Emeritus aartsbiskop Desmond Tutu het 'n afdruk van sy voet by die Wieg van die Mensdom gemaak. Dié wêrelderfenisgebied het sowat 40%van die wêreld se fossiele van menslike voorvaders opgelewer. Ander bekendes, soos oudpresidente Thabo Mbeki en Nelson Mandela, het ook daar afdrukke gemaak. Download audio: http://www.rsg.co.za/images/upload/sound/klanke/20130801_MONITOR_TUTU.mp3

Daar is sowat 4 300 kinders en volwassenes in Suid-Afrika, wat op die waglys is vir orgaan en kornea-oorplantings. Volgens die SA Orgaan oorplantingsvereniging was daar verlede jaar slegs 573 orgaan en kornea-oorplantings in die land. Die vereniging se voorsitter en 'n oorplantingchirurg, dr. Elmi Muller, sê daar is verskeie organe in 'n persoon se liggaam wat geskik is vir skenking en oorplanting. Sy sê deesdae word daar baie organe van mense bo die ouderdom van 60 gebruik vir oorplantings. Download audio: http://www.rsg.co.za/images/upload/sound/klanke/20130801_MONITOR_ORGANE.mp3

Suid-Afrikaanse swemmers ryg medaljes in by die Wêreldkampioenskap in Barcelona, Spanje. Hulle het reeds vier medaljes wat hulle terugbring Suid-Afrika toe en die hoop beskaam nie vir die oorblywende items nie. Download audio: http://www.rsg.co.za/images/upload/sound/klanke/20130801_MONITOR_SWEM.mp3

Een van die groot geeste in die Afrikaanse uitsaaiwese en in die land se kultuurwêreld is dood. Joubero Malherbe het oor dekades heen haar merk gelaat in 'n breë verskeidenheid aktiwiteite. Radio-omroeper, musiekfynproewer, komponis, liriekskrywer en vele meer. En tussen dit alles deur het sy dit ook reggekry om 'n trotse ma van formaat te wees. Sy was die stigter van Unisa se sangkompetisies en het vir baie jare musiekprogramme op RSG aangebied soos Musiekposbus, die vasvraprogram Munte uit Note en Vanwaar Gehasie? Musiekposbus was langer as 20 jaar op die lug. Sy laat twee kinders en vyf kleinkinders agter. Cobus Bester praat met iemand wat oor die jare baie met Joubero saamgewerk het en haar goed geken het. John Roos is die direkteur van Unisa se internasionale musiekkompetisies. Download audio: http://www.rsg.co.za/images/upload/sound/klanke/20130731_MONITOR_JOUBERO.mp3

Die kunstenaar, Lieze Stassen, wat veral onthou word vir haar CD "Thula" wat in 1997 haar 'n SAMA toekenning vir die beste kontemporêre album besorg het, het die afgelope tien jaar uit die openbare oog verdwyn.... Die dood van haar sewentienjarige seun, Alexander, het haar stem stil gemaak.... Sy het 'n jaar gelede op 'n plaas met net die perde as haar gehoor, ontdek sy kan WEER sing en musiekmaak. Sy het in 'n eksklusiewe onderhoud met Wilna Matthee gepraat oor haar pas voltooide CD "My hart is jou gebed" wat die produk is van haar heel word proses.

Die bekende "Ja boet, ja swaer," gevolg deur 'n kekkellaggie, gaan binnekort rolprentteaters vul wanneer die fliek BABALAS op 2 Augustus vrygestel word. Gemeet aan die reaksie van mense wat die première bygewoon het, behoort FC Hamman en Peter Scott se eerste komedie by baie mense byval te vind.

Die Suid-Afrikaanse produkte van Dettol en Domestos is, volgens die maatskappy, veilig vir gebruik. Die Reguleerder van Verpligte Spesifikasie het twee produkte van dié handelsmerke teruggeroep. Dettol Lime & Lemongrass Disinfectant Liquid word onwettig deur 'n ander maatskappy ingevoer na Suid-Afrika en voldoen nie aan die plaaslike veiligheidsregulasies nie. Domestos Extended Germ Kill word egter wettig ingevoer en voldoen aan die veiligheidsregulasies, maar nie aan administratiewe regulasies nie.

Ons het vroeër berig oor die tragedie wat hom gister in Alberton aan die Oos-Rand afgespeel toe 'n man eers sy twee kinders en daarna homself doodgeskiet het. Sy voormalige vrou is ook in die skietery gewond. 'n Kliniese sielkundige sê daar is 'n toename in gesinsmoorde in Suid-Afrika, spesifiek onder wit Afrikaanse gesinne. Daleen Macklin sê hoewel dit by ander rassegroepe ook voorkom, verskil die aard daarvan. Sy sê studies toon daar is 'n toename in gesinsmoorde in tye van ekonomiese onsekerheid en wanneer werkloosheid aan die orde van die dag is.

Die voormalige voorsitter van die Suid-Afrikaanse Lugdiens, Cheryl Carolus, sê oudpresident Nelson Mandela het haar ondersteun tydens haar sterwende pa se kanker-siekbed. Noudat Madiba self die einde van sy lewe bereik, dink sy veral aan die dag toe hy haar pa in die hospitaal besoek het.

Die koor van die Oranje Meisieskool in Bloemfontain is oorval met toekennings op die Internasionale Jeugmusiekfees in Slowakye. Dis die eerste keer dat die skoolkoor deelneem aan 'n oorsese kompetisie. En nie net is die singende nagtegale bekroon omdat hulle die algehele wenner onder 22 kore was nie, maar hulle het ook nog vier toekennings huis toe gebring. Download audio: http://www.rsg.co.za/images/upload/sound/klanke/20130717_MONITOR_CHOIR.mp3