Andri Caviezel, in autur giuven ch'è en ina crisa, vegn ospitalisà en la clinica psichiatrica Sonnenberg al Lai da Turitg. En ses siemis è el part da muments centrals da l'istorgia dal moviment feministic.

Quai è il punct da partenza d'ina nova seria auditiva da RTR, d'ina istorgia fictiva scritta da Manuela Steiner. Suenter che nus avain tractà l'onn passà en connex cun ils 50 onns dretg da vuschar da las dunnas l'istorgia da l'emancipaziun feminina, vai qua per in um che sto definir da nov sia rolla. En clinica inscuntra Andri la psicologa Margarita Felix. Ensemen cun ella sto el sa confruntar cun ses nufs: qua fiss la ferida en connex cun la publicaziun da ses emprim roman sco era la relaziun cun sia amia Mirabai. Quest viadi daventa ina sfida betg mo per el, mabain era per sia terapeuta. En la «Marella» preschentain nus ensemen cun l'autur l'emprima da tschintg episodas.

Ils lockdowns èn istorgia. Las cifras-clav da la pandemia èn svanidas da noss'attenziun permanenta. E tuttina è la pandemia anc qua – ella n'ha betg be laschà fastizs en noss corps, mabain er en noss cors e nossas olmas.

Sco suenter gronds sforzs ans sentin nus sin ils fiers. Quai percorscha la coiffeusa Kerstin Stocker, sch'ella raquinta che la glieud n'haja betg pli la forza da sa confruntar uss er anc cun las novitads da la guerra en l'Ucraina. U la terapeuta da respiraziun Pina Augustin che gida cun la forza da respirar da puspè chattar il fund sut ils pes. Er la psicoterapeuta Sereina Venzin sa, tge sfida ch'il mund contemporan è per la capacitad da s'adattar da l'esser uman. Cun partir lur experientschas cun la «Marella» n'han ellas dentant betg be discurrì da sfidas, ma er da pussaivladads e schanzas.

Trais naziunalitads posseda Paul Juon durant sia vita: la russa, la tudestga e la svizra. Forsa declera quai era il fatg che nagin da quests pajais n'ha propi celebrà el sco «ses cumponist» ed uschia n'ha sia musica ditg era betg survegnì la renconuschientscha meritada.

Ses tat Simon Juon emigrescha il 1826 da Masein en la Lettonia per daventar conditer. Ses bab Theodor Juon fa carriera sco um da fatschenta a Moscau. Mo il giuven Paul sesa gia d'uffant sut il clavazin da sia mamma per sa laschar purtar da las melodias. Ed igl è gia lura cler che la passiun per la musica vegn in di a daventar ses mastergn.

Suenter studis da musica en Russia ed in onn sco magister a Baku (ozendi en l'Aserbaidschan) sa renda il giuven a Berlin, nua ch'el viva e lavura durant bunamain quatter decennis. Ils ultims onns da sia vita passenta el en Svizra, nua ch'el mora il 1940.

Tschaiver ha puspè lieu – finalmain, perquai che quest temp ha mancà a bleras e blers. Star da cumpagnia, far musica da tschaiver ubain simplamain laschar trair da quest temp cun bleras festas ed uras allegras.

La «Marella» va permez il tschaiver a Glion, discuta cun blers musicists e musicantas da musicas da tschaiver e visita era las gruppas da salamuiras a Domat. Là, han las salamuiras ina gronda tradiziun, ellas piztgan e diverteschan. E nus laschain er udir, tge che ha fatschentà ils Kakalaris, las Buccas bletschas e l'Oergeli Duo.

Persunas senza tetg vegnan savens survesidas. E quai sistematicamain, sin via sco er en la discussiun publica. Ma datti atgnamain persunas senza tetg en il Grischun? Ed era da quellas ordaifer la scena da drogas?

«Mintgatant, cura che jau era tschentà sin in banc sper la staziun e betg olma fascheva stim da mai durant in entir di, ma sentiv'jau schon inferiur e sco transparent.» Quai di Bruno*, ch'ha vivì a Cuira sin via durant in mez onn e che nus avain inscuntrà a chaschun da questa Marella.

Che persunas sco Bruno* èn insaco invisiblas, bunamain inexistentas per la vesida publica, demussa il resultat d'ina enquista, che nus avain fatg dacurt cun var 50 persunas sin via a Cuira. «Na» ubain «nagin'idea» è stada la resposta generala sin la dumonda, schebain i dettia insumma persunas senza tetg en il Grischun.

Survesair persunas senza tetg ha sistem. E quai malgrà che mancanza da suttetg è ina da las pli grevas furmas da povradad. L'entschatta da favrer è cumparì in studi da la Scola auta per lavur sociala dal Nordvest da la Svizra (FHNW) en connex cun mancanza da suttetg: Probablamain 2'200 persunas èn pertutgadas en Svizra, a 8'000 persunas smanatscha la perdita da l'abitaziun. 

