Suid-Afrika kan baat by 'n model om ouers in landelike gebiede op te lei om skoolbeheerliggame te bestuur. So sê 'n besoekende akademikus by die Milaan Skool van Internasionale Sake, Bestuur en Openbare Beleid in Italië, dr. Daniel Altschuler. Sy navorsing het bevind dat ouers wat die soort opleiding ontvang die vaardighede ook op ander gebiede toepas.

Sasol wil 1000 werkers aflê. Telkom sê hy gaan ook 'n klomp mense laat loop. Intussen dreig mynwerkers in die platinumsektor om weer te begin staak, of aan te hou staak en die ekonomie nog verder onder druk te plaas. Brandstofpryse sal waarskynlik volgende maand tot rekordhoogtes styg. Alles aanduidings dat ekonomiese groei en werkskepping onder toenemende druk sal wees. Maar die naweek met die uitreiking van sy verkiesingsmanifes maak die ANC 'n rits nuwe beloftes bekend, onder meer dat hy sesmiljoen werksgeleenthede oor die volgende vyf jaar sal skep. Die party belowe ook landelike ontwikkeling, grondhervorming, voedselsekuriteit en 'n rits ander goed. Cobus Bester praat hierooer met die ekonoom, Dawie Roodt van die Efficientgroep, en die politieke ontleder, dr. Piet Croucamp van die Universiteit van Johannesburg.

Net die noem van die woord "verspreider" laat sekere plaaslike rolprentmakers se bloed kook. Dit is die maatskappye en individue wat bepaal watter flieks waar en vir hoe lank vertoon word. En met die Suid-Afrikaanse rolprentbedryf wat aanhou groei sê vervaardigers hulle sal ander markte vir hulle produkte moet vind.

Die Demokratiese Alliansie het die openbare beskermer gevra om die Vrede Suiwelprojek in die Vrystaat te ondersoek. Die werkskeppingsprojek het ten doel om 'n suiwelplaas op die been te bring, waarna dit ook as 'n opleidingsentrum sal dien. 'n DA lid in die Vrystaatse Wetgewer, Roy Jankielsohn, meen egter daar is oorspandering en moontlike bande met die Gupta-familie.

Die bestuurder vir bewaring van die SA Jagters en Bewaringsorganisasie, Lizaan Nel, sê die bohaai oor die swartrenosterbul wat in Namibië gejag gaan word, is onnodig. 'n Permit om 'n bedreigde swartrenoster in Namibië te jag, is vir sowat 3,75 miljoen rand op 'n veiling in Texas in die VSA verkoop. Diereregtegroepe maak beswaar teen die jag op die bedreigde spesie. Nel sê egter renosterbevolkings moet bestuur word, anders beperk dit die genetiese lyn. Sy sê aggressiewe ou bulle kan kalwers en selfs ander renosters doodmaak.

Klimaatskeptici sê die jongste flater van die voormalige visepresident van Amerika en deesdae klimaatveranderingsaktivis, Al Gore, bevestig hulle aanspraak dat klimaatsverandering die wêreld se grootste leuen is. Gore, wat al in sy dae as politikus gereeld ondeurdagte stellings gemaak het, het die wêreld tussen 2007 en 2009 laat regop sit met sy uitsprake oor wat toe nog bekend gestaan het as aardverwarming. Dit is veral sy uitspraak in 2007 oor die verdwyning van die Noordpool teen 2013 wat die verbeelding aangegryp het.

Die belastingbetalersvereniging van Graaff-Reinet in die Oos-Kaap het die Openbare Beskermer versoek om tussenbeide te tree in 'n dispuut oor die aanstelling van die Munisipale Bestuurder by die Camdeboo Munisipaliteit. Die vereniging sê die gemeenskap wil nie 'n munisipale bestuurder hê wat ses hangende strafregtelike aanklagte teen hom het nie.

Net een uit elke tien leerlinge wat met graad een begin, kry uiteindelik 'n tersiêre kwalifikasie. So vertel die uitvoerende hoof van die Instituut van Rasseverhoudinge, Frans Cronje. Hy sê net die helfte van leerlinge in graad een sal matriek slaag en dat die aantal leerlinge op die skoolbanke van graad 10 af ernstig afneem.

Noord-Amerika bly vasgevang in die greep van 'n ysige winterstorm. In New York, aan die ooskus van die VSA, is temperature van minus15 grade Celsius gister aangeteken en in Winnipeg in die middel van Kanada is temperature van laer as 30 grade onder vriespunt aangeteken.

Spesiale aktualiteitsprogram vir Kersdag.