Die benoemings vir Suid-Afrika se weergawe van die Oscars, die Suid-Afrikaanse Rolprent- en Televisietoekennings, oftewel die SAFTAS, is pas bekendgemaak. Die kinematograaf, Willie Nel, is met twee SAFTA-benoemings in dieselfde kategorieë vereer. Hy het die kinematografie behartig van beide "Die verhaal van Racheltjie de Beer" sowel as "Knuckle City". Nel het vir Anna-Marie Jansen Vuuren vertel gesê dat dit 'n groot eer is om raakgesien te word deur kenners op die gebied van kamerawerk.

Oud-president FW de Klerk se uitlating dat apartheid nie 'n misdaad was nie het wyd reaksie uitgelok. Maar is hy dalk reg? Anita Visser en Gustav Greyling het met die internasionale regskenner, professor Hennie Strydom van die Universiteit van Johannesburg, en professor Anton van Niekerk, direkteur van die Universiteit van Stellenbosch se Sentrum vir Toegepaste Etiek, gepraat.

Vandag is Wêreld Radiodag, en die Verenigde Nasies sê dis 'n magtige medium wat die mensdom in al sy verskeidenheid kan vier. Boonop bied radio ook 'n platform vir die voer van 'n demokratiese diskoers. Die VN sê radio is tot vandag toe steeds die enkele medium wat die meeste gebruik word, en weens die unieke vermoë om so 'n wydlopende gehoor te bereik, kan radio die samelewing help vorm. Die VN fokus vanjaar veral op diversiteit in radio -- van die verskillende soorte inhoud wat uitgesaai word op openbare-, kommersiële en gemeenskapsradiostasies, tot nuuskantore wat die luisteraars werklik weerspieël, en die verskeidenheid van standpunte wat diverse gemeenskappe kan bedien. Maar is radio werklik so gesond soos wat die VN dit wil hê? Gustav Greyling en Anita Visser praat hieroor met prof. Franz Kruger, direkteur van die Radio-Akademie by Wits-universiteit se joernalistiek-departement.

Sonder insekte is die mens se voortbestaan in die weegskaal. So sê 'n uitgelese Professor by die Departement van Bewaringsekologie en Entomologie aan die Universiteit Stellenbosch, Michael Samways.

President Donald Trump het 'n kort rukkie gelede sy staatsrede vir 2020 voor die Amerikaanse kongres gelewer. Dit is 'n dag voor die beslissing oor staat van beskuldiging. Die politieke ontleder Theo Venter het na die toespraak geluister en Monitor het met hom daaroor gepraat.

President Cyril Ramaphosa se aansoek om die openbare beskermer se verslag oor die Bosasa-skenkings aan hom te laat hersien, het gister in die hooggeregshof in Pretoria begin. Die hof moes by beide kante se regspanne hoor hoe reg hulle kliënt en hoe verkeerd die ander party is. Die saak gaan vandag voort. Monitor het met die regskenner prof Pierre de Vos en die parlementêre joernalis Jan-Jan Joubert oor die saak gepraat.

Gister, 30 jaar gelede, op 2 Februarie 1990, het president F.W. De Klerk 'n toespraak gelewer wat die politieke landskap van Suid-Afrika totaal sou verander. In sy openingsrede aan die parlement het hy die ANC, PAC, en SAKP ontban. Verder het hy die vyf jaar lange noodtoestand opgehef en politieke gevangenes vrygelaat. Slegs nege dae later is Nelson Mandela vrygelaat. Vir meer oor hierdie historiese gebeure praat ons nou met 'n politieke ontleder verbonde aan UNISA, Professor Dirk Kotze, en voormalige koerantredakteur, skrywer en politieke ontleder, Harald Pakendorf...

Die dodetal weens die corona-epidemie in China het tot 361 gestyg, terwyl die aantal bevestigde gevalle in China tot meer as 17-duisend aangegroei het. Die eerste sterfgeval buite China is gister in die Filippyne aangemeld. Minstens 171 gevalle is in tientalle ander lande bevestig. Maar hoe gereed is Suid-Afrika om die virus te bekamp, en hoe bang moet ons wees? Ons paat hieroor met die hoof van die Infeksie-siektes afdeling by die Fakulteit Geneeskunde, Stellenbosch Universiteit, Dr Jantjie Taljaard.

Dirk Malan is 'n 57-jarige prokureur en die hoof van die regsafdeling van 'n privaathospitaalgroep. Hy's ook 'n voormalige gewapende rower wat in 1999 agt jaar gevangenisstraf vir gewapende roof in Bloemfontein se Grootvlei tronk uitgedien het. Malan het in die 2000s 'n prominente rol gespeel in die stryd vir die regte van gevangenes. Hy het ook as regsverteenwoordiger vir baie van sy mede-gevangenes opgetree. Sodoende het hy hofsake teen die Departement van Korrektiewe dienste gewen, wat die owerhede woedend gelaat het. In die laaste aflewering oor Malan, doen Darren Taylor verslag oor sy lewe vandag.

Monitor het oor die afgelope paar weke verslag gedoen oor die lewe van die oud-gevangene Dirk Malan. Hy is in 1999 skuldig bevind aan gewapende roof na hy en 'n metgesel 'n groot bedrag kontant van 'n sakeman in Bloemfontein gesteel het. Hulle slagoffer is tydens die voorval ernstig gewond. Malan was in 2002 in Bloemfontein se Grootvlei tronk aangehou, toe gevangenes daar 'n geheime video gemaak het oor die misdadige optrede van bewaarders.
Terwyl hy in die tronk was, het Malan vir 'n regsgraad deur UNISA studeer. Hy het tydens sy gevangenisstraf verskeie suksesvolle hofaksies teen die departement van korrektiewe dienste geloods, onder meer 'n saak wat die regte van gevangenes op verdere studie verseker het.
Vandag is Malan 'n 57-jarige prokureur en 'n bestuurder by 'n privaathospitaalgroep. In die volgende aflewering oor sy lewe, berig Darren Taylor oor Malan se uiteindelike vrylating.