Ernstige kommer heers oor die uitwerking van die voortslepende droogte in die Vrystaat. 'n Paar weke gelede het boere nog gehoop reën sal hulle oes kon red, maar behalwe vir 'n paar druppels wat hier en daar geval het, het deurdringende reën nooit gekom nie. Die hoofbestuurder van Vrystaat Landbou, Henk Vermeulen, het aan Dianke Nel gesê die droogte het ook 'n sielkundige-en emosionele invloed op boere.

Die minister van Kommunikasie, Faith Muthambi, het Vrydag 'n wet ter tafel gelê wat die regering beheer oor die openbare uitsaaier, die SAUK, sal gee. Die Uitsaai-wysigingswetsontwerp sal die Parlement se rol in die aanstelling van die SAUK se nieuitvoerende raadslede verwyder. Die president sal dan verantwoordelik wees vir die aanstelling van die raadslede met behulp van die minister se raad. Dianke Nel berig dat die minister op haar beurt, raad van 'n nominasiekomitee sal ontvang wat sy self aanstel.

Die Nasionale Vervolgingsgesag sê hy is gereed om die hof te nader vir 'n vonnis van 15 jaar tronkstraf vir Oscar Pistorius. Die saak sal na verwagting voor die einde van die week in die hof draai. Die NVG sê Pistorius moet dringend in die hof verskyn, sodat die regsproses vir vonnisoplegging kan begin.

Die leiers van China en Afrika het ingestem om die pas van handel en belegging oor die volgende drie jaar te versnel. Dit het uit die naweek se China/Afrika-beraad in Sandton in Johannesburg voortgevloei. China het onderneem om sowat R860-miljard in 'n verskeidenheid infrastruktuur-ontwikkelingsprojekte regoor die vasteland te belê.

Afrika se reaksie op die aankondiging van China dat hy 60-miljard dollar in verskeie vorme in die vasteland gaan belê, is teleurstellend. So sê die besturende direkteur vir onluikende markte en Afrika by Frontier Advisory DeLoitte, dr. Martyn Davies. Hy wil weet waar die maatskappye uit Afrika is wat sake in China kan doen.

Die Appèlhof in Bloemfontein het eenparig beslis dat die paralimpiese atleet, Oscar Pistorius, skuldig is aan die moord op sy vriendin Reeva Steenkamp. Die appèlhof het sy vorige skuldigbevind van strafbare manslag ter syde gestel. Pistorius het Reeva op Valentynsdag in 2013 doodgeskiet. Jean Esterhuizen berig dat die saak terug verwys is na die Hooggeregshof in Pretoria vir vonnisoplegging.

Die paralimpiese atleet, Oscar Pistorius gaan weer in die Hooggeregshof in Pretoria moet verskyn vir vonnisoplegging nadat die Appelhof beslis het dat hy skuldig is aan moord. Dit volg nadat die staat vroeër geappelleer het teen die uitspraak van regter Matsipa dat Pistorius skuldig is aan strafbare manslag nadat hy sy vriendin Reeva Steenkamp in 2013 doodgeskiet het. Die regskenner dr. Llewellyn Curlewis het in 'n onderhoud met Suzanne Paxton gereageer op die Appelhof beslissing.

June Steenkamp sê in reaksie op die Appelhof beslissing oor die skuldigbevinding van Oscar Pistorius dat haar familie dankbaar is en nou voortgaan met hulle lewens. Oscar is skuldig bevind aan moord op Reeva Steenkamp en nie strafbare manslag nie.

Krisjan Fourie het 'n satiriese blik op die afgelope week se hoofnuus.

Die polisie het gistermiddag 'n 39-jarige man in Vanderbijlpark inhegtenis geneem vir die moord op sy vrou en twee kinders. Die man het aanvanklik die polisie daarvan probeer oortuig dat sy gesin tydens 'n huisroof vermoor is terwyl hy omstreeks vieruur in die oggend doenig was in die motorhuis. Maar sowat tien uur later het die polisie twee pistole in die dak van die motorhuis gevind waar hy dit na bewering probeer versteek het. Jacques Steenkamp doen verslag