Dikwels kyk ons na omstandighede en dink ons daar is geen kans dat hierdie situasie kan verander of herstel word nie. Maar God verwag van ons om die onmoontlike omdat Hy nie verander het nie en omdat Hy in ons is en deur ons die onmoontlike wil doen. Al wat nodig is, is dat ons sal hoor wat God oor daardie situasie sê en ons dan dieselfde daaroor sê.

In my begeerte om God se hart bly te maak doen ek wat Hy vra sodat iemand nie 'n vinger na my kan wys nie. Ek wil my lewe skoon hê sodat dit soos 'n deftige opskepbak aan gaste voorgesit kan word.

Een persoon kan nie die weedstryd wen nie, maar een persoon kan die wedstryd verloor. In die weermag is spanwerk noodsaaklik vir die sukses van die misie maar ook vir elkeen se veiligheid. As gelowiges behoort gemeenskap (fellowship) deel van die kerk se samestelling en karakter te wees want daarsonder kan daar nie groei en versorging van mekaar wees nie.

As jy wil weet wat iets se doel is moet jy die ontwerper vra. Netso moet ons God vra waarvoor Hy ons gemaak het. As jy Hom nie vra nie mag jy jou lewe leef soos iemand wat 'n skroewedraaier wil gebruik om 'n spyker mee in te kap.

As ons met 'n waaragtige vrees vir die Here leef dan sal sal ons nie meer met gemors en sonde en drek in ons lewe leef nie. Ons sal die tipe mense wees wat wys dat hulle anders is as die res van die samelewing omdat hulle met insig en verstandigheid en wysheid dinge anders doen.

Ons het alewig 'n stryd binne ons. Die stryd tussen die vlees en die gees , maar as kinders van God het ons die mag om oor die begeertes van die vlees te heers. Die duiwel sit agter hierdie verkeerde begeertes en ons moet hom teenstaan anders word ons vyande van God.

Ons is nie tevrede (en behoort ook nie tevrede te wees) met swak kwaliteit produkte of diens nie, maar ons kan ook nie tevrede wees met ’n swak kwaliteit geestelike lewe nie. Kom ons doen kwaliteitsbeheer en lewe gedissiplineerd. Laat toe dat die Heilige Gees jou hart deursoek en deurgrond en jou lei op die pad wat eer aan ons Vader in die hemel, die Seun aan sy regterkant en die Heilige Gees in ons harte bring.