I dettia en il noss chantun paucas u naginas persunas senza tetg, che correspundan al clisché: Il murdieu u la vagabunda, che dorma en il liber sin il blut asfalt ubain sut ina punt, din las autoritads grischunas. Il dumber da persunas ch'abiteschan sut cundiziuns precaras u ch'han nagina atgna abitaziun crescha tenor experts ed expertas dentant fitg, e quai era tar nus.

Lavur datti, i vegn bajegià e renovà e la lavur na manca betg. Dentant, chattar mastergnantas e mastergnants qualifitgads è in problem. E quel daventa pli e pli acut.

En questa Marella avain nus discutà cun blers mainafatschentas ed impressaris ed els tuts conferman che lavur saja d'enturn detg avunda. Sch'els hajan dentant dad ir a la tschertga da persunal qualifitgà, saja quai fitg stentus u magari gnanc pussaivel. Sin inserats na dettia strusch annunzias e schebain che la lavur lubiss dad engrondir ina firma u l'autra, manca il persunal per pudair far quai.

Da quest problem è era la politica fitg conscienta. «In problem virulent che nus sentin a mintga inscunter cun represchentants da l`economia», di il cusseglier guvernativ Marcus Caduff. E Maurus Blumenthal, directur da l`Uniun grischuna d'artisanadi e mastergn dovra pleds clers: «La mancanza da persunal è IL grond problem economic dal Grischun en l'avegnir.»

La Marella metta a lieu, e discuta cun tuts involvids davart motivs e soluziuns pussaivlas.

«I dovra curaschi». Quai di Jon Welti da Falera ch'ha 13 onns. Curaschi dovra el cunzunt per sa tschentar. Jon Welti passenta mintga minuta pussaivla en la Freestyle Academy a Laax cun trenar trics e sigls cun ses skateboard. Sis giadas l'emna ha el trenament.

I saja in zic il lifestyle, il vegnir ensemen ed il plaschair vi d'ina chaussa che collia, di Elia D'Antuono che lavura tar Laax Events ed era pli baud trenader en la Freestyle Academy. I saja d'ina vart il sport e da l'autra vart er las persunas ch'ins entaupa adina puspè ch'èn la raschun per la fascinaziun.

Il coronavirus dominescha noss mintgadi dapi dus onns. Tranter lockdown, quarantina e certificats, tranter discussiuns per e cunter vaccinaziuns e la nizzaivladad da mascras, pari che quest virus haja sa fuà en tut las domenas da la vita. Las psichiatrias en plainas, las pistas da skis era.

Il mund para dad esser vegnì in zichel pli pitschen. «Ferien in der Schweiz» è puspè en vogue. Fin a 50% dapli giasts èn spassegiads quests ultims dus onns sin las sendas alpinas en Grischun. Tge din chavriel e rivaun cumin da quest svilup? En questa Marella guardain nus, tge effects che la pandemia ha sin la natira. Nus ans chattain tranter delfins a Venezia, 129 milliardas mascrinas bittadas davent mintga mais, tranter societads aviaticas salvadas da la politica e muntognas da chartun al Werkhof a Cuira. Ina tschertga da fastizs.

Il persunal da tgira è sut squitsch ed i dat adina pli paucs medis da chasa. Po la tecnologia ubain forsa schizunt intelligenza artifiziala gidar? E tge è insumma il stan actual?

Quella dumonda avain nus fatg a Filipe Barata, scienzià a la Scol'auta politecnica federala, che lavura cun intelligenza artifiziala. Per exempel fa el apps per telefonins che detecteschan la tuss tar persunas cun asma. L'app vesa lura cur che la tuss vegn mendra ed ins po intervegnir ad uras. Ma èn apps il futur? Apps che pon forsa schizunt far diagnosas? Ubain forsa roboters e maschinas?

E tge duvrassan noss medis da chasa propi per simplifitgar lur mintgadi pretensius? Nus avain dumandà trais medis da chasa, Peter Flury, il medi pensiunà da Tavau, Mario Venzin, il giuven medi da chasa a Vella, ed Iris Zürcher, dapi 21 onns media da chasa a Sent. Per tschertas innovaziuns tecnologicas e digitalas èn els fitg leds, tar autras restan els dentant sceptics.

In di cun il pumpier da professiun Arno Schuoler sin la plazza aviatica a Turitg.

La crudada da l'aviun da la Crossair a Bassersdorf avant 20 onns, è stà il pli grond cas che Arno Schuoler ha gì en sia vita sco pumpier da professiun.

RTR ha visità ensemen cun l'um da Mustér il lieu da la crudada, ed ha pudì esser da la partida durant in di da lavur dals pumpiers sin la plazza aviatica a Turitg. Nus essan ids cun glisch blaua tras citad ed avain discurri cun l'um da 47 onns davart sia fascinaziun per la professiun, co el va enturn cun il squitsch psichic e co quai è per sia famiglia.