Monitor Toyota US. Woordfees 2020 uitsending Maandag 09032020 7-8

Minstens 30% van Suid-Afrikaanse jong meisies is oorgewig. Meer as die helfte van die land se volwassenes is ook oorgewig. Wêreldwyd ly 650 miljoen mense aan vetsug. Een van die wereld se voorste kundiges op die gebied van vetsug, professor Tess van der Merwe van die Universiteit van Pretoria, wat ook dien as Afrika Konsultant vir die Internasionale vereniging vir vetsug, deel haar insig oor die toestand.

Die Suid-Afrikaanse ekonomie het in die vierde kwartaal van 2019 met 1,4% gekrimp - volgens die nuutste Bruto Binnelandse Produk syfers wat gister deur Statistiek Suid-Afrika bekendgestel is. Dit volg op 'n inkrimping van 0,8% in die derde kwartaal - wat beteken dat die ekonomie reeds vir die laaste helfte van 2019 in 'n resessie was. Suid-Afrika was laas in 2018 in 'n resessie. En hierdie is die derde resessie sedert 1994. Ons gesels nou hieroor met die ekonomiese raadgewer by die Optinum Belggingsgroep, Roelof Botha.

'n Groep inwoners van Kaapstad het besluit om die erge besoedeling van riviere in die stad self by die horings te pak. Gemeenskapslede wat deel vorm van die Help Up beweging, poog om rommel uit die Swart rivier, asook ander riviere en stormwaterpype te verwyder. Die program poog om gemeenskapslede te bemagtig met vergoeding, en deur gemeenskapslede self in beheer van hulle opruimaksies te plaas. Marlinee Fouche doen verslag.

Daar is baie stories wat die rondte doen oor die COVID19-coronavirus, wat nie almal waar is nie. Professor Venter van die Universiteit van Pretoria se Mediese Fakulteit, wat n deskundige is op respiratoriese virusse gee duidelikheid oor die virus-stamme....

Yoshi, die karet seeskilpad het pas in Australië aangekom nadat sy op 15 Desember 2017 suid van Kaapstad vrygelaat is. Sy het eers 'n draai gemaak by Angola en toe die pad na Australie aangepak, 'n afstand van meer as 35 duisend kilometer. Die uitvoerende hoof van die Twee Oseaane Akwarium se Opvoedings Stigting, Maryke Musson praat met ons oor Yoshi se migrasie patrone.

Die Minister van Openbare Werke en Infrastruktuur, Patricia de Lille, het aangekondig dat 'n bykomende 648 hektaar staatsgrond vir behuisingsontwikkeling beskikbaar gemaak is. Dit volg nadat 167 erwe van sowat veertienduisend hektaar in Oktober verlede jaar vrygestel is. De Lille sê die vrystelling van grond is deel van die regering se grondhervormingsproses wat op die wyse bespoedig sal word.

Weens sanksies van wanbetaling wat deur die Internasionale Sportfederasie vir mense met gestremdhede - of INAS - ingestel is teen die Suid-Afrikaanse Sportvereniging vir Intellektueel Gestremde Atlete, beter bekend as SASA II, kon die atlete nie verlede jaar aan die Global Games, gelykstaande aan die Olimpiese Spele vir intellektueel gestremde atlete deelneem nie. 'n Verdere gebrek aan fondse verhoed ook nou die nasionale Down Sindroom-atlete-span om in April aan die internasionale Trisomie-spele in Turkye deel te neem. Die Spele is gelykstaande aan die Olimpiese Spele vir Down Sindroom-atlete. Este de Klerk berig.

Kan die NG Kerk skeur? Die twis in die NG Kerk oor gay-huwelike het 'n wending geneem, nadat die Goudland-sinode - wat uit 159 gemeentes in Noordwes en dele van Gauteng bestaan - besluit het om hul geldelike bydrae aan die Algemene Sinode te weerhou. Gemeentes oor die land heen plaas ook druk op hul streeksinodes om sinodesittings te hou, om te besin oor die pad van die kerk vorentoe. Este de Klerk doen verslag.

Ons bly by die storie. By ons in die ateljee is dr Andre Bartlett, die moderator van die NG Kerk se Hoëveld-sinode en ook verbonde aan die Departement Teologie aan die Universiteit van Pretoria.