Moiesstudio

Bis e Méindeg dauert nach den Autosfestival – eng Zäit, an där besonnesch vill nei Autoen zu Lëtzebuerg verkaf ginn. Och hei am Land sinn an de leschte Jore méi elektresch Autoe verkaf ginn. Am populäerste sinn awer den Ament Hybrid-Autoen. An dat obwuel d‘Hybriden net méi subventionéiert ginn, a net immens ëmweltfrëndlech sinn.

Mir hunn et bis elo d’Affär Wilmes genannt, den Affekot vum Dokter Philippe Wilmes nennt et d’Affär Deprez: Zanter enger décker Woch stinn d'Virwërf, déi géint den Orthoped aus den Hôpitaux Robert Schuman erhuewe ginn am Mëttelpunkt vun der Aktualitéit. Wat seet d’Defense zu de Virwërf? En Interview mam Affekot François Prum.

Am Lycée Michel Rodange an der Stad sollen d’Septièmesschüler vun elo u matbestëmme kënnen. D’lescht Woch huet déi éischt Reunioun vum neien Delegéierterot stattfonnt. D’Klassendelegéiert hu Problemer a Léisunge fir hiren Alldag um Schoulcampus diskutéiert. D’Sophie Schroeder war sech ee Bild vun dësem neie Konzept maachen an huet mat den Delegéierten an dem Léierpersonal geschwat.

Wéi schwätzt ee mat Jonken iwwer den Holocaust an Zäite wou et kaum nach Zeie ginn? Dat froe mir den Direkter vum ZPB, Marc Schoentgen, um Holocaust Remembrance Day.

D'Assemblée nationale huet gëschter iwwer d'Gesetzespropos diskutéiert, déi sozial Medie fir déi ënner 15-järeg soll verbidden Eise Korrespondent Max Tholl kennt d'Detailer.

De Grand-Duché war och um drëtten Nordséi-Sommet present. Mir schwätze mam Energieminister Lex Delles iwwer dat wat hie gëschter fir d'Stroumversuergung hei am Land erreecht huet.

Eng gutt 30 Leit haten sech virun der US-Ambassade um Lampertsbierg an der Staat zesumme fonnt, fir hir Solidaritéit mat de Mënschen am US-Bundesstaat Minnesota auszedrécken. Zwou Persoune waren hei rezent vun der amerikanescher Immigratiounspolice ICE erschoss ginn. D‘Situatioun am den USA spëtzt sech weider zou.

De Stolproduzent ArcelorMittal versprécht, datt duerch eng nei grouss Anlag um Site zu Déifferdeng 85 Prozent vum Stëbs aus der Produktioun soll zréckbehale ginn.

Dëse Projet géif net realiséiert ginn, fir méi ze produzéieren, mee just fir d’Ëmwelt an d’Noperschaft z’entlaaschten, hat et schonn am Joresrapport 2024 vun ArcelorMittal Lëtzebuerg geheescht.

Den neie “Système de dépoussiérage” am Wierk zu Déifferdeng hunn déi Responsabel vun ArcelorMittal d’lescht Woch bei hirer Receptioun fir dat neit Joer presentéiert.

D'Reaktioun vum Fränz Hausemer, dem Realisateur vum Documentaire iwwer de Gast Rollinger, seng Gedichter, seng Passioun fir de Film a seng Léift fir de Minett.

E Gespréich mam Linguist a Kulturhistoriker Jean-Claude Muller iwwer säi Buch "Les noms de famille Luxembourgeois"