Les Fartures

Comenzamos el programa falando con Guille y Juli, del Market_24, ún de los nuevos restoranes qu'abrieron na plaza d'abastos d'Avilés. Ún de los sitios de moda d'Avilés. Falaremos de la filosofía que tienen detrás de comprar tolos productos que pueden nel propiu mercáu. Guille tien amás l'hamburguesería California Street Food, en Lluanco, Uviéu y Xixón. Y Casa Cefero, n'Antromero. Juli afuma carnes n'Okappi, y va dar un cursu dientro poco al qu'ainda tais a tiempu d'apuntavos. 

Acabamos el programa falando con Ramón Coalla. Ún de los cabezaleros de la gastronomía asturiana, coles sos 3 tiendes n'Asturies, la so tienda en Madrid y la nueva que tan a piques d'abrir tamién en Madrid. Falaremos de la so trayeutoria, y tamién de cómo ve esto de la gastronomía, los productos "gourmet" y, tamién, el mundu del vinu asturianu, nel que ta per involucráu gracies al so proyeutu "Escolinas" xunto a Monasterio de Corias.

Comenzamos el programa falando con Néstor de Los Cabornos. Acaben de celebrar el so tercer aniversariu a lo grande, como son ellos. 

Ficieron una cena especial con Diego de El Pintu, Cristian de Sidrería El Fogón; y Héctor y Jose de Confitería Conchi. Con un llenazu total, y onde, amás, inauguraron el nuevu salón especial pa eventos qu'acaben de construir apegáu al restorán. 

Con Marcos Cienfuegos vamos falar de Bocamina 6. Sexta edición d'ún de los eventos más prestosos d'Asturies. Cuntaremos amás cola presencia d'Israel Moreno, Estrella Michelín, nel restorán Ayalga, que foi’l fichaxe d'esti añu.

Comenzamos el programa falando con Mirta, del restorán El Torneiro, en Villayón. Acaba de ganar el campeonatu al meyor pote asturianu, pero ye que tamién son finalistes nel concursu a la meyor fabada. Y tamién críen gües propios de raza casina. 

Y acabamos con Xurde Morán, que vuelve a la radiu a seguir percorriendo'l Camín de Santiagu. Tamos saliendo de la Pueya d'Ayande, pero aínda queda dalguna recetina de La Nueva Allandesa que cuntar ...

Comenzamos el programa falando con Fran y Patri, del restorán El Texu, qu'acaben d'abrir en Llaíñes, conceyu de Sobrescobiu. Conocémoslos de cuando teníen Entre Copas, en Mieres, y agora entamen nueva aventura cambiando de cuenca. Cocina de siempre, con un toque más moderno pero'l guisu de tola vida. 

Vienen acompañaos tamién d'Elena, que tien los apartamentos rurales Benaki tamién en pueblu. Uno de los negocios de turismu rural que siguen n'activu más antiguos d'Asturies. 

Acabamos el programa cola nueva seición de Borja Alcázar, del Abrelatas, nomada "Palabres Vieyes", onde va falanos de vieyos vezos n'Asturies. Empezamos falando de La Matanza.

Comenzamos el programa con Diego Fraile y Mario Fernández, del restorán Diferente, en L'Entregu. Que como'l so nome diz, ye una propuesta diferente ellí. Cocina de mercáu, tamién con toques viaxeros, con alliños distintos, orixinal, pero ensin perder los fondos y los guisos. Un sitiu nel vais a esfrutar comiendo. 

Acabamos el programa falando con Natalia d'Animales Viajeros, que vuelve al programa a falanos del so últimu viaxe a Tailanda. Falaremos de sitios menos conocíos, y tamién de la so gastronomía.

Comenzamos el programa con Diego Aladro, del Hotel-Restorán Arniciu, nel Campu, en Casu. Entama esti fin de selmana, y el que vien, les Xornaes de la Matanza. Un menú onde ufre platos que namás faen nestes xornaes, y que son los típicos que ficieron na matanza en Casu. Con coses úniques como la morciella fresca. 

Acabamos el programa falando con Mariana, de La Miga de Mariana, que vien falanos de la Biodisponibilidá, un conceutu nuevu onde’l pan pasa de ser un complementu a un alimentu.

Comenzamos el programa falando de quesu con Aitor Luis Vega. Nesti programa vien acompañáu d'Aurelio, de Quesería Picurriellu, asitiada nel Valle Oscuru de Llanes. Especializaos en quesos de cabres, de los pocos que lo faen n'Asturies, amás de ganadería propia, anque tamién faen quesos con otres lleches.

Aitor amás va facéi un test, nun sabe si picadín o non, si sexual o non, a Aurelio.

Acabamos el programa falando con David Montes, el Carboneru na TPA, conocíu tamién como El Furtivu. Va tar en cocinando productos asturianos en FITUR y en Madrid Fusión, vamos falar d'esos eventos, d'esos productos y acabará'l programa con una recetina de caza.

Comenzamos el programa faciendo un pequeño homenaxe a Cesar Ruíz, El Cuchareru, que dexónos esti mes pasáu. Figura indispensable nel mundiu la sidra asturiana, tenía un microllagar en Nueva de Llanes, onde ellaboraba la so propia sidra y amás, daba de comer. Estudiosu y recuperador de vieyes variedaes de mazana, repunante y cabezaleru de la vieya cultura d'un país afitada a los nuevos tiempos. 

Acabamos el programa con Sara Ceballos, Sweetllaceria, que vien con una nueva seición en Les Fartures, nomada "Entremeses Repunantes", onde Sara va repunar de les zunes gastronómiques que menos nos presten. Nesti programa va falanos de la xente que va tomando café pela cai, del consumu les angules y de les hamburgueses de lux.

Comenzamos el programa falando con Yaiza Guerrero, qu'acaba de finar un master universariu col siguiente trabayu fin de master: "Del Quesu Picón a la Denominación de Orígen Protegida: El Quesu Cabrales desde la Antropología Histórica". 

Nieta de ganaderu y de quesera, de Cabrales, fadremos con Yaiza un percorríu pela historia del quesu Cabrales, y tamién falaremos de cómo ve'l so futuru. 

Acabamos el programa con La Casa Gris, la seición onde Javi Solís y Verónica García-Peña axunten lliteratura y gastronomía. Güei falaremos de la última novela de Verónica "Hasta Morir la Muerte", y falaremos de la gastronomía de ‘Otra vuelta de tuerca’, d’Henry James.

Comenzamos el programa falando con Pablo de Cervecería El Cabanón y Andrés de Cervecería El Lúpulo Feroz, que cumplen 22 y 18 años, respeutivamente. 

Falaremos con ellos que cómo llegaron a ser uno de los referentes cerveceros de la zona norte de la península, de cómo cambiaron les cerveces y los vezos cerveceros y tamién de los actos que van entamar pa los sos aniversarios. 

Acabamos el programa falando con Tomás Borge, de La Fueya de Tomás. Vien a falanos de les XV Xornaes del Chuletón que van entamar la propia Fueya de Tomás, Sidrería Cabranes, Sidrería El Cuetu, Sidrería El Pedreru y Sidrería Los Pomares, desde'l 16 al 31 de Xineru. Xunto con Sidra Frutos. Cuntaremos tamién con Javier Trabadelo, de Trasacar, que va falanos de los chuletones escoyíos pa estes xornaes y de cómo estremar la calidá de la carne.