Belasting, leuens en rompslomp - die groot remskoene vir die ekonomie. Die bekende ekonoom, Dawie Roodt van die Efficientgroep, het sy lang mes gaan uitgrawe om die land se heilige koeie keel af te sny. In 'n nuwe boek trek hy te velde teen wat hy bestempel as die regering en ideoloë se leuens en moedwillige misleiding van die bevolking. En natuurlik het hy ook raad oor hoe dinge reggemaak kan word.

Die Universiteit van die Vrystaat bied van volgende jaar af 'n BSc-graad in Forensiese Wetenskap aan in 'n poging om die vaardigheidstekort in dié beroep te verminder. Die universiteit sal die eerste têrsiere instelling in Suid-Afrika wees om 'n graadkursus van hierdie aard aan te bied. Die hoof van die Departement Genetika, prof. Johan Spies, sê die graadkursus poog om gekwalifiseerde personeel aan die Suid-Afrikaanse Polisiediens se forensiese afdeling te verskaf. Hy sê aansoeke vir die BSc-graad sluit 30 September. Download audio: http://www.rsg.co.za/images/upload/sound/klanke/20130821_MONITOR_FORENSIES.mp3

Die skrywer van die boek DIE REG OM LINKS TE WEES, Isebell Gauché, sê ouers moet nie hulle linkshandige kinders dwing om regshandig te wees nie. Sy sê daar is baie praktiese metodes wat ouers kan toepas om hulle kinders se leerervaring by die skool te vergemaklik. Vandag is dit die Internasionale dag van Linkshandigheid en volgens navorsing is sewe tot tien persent van die wêreld se bevolking linkshandig. Gauché het eerstehandse ervaring met linkshandigheid.

Dit gons in Amerika oor 'n nuwe boek oor alternatiewe geneesmiddels en al die vitamienaanvulling-oordadigheid. Die boek is DO YOU BELIEVE IN MAGIC? THE SENSE AND NONSENSE OF ALTERNATIVE MEDICINE. Dit is geskryf deur 'n mediese wetenskaplike, prof. Paul Offit. Cobus Bester praat hieroor met RSG se wetenskapkorrespondent, George Claassen.

Omgewingskundiges is geskok oor die blatante pogings van stropers om die aasvoëlbevolking in die Caprivistrook in Namibië uit te wis. Tussen 400 en 600 aasvoels het gevrek nadat hulle aan 'n vergiftigde olifantkarkas gevreet het. André Botha, bestuurder van die Roofvoëlprogram van die Trust vir Bedreigde Natuurlewe, sê die olifant is gestroop en die karkas met gif besmeer sodat die aasvoëls wat daaraan vreet, moet vrek. Botha sê dis nog onduidelik watter spesies spesifiek die swaarste gestref is. Hy sê hierdie is 'n groter slag vir die reeds hoogs bedreigde aasvoëlspesies in Afrika as die aantal renosters wat tot dusver gestroop is.

Gemeenskappe in die Wes-Kaap word geteister deur toenemende bendegeweld en dwelmmisbruik. Baie lewe in vrees dat hulle die volgende slagoffer van bendekoeëls sal word, terwyl al hoe meer kinders die stryd teen dwelms verloor. Manenberg op die Kaapse Vlakte beleef al hoe meer skietvoorvalle. Die gebied veg reeds dekades lank teen dwelm en bendebase.

Afrikatale sal van volgende jaar af in grade R en 1 by tien skole per distrik, as 'n loodsprogram, ingestel word. Teen 2015 sal alle openbare skole 'n Afrikataal in die twee grade moet aanbied. Dit was een van die aankondigings wat die Minister van Basiese Onderwys, Angie Motshekga, in Pretoria gedoen het. Sy het ook gesê dat 'n kurrikulum vir gebaretaal teen 2015 beskikbaar sal wees en dat die lewensvatbaarheid van skole met minder as 135 kinders oorweeg sal word.

Ons hoofstorie vanoggend is dat die kommissie van ondersoek na die wapenskandaal se openbare sittings uitgestel is. Die langverwagte sittings kom te midde van hernieude kommer oor die kommissie se vermoëns en integriteit. Cobus Bester praat hieroor met 'n grondwetkenner, professor Pierre de Vos.

Talle luisteraars het Maandag, na aanleiding van 'n moontlike verbod op lyfstraf by die huis, laat weet dat hulle ten gunste van lyfstraf is. Volgens die meerderheid van die luisteraars wat SMS'e aan Monitor hieroor gestuur het, is dit 'n Bybelse opdrag en kan ongedissiplineerdheid toegeskryf word aan 'n gebrek aan lyfstraf. Monitor het by 'n paar kenners probeer uitvind hoe aanvaarbaar lyfstraf is.

Emeritus aartsbiskop Desmond Tutu het 'n afdruk van sy voet by die Wieg van die Mensdom gemaak. Dié wêrelderfenisgebied het sowat 40%van die wêreld se fossiele van menslike voorvaders opgelewer. Ander bekendes, soos oudpresidente Thabo Mbeki en Nelson Mandela, het ook daar afdrukke gemaak. Download audio: http://www.rsg.co.za/images/upload/sound/klanke/20130801_MONITOR_TUTU.mp3