Te midde van vrese dat Afrikaans 'n knou weg het by universiteite, leef die taal suksesvol voort in die filmbedryf. Die produksiemaatskappy, Black Sheep, se eerste plaaslike rolprent word binnekort vrygestel - in Afrikaans.

Krisjan Fourie het 'n satiriese blik op die afgelope week se hoofnuus.

Inwoners van die Bo-Kaap in Kaapstad sê die woonbuurt kan 'n slagoffer word van die proses bekend as gentrifikasie. Dit is waar welgestelde mense huise in vervalle buurte koop en dan verbeter. Die gebied met sy helderkleurige huise word deur die Amerikaanse Wêreld Monumentefonds erken, weens die woonbuurt se kenmerkende spreektaal, argitektuur en Moslemkultuur. Berenice Moss berig dat die gemeenskapsorganisasie in die Bo-Kaap bekommerd is dat daar nie wetgewing is om die woonbuurt teen ontwikkelaars te beskerm nie.

Die parlement se portefeuljekomitee op polisie het bevind dat die polisie se topbestuur die parlement mislei het. Polisiegeneraals moes aan die komitee verduidelik hoe dit gebeur het dat hulle twee mediaverklarings ter ondersteuning van die geskorste nasionale polisiekommissaris, Riah Phiyega, uitgereik het. Dit was kort nadat die Farlam-kommissie van ondersoek aanbeveel het dat haar bevoegdheid vir die pos as polisiehoof ondersoek moet word. Die komitee het onder andere probeer vasstel hoe eerlik die generaals was, of hulle die polisiediens oneer aangedoen het, en of hulle 'n proses wat reeds deur president Jacob Zuma aan die gang gesit is, probeer beïnvloed het. Zalene Merrington berig dat dit die eerste keer sedert 1994 is dat so 'n ondersoek in terme van reël 201 van die parlement gedoen word.

Die minister van Polisie, Nathi Nhleko, sê 'n ministeriële verwysingsgroep het aanbeveel dat 'n raad van ondersoek gehou word om die geskorste kommissaris van polisie, Riah Phiyega, te ondersoek. Die groep het sedert Julie verlede jaar deur die land gereis om klagtes teen Phiyega te ondersoek. Zalene Merrington berig dat senior polisielede onder andere uit hulle poste as adjunknasionalekommissarisse onthef is sonder dat hulle geraadpleeg is.

Rusland kan moontlik uit volgende jaar se Olimpiese Spele in Rio de Janeiro geskors word. Só sê die hoof van Wêreldatletiek, Sebastien Coe, ná die skokonthulling dat die atletieksupermoondheid verbode middels aan sy atlete verskaf. Die Russiese atletiekfederasie, Araf, moet teen Vrydag op die bewerings reageer, anders sal hy beslis geskors word. Ivor Price praat hieroor met die atletiekstatistikus en skrywer, Riël Hauman.

Die Minister van Sport, Fikile Mbalula, is tevrede met die pas waarteen transformasie in Suid-Afrikaanse rugby geskied. Die kwessie van transformasie in die nasionale rugbyspan is onder die loep nadat slegs agt spelers van kleur by die Springbokgroep vir die Wêreldbeker ingesluit is.

'n Gesprek oor witheid het gister in Johannesburg in 'n fel woordestryd tussen verskillende belangegroepe ontaard. Die woordestryd het ontstaan in reaksie op die voorleggings van Afriforum en Solidariteit. Izak du Plessis berig dat die meerderheid van die gehoor en sprekers skerp kritiek op die twee voorleggings gelewer het.

Krisjan Fourie kyk na sake soos die droogte en die Fees Must Fall-veldtog.

Enige debat oor wit-wees lei die aandag af van die groter probleme waarmee die regering worstel. Só glo die adjunkhoof van Afriforum, Ernste Roets. Ivor Price en Anita Visser praat met hom hieroor.