti mundu cerveceru, y tamién, cómo la cerveza evolucionó y medró nestos 25 años. 

Un programa enteru dedicáu al mundu la cerveza.

Comenzamos el programa falando con Juan Luis García, xefe d'estudios de la Escuela d'Hostelería y Turismu de Xixón, que vien a falanos de la nueva titulación de formación profesional sobre la sidra. Falaremos con él de la importancia de la formación y la profesionalización al rodiu la sidra. Y tamién del so llabor como miembru del Conseyu Regulador de la Sidra DOP. 

Acabamos el programa falando con Xurde Morán, que va percorriendo'l Camín de Santiagu. Salimos ya de la Puela d'Ayande, y llegamos al fondu del valle del ríu Nisón. Al pueblu de La Reigada. Equí siguimos de viaxe parando como siempre en toles cases, accidentes xeográficos y tolos sitios que namás sube Xurde.  Siguiremos hasta llegar tomar el desvíu pal Camín de los Hospitales.

Comenzamos el programa falando con Beatriz López, qu'acaba de sacar un llibru con Delallama Editorial nomáu "Las Manos de Antes - Recetas del Occidente Asturiano". Un llibru onde axunta recetes del occidente asturianu, territoriu que caltién una identidá única na gastronomía asturiana. Un procesu que-y llevó años p'axuntar recetes de les propies informantes, que tienen una homenaxe al final del llibru. Beatriz amás fai les sos propies semeyes de les recetes. 

Empanaes, rapas, pote castañes, gurupu, pulientas griñispos ... 

Acabamos el programa con Verónica García-Peña y Javi Solís, que vienen cola so Casa Gris a falanos de Gastronomía y Lliteratura. Nesti casu van falanos del "Mago de Oz". Un clásicu na lliteratura, y tamién nel cine, que va llevanos a un mundu de fantasía y maxia.

Comenzamos el programa falando de pan con La Miga de Mariana. Vamos falar de la personalización del pan. Colos últimos estudios sobre intolerancies, podemos saber qué bacteries procesa peor el nuesu cuerpu, y acordies a ello, ellaboran panes afitaos a la nuesa salú. 

Ye un procesu d'investigación científica que ta faciendo la doctora Vanessa Kimbell, que tien una escuela onde ta faciendo estudios Mariana.

Acabamos el programa con Borja Alcázar y les sos Palabres Vieyes. Güei vien a falanos de Menús Antiguos de Boda. Un exerciciu de recopilación per interesante pa conocer los vezos n'Asturies. Too'l mundu se casaba, pero antiguamente namás podíen celebralo nun restorán les persones con más perres. Afondaremos nos menús, y tamién no que se comía nes coses más probes asturianes pa celebrar les bodes.

Comenzamos el programa falando con Pablo y Begoña, del restorán Gunea. Allugáu n'Illas, a les afueres d'Avilés, son uno de los restaurantes cimeros n'Asturies. Y amás, van marcando'l camín faciendo delles coses distintes p'adautar la so vida personal cola profesional. Agora "piesllen" como restorán tradicional, y van a abrir namás pa grupos (el sitiu ye preciosu) baxo reserva. Van facer amás, un menú especial al rodiu la sidra (Begoña ye vasca y Pablo asturianu) y pa la temporada alta, un menú degustación especial según productu de temporada.

Acabamos el programa con Natalia, d'Animales Viajeros, que va llevanos a pasar la nuechevieya n'autocarava a esquiar a Formigal. Desaniciaremos muncho cliché, y falaremos de cómo esfrutar del mundu la nieve.

Comenzamos el programa falando con Tere Camacho, del Bar Camacho, que vien a traenos unes recetines propies d'esti tiempu d'Antroxu. Falaremos del pote, de los frixuelos, y de munches más coses qu'ella cocina como pocos y poques nel so restaurante.

Acabamos el programa falando con Xuan F. Piloñeta, del coleutivu Belenos, falando de La Cultura del Gochu. Falaremos de la importancia de, quiciabes, l'animal más importante xunto cola vaca. Falaremos de la matanza, de tolos ritos, d'espresiones llingüístiques al rodiu'l gochu, de la raza'l país y de cómo tuvo a piques desapaecer, y d'una montonera de coses más que namás esti sabiu sabe.

Comenzamos el programa falando con Lluis Nel Estrada sobre la Gastrificación. La perda de la esencia y la tradición na gastronomía asturiana, por mor del turismu, pero tamién de la globalización y estandarización nes ciudaes asturianes, a lo que contribuyimos fondamente los propios asturianos. Tamién de la falta de relevu nes ales y nos pueblos.

Acabamos el programa falando con Marta Elola, del coleutivu Muyeres, qu'el próximu 9 de Marzu piesllen xira col so espectáculu "Humanes", onde s'axunten 33 muyeres cantando nel escenariu. Falaremos con ella de la trayeutoria del grupu y de la importancia de les Muyeres, como grupu, y como xéneru, na tradición musical asturiana.

Comenzamos el programa falando con Juanjo Cima y Noelia Solla, que vuelven a entamar esti añu’l Día del Pote (PoteDay) el Vienres 28 de Febreru. Un día de folixa al rodiu del pote, y nel que faen  la importante anuncia que van danos a probar un Xeláu de Pote, qu'ellaboraron xunto con Xeladería Islandia. 

Amás, va acompañáu d'unes xornaes del Pote Asturianu que tien nos sos dos restoranes: La Taberna Asturiana, de Xixón. Y Las Tablas del Campillín, n'Uviéu. 

Acabamos el programa falando con Ceci Iglesias, una de les cares más conocíes y queríes de la televisión asturiana. Ceci lleva años patiando Asturies y tien una semeya per clara de la nuesa sociedá y la nuesa gastronomía. Amás, ye embaxadora de la sidra. Y dende va años collabora con Asturex, la sociedá encargada d'esportar productos asturianos al esterior, pa dar a conocer los nuesos productos per dayuri.

Comenzamos el programa falando con Anai Menéndez, del restorán Caín, na Nava del Rey (Valladolid). Anai garró fama mientres l'andanciu faciendo chuletes en casa y falando del mundu la carne, ya empezó a organizar nel so pisu, en Madrid, lo qu'ella llamó como "txuleta days". 

Al pocu, decidió tornar al so pueblu, a la Nava, p'abrir un restorán con un filosofía apegada'l terruñu como pocos sitios. Un sitiu onde axunta tradición pero tamién peñeren les nueves tendencies, ya onde amás, fae corderos a la estaca del mesmu mou que facemos nes cuenques mineres asturianes. Xente mozo, xente prestoso lluchando pela so tierra. 

Acabamos el programa con Sara SweetLlaceria, que vuelve colos sos Entremeses Repunantes. Vuelve la nuesa influencer repunante favorita, güei va da-y a les freidores d'aire, del café pa llevar de los supermercaos y va acabar repunando, pero en positivu pa pidir tortos d'asturcilla. 

Nun te lo pierdas!