Die bekroonde skrywer, Deon Meyer, het vir die eerste keer in die regisseurstoel ingeskuif met sy debuutrolprent DIE LAASTE TANGO. Maar dié taak het nie sonder sy eie unieke uitdagings gekom nie. Die tango het selfs die hoofakteur, Louw Venter, in die hospitaal laat beland! Anna-Marie Jansen van Vuuren het die rooitapyt première in Pretoria bygewoon en vir die gaste gevra waaraan hulle dink as hulle die woord TANGO hoor...

Terwyl die wêreld asem ophou vir nuus oor Nelson Mandela se gesondheid, is daar toenemend berigte in die buitelandse media dat veral wit mense bang is vir 'n Suid-Afrika sonder sy geliefde oudpresident. Die burgerregte-organisasie AfriForum sê hy word oorval deur mense wat bang is... en ook die AWB is blykbaar benoud oor die 94-jarige Madiba se gesondheid - dit terwyl honderde debatte hieroor op die internet woed.

Dr. Mamphela Ramphele se politieke platform, Agang, sal Saterdag in Pretoria amptelik as 'n politieke party gestig word. Ramphele het in Februarie vanjaar die platform aangekondig. Cobus Bester praat hieroor met dr. Piet Croukamp van die Universiteit van Johannesburg.

Die DA se parlementêre leier, Lindiwe Mazibuko, se gewig en smaak in kleredrag was verlede week 'n grap tydens 'n sitting van die parlement. 'n Lid van die ANC, John Jeffrey, het voor die parlement gesê Mazibuko mag dalk 'n persoon van 'n aansienlike gewig wees, maar haar statuur moet betwyfel word. Mazibuko was geklee in 'n kort wit en swart rok met swart sykouse en 'n rooi baadjie. Cobus Bester praat hieroor met prof. Amanda Gouws van die Universiteit van Stellenbosch se Departement Politieke Wetenskap.

Vandag is Verna Vels, die skepper van vele kinderkarakters, ons ateljeegas op haar tagtigste verjaarsdag. Sy is 'n bekende skrywer en radio en TV-persoonlikheid. Menige Afrikaanse kind het grootgeword met die karakters wat sy geskep het: Liewe Heksie en haar kaboutermaatjies in Blommeland, Koning Rosekrans, Blommie, haar kat Matewis, die gesofistikeerde Karel Kat met sy helikopter, haar towerperd Griet, Kwaaitjie Kabouter en haar vyande, die Gifappeltjies.

Die minister van justisie, Jeff Radebe, het die name van 42 veroordeelde bedrieërs bekend gemaak. Die besluit om die name bekend te maak, is geneem omdat groot bedrae geld betrokke was en ook om ander wat swendelary oorweeg, af te skrik. Die identiteitnommers en vonnisse van regeringsamptenare en ander individue wat bedrog gepleeg het by regeringsdepartemente, organisasies en munisipaliteite is ook bekend gemaak. Daar sal na verwagting later nog 'n lys met sowat 3,000 name bekend gemaak word.

Noord-Korea se aanbod aan Suid-Korea om te onderhandel oor verskeie knelpunte beteken nie juis veel nie. So sê een van Suid-Afrika se voorste kenners van die streek, dr. Martin Davis. Alhoewel veral Noord-Korea se buurlande opgewonde is oor die vooruitsigte van samesprekings tussen die twee Koreas, wat sedert Maart 2010 geen amptelike kontak het nie, maan Davis dat die Noord-Koreane besig is met 'n manipulerende spel.

Volgens 'n verslag van die Verenigde Nasies se omgewingsprogramme word daar wêreldwyd elke jaar sowat 1,3 miljard ton kos vermors. Dit terwyl 870 miljoen mense van die wêreld se bevolking van sewe miljard ondervoed is. Die VN sê die vermorsing van kos het 'n groot invloed op voedselsekerheid vir toekomstige generasies.

Die premier van die Wes-Kaap, Helen Zille, sê die ANC probeer om die provinsie onregeerbaar te maak. Sy het verwys na twee afsonderlike voorvalle gister waarin sy en die Kaapstad se burgemeester, Patricia de Lille, betrokke was. Eers is menslike ontