編劇︱陳姿樺 Ko͘-chiáu

潤稿︱蔡逸民 BuLuhSuh

演出︱陳姿樺 Ko͘-chiáu

︱陳曉怡 Niau-tāu

︱柯王炳勳 Bí-leng

︱林佳祥 Chiá-siông

影片／音效後製︱林佳祥 Chiá-siông

音樂後製／校對︱陳曉怡 Niau-tāu

字幕︱林于真 A-chin

內文摘錄：

虎姑婆入門了後，看客廳kan-na 2 ê gín-á niâ，to̍h問阿祥講：「Nah會減1 ê？」心內koh想講：「Soah-soah--去，橫直mā走bē去。」

阿勳khiā tī邊--á等bē赴，chhia̍k-chhia̍k-tiô，kho̍k-kho̍k問講：「姑婆，李á糖--leh？李á糖--leh？我beh食李á糖。」

Hó͘-ko͘-pô ji̍p-mn̂g liáu-āu, khòaⁿ kheh-thiaⁿ kan-na 2 ê gín-á niâ, to̍h mn̄g A-siông kóng: “Nah-ē kiám 1 ê?” Sim-lāi koh siūⁿ-kóng: “Soah-soah--khì, hoâiⁿ-ti̍t mā cháu bē khì.”

A-hun khiā tī piⁿ--á tán bē-hù, chhia̍k-chhia̍k-tiô, kho̍k-kho̍k mn̄g kóng: “Ko͘-pô, lí-á-thn̂g--leh? lí-á-thn̂g--leh? Góa beh chia̍h lí-á-thn̂g.”

虎姑婆kā阿勳ê頭so-so--leh，ná ka an-tah講：「好！好！好！按ne e暗阿勳to̍h hâm姑婆tàu陣睏，lán等--leh做夥食李á糖。」

阿祥淡薄á煩惱ka阻擋講：「姑婆，阿勳ê睏phiah kài bái, i hâm goán睏to̍h好--lah！」

Hó͘-ko͘-pô kā A-hun ê thâu so-so--leh, ná ka an-tah kóng: “Hó! Hó! Hó! Án-ne e-àm A-hun to̍h hâm ko͘-pô tàu-tīn khùn, lán tán--leh chò-hóe chia̍h lí-á-thn̂g.”

A-siông tām-po̍h-á hoân-ló ka chó͘-tòng kóng: “Ko͘-pô, A-hun ê khùn-phiah kài bái, i hâm goán khùn to̍h hó--lah!”

虎姑婆ná搖手ná應講：「無要緊，lín阿母有kā我講阿勳上狡怪--ah！Hō͘姑婆ka看顧to̍h好，你kah阿民mā緊去睏，m̄-thang耍siuⁿ òaⁿ，姑婆等--leh chiah去看--lín。」

阿祥無ta-ôa ka應好。

虎姑婆beh入去房間進前，koh叮嚀講：「日暗--ah！Lín bē使走--出-去-o͘h！」

Hó͘-ko͘-pô ná iô-chhiú ná ìn-kóng: “Bô iàu-kín, lín aA-bú ū kā góa kóng A-hun siōng káu-koài--ah! Hō͘ ko͘-pô ka khòaⁿ-kò͘ to̍h hó, lí kah A-bîn mā kín khì khùn, m̄-thang sńg siuⁿ òaⁿ, ko͘-pô tán--leh chiah khì khòaⁿ--lín.”

A-siông bô-ta-ôa ka--ê ìn hó.

Hó͘-ko͘-pô beh ji̍p-khì pâng-keng chìn-chêng, koh teng-lêng kóng: “Ji̍t àm--ah! Lín bē-sái cháu--chhut-khì-o͘h!”

半暝，阿民想欲去阿勳ê房間看māi--leh！雄雄hông ùi後壁kakā嘴am--leh！害伊chhoah 1 tiô，險險á大聲hoah--出-來。

阿祥kā阿民ê嘴am--leh，驚伊叫--出-來，sûi tī伊ê耳á邊細細聲á講：「是阿兄，m̄免驚。」

阿民手tī胸坎tah--2-ē-á，koh細聲á講：「阿兄，是你--o͘h！Beh kā我驚--死。」

Pòaⁿ-mê, A-bîn siūⁿ-beh khì A-hun ê pâng-keng khòaⁿ-māi--leh! Hiông-hiông hông ùi āu-piah ka chhùi am--leh! Hāi i chhoah 1 tiô, hiám-hiám-á tōa-siaⁿ hoah--chhut-lâi.

A-siông kā A-bîn ê chhùi am--leh, kiaⁿ i kiò--chhut-lâi, sûi tī i ê hīⁿ-á-piⁿ sè-sè-siaⁿ-á kóng: “Sī a-hiaⁿ, m̄-bián kiaⁿ.”

A-bîn chhiú tī heng-khám tah--2-ē-á, koh sè-siaⁿ-á kóng: “A-hiaⁿ, sī lí--o͘h! Beh kā góa kiaⁿ--sí.”

阿祥pháiⁿ勢ka̍h，用手tī ka-tī ê頭頂so-so--leh講：「Pháiⁿ勢--lah！你mā感覺無tùi-tâng，tio̍h--無？」

阿民應講：「Hèⁿ--ah！阿勳竟然lóng無吵，che真正chiok奇怪--ê！Tú想beh來看覓，to̍h聽tio̍h 1 ê奇怪ê聲音。」現此時阿勳ê房間koh傳來1陣「Kha̍h！Kha̍h！Kha̍h！」ê聲音。

A-siông pháiⁿ-sè ka̍h, iōng chhiú tī ka-tī ê thâu-téng so-so--leh kóng: “Pháiⁿ-sè--lah! Lí mā kám-kak bô tùi-tâng, tio̍h--bô?”

A-bîn ìn kóng: “Hèⁿ--ah! A-hun kèng-jiân lóng bô chhá, che chin-chiàⁿ chiok kî-koài--ê! Tú siūⁿ-beh lâi khòaⁿ-māi, to̍h thiaⁿ-tio̍h 1 ê kî-koài ê siaⁿ-im.” Hiān-chú-sî A-hun ê pâng-keng koh thoân-lâi 1 chūn “Kha̍h! Kha̍h! Kha̍h! ” ê siaⁿ-im.

台語有字！完整漢羅/白話字POJ原稿，請看做工á人台語工作室網站

https://cho-kang-a-lang.github.io/

[收聽Podcast]

SoundOn

https://bit.ly/ChKaL_SO

Spotify

https://spoti.fi/48jD2tI

KKBOX Podcast

https://bit.ly/ChKaL_KK

Apple Podcast

https://apple.co/3HZyfD3

[社交平台 Siā-kau Pêⁿ-tâi]

Facebook

https://bit.ly/ChKaL_FB

Instagram

https://www.instagram.com/chokangalang/

X (Twitter)

https://twitter.com/chokangalang

方格子

https://vocus.cc/salon/cho-kang-a-lang

--

Hosting provided by SoundOn