Moiesstudio

Zu Wolz huet e Méindeg ee psychiatrescht Dagesspidol fir Jonker opgemaach. Eng Struktur, déi gebraucht gëtt, och op anere Plazen, seet de CHDN-Direkter Jean-Marc Cloos.

Mir froen den Direkter vun der Steierverwaltung Jean-Paul Olinger, wou den Transformatiounsprozess drun ass a wat en um Enn fir d’Bierger:innen, Entreprisen an d'Beamten ännert.

Mat eiser Korrespondentin Marie Billon schwätze mir iwwer d'Debatt gëschter am House of commons iwwer d'Implicatioune vum Andrew Mountbatton-Windsor an d'Epstein-Affär.

Eise Korrespondent Philip Crowther huet déi fréier Generaldirektesch vun Esch2022 per Zoufall an der ukrainescher Haaptstad begéint an nogefrot.

Den Inneminister kritiséiert Ukrainer, déi flüchten amplaz ze kämpfen - a kritt dofir vill Zousproch. E Commentaire vum Maurice Molitor

Froen un den däitsche Politolog a Sécherheetsexpert Nico Lange, Senior fellow bei der Münchener Sécherheetskonferenz

De Philippe Crowther mellt sech um 4. Joresdag vun der russescher Invasioun live aus der ukrainescher Haaptstad.

Well de Klimawandel net méi opzehalen ass, gëtt et ëmmer méi wichteg d'Resilienz ze stäerken, seet de Porfesser Ottmar Edenhofer, President vum European Scientific Advisory Board on Climate Change (ESABCC).

Haut op den Dag sinn et véier Joer hier, datt Russland d’Ukrain ugegraff huet. Zënterhier ass e Krich amgaangen, vun deem d’Enn esou séier net en Vue ass. Mindestens 15.000 zivil Doudesaffer a méi wéi 40.000 blesséiert Zivilisten huet de Krich bis ewell gefuerdert. Zënter dem Ufank vum Krich 2022 sinn och vill Ukrainer:innen op Lëtzebuerg geflücht. Ëm déi 7.700 dovu kruten eng Protection temporaire zu Lëtzebuerg. Aktuell liewen ëm déi 4.000 Ukrainer:innen zu Lëtzebuerg. Wéi ass deenen hir Situatioun hei am Land? A wéi gutt si si integréiert? Ënner anerem doriwwer huet de Jo Welfringer mam Nicolas Zharov, dem President vun der Associatioun LUkraine geschwat, déi sech zu Lëtzebuerg fir Ukrainer:innen asetzt. An deen huet net mat Kritik gespuert.

D'Ausseministere vun der Europäescher Unioun treffe sech haut zu Bréissel. Mat dobäi ass och den Ausseminister vun der Ukrain. Een Dag virum véierte Joresdag vun der russescher Invasioun soll en 20. europäesche Sanktioune-Pak géint Moskau entscheet ginn. Mee Ungarn riskéiert déi Mesuren ze bremsen. De russesche Krich géint d'Ukrain geet also a säi fënneft Joer.