Moiesstudio

Gespannt kuckt de Lëtzebuerger Tennissport haut op Wimbledon. De Chris Rodesch spillt um 20 op 2 an der éischter Ronn vum Hapttableau e Match géint de Pablo Carreno Busta. Mir hu beim jonken Tennisspiller de Bols gefillt.

Wéi mir Enn d’lescht Woch gemellt hunn, huet de Finanzminister Gilles Roth leschte Freideg de Fraktiounen déi geplangten Ännerungen un der Persounebesteierung virgestallt. 900 Milliounen Euro d’Joer soll et de Staat kaschten, an et soll just nach eng Steierklass fir jidderee ginn. Wat bedeit dat elo konkreet?

Zu Lëtzebuerg gëtt ëmmer méi Stroum aus erneierbaren Energië produzéiert - dat geet aus dem neiste Rapport vum Nationale Regulatiounsinstitut ILR ervir. De gréissten Undeel u gréngem Stroum kënnt nach ëmmer vun de ronn 70 Wandrieder, déi uechter d’Land stinn. D’lescht Joer ass deenen hir Leeschtung a Gigawattstonnen - de Wäert, an deem d’Stroumproduktioun ausgedréckt gëtt - allerdéngs erofgaangen. Erklärungen dozou vum Marc Kohll vum Service Statistiques et Veille des marchés vum ILR.

De Generaldirekter vum Roude Kräiz Michel Simonis reagéiert op den Artikel vu reporter.lu iwwer d'Enn vum Programm fir ukrainesch Flüchtlingen ze logéieren.

Bei Geleeënheet vun deem ronnen Anniversaire: e Gespréich mat der neier Presidentin Fatima Rougi.

Muer um Samschdeg (28.6.) ass déi grouss ugekënnegt Manifestatioun vun den zwou Gewerkschaften OGBL am LCGB: “Géint dës Regierungspolitik” - esou steet et op hirem Flyer. Et ass awer net fir d’éischt an der Geschicht vu Lëtzebuerg, datt déi zwou grouss Gewerkschafte sech zesummen dinn an zesummen op d’Strooss ginn. D’Sté Bisenius huet e Bléck an d’Geschicht geheit.

Trotz dem staatleche Verbuet soll d'Pride-Parade zu Budapest als stättesch Veranstaltung stattfannen. Mir schwätze mam EU-Deputéierte Marc Angel, deen och un der Pride deelhëlt.

Lëtzebuerg trëtt fir d’éischte Kéier - a mat sengem bis ewell eenzegen Dodgeball-Club, dem Luxembourg Lions Dodgeball Club - bei der EM un.

De 26. Juni 2005 war en éischte Concert an der Philharmonie, zënterhier ass d'Weltelite aus der Klassik am Concertssall um Kierchbierg passéiert. De Generaldirekter vun der Philharmonie Stephan Gehmacher huet vill Grënn fir zefridden an houfreg ze sinn.