Sénégal e Mauritanie siifii sarti faatiiɗo e ɗalle ɓiɓɓe leyɗe maɓɓe. Faandaare nden ko newinngol yiilagol(yaha-ara) senegalnaaɓe e moritaninaaɓe hakkunde ɗee leyɗe ɗiɗi. O siifaama caggal raɗegol ɗanniyankooɓe ɗuuɗuɓe Mauritanie e ɗii lebbi feƴƴuɗi. E ɓen raɗaaɓe hino tawanoo senegalnaaɓe. Pelle Sosiyete Siwil hino ɗaminii wonndema oo sarti dartinan torraaji faade e ɗanniyankooɓe.

Ko ɗum si Roughi Mamadou Diallo, tawaaɗo e "Association des Femmes Battantes de la Mauritanie", fedde rewɓe dartiiɓe Mauritanie no ƴami leyɗe heddiiɗe ɗee siifidugol sarti e Nouakchott ngam dartingol riiwugol yimɓe maɓɓe e ndii leydi. Ko kanko woni koɗo men hannde. Himo jaaboo lamnde Birahima Timbi Bah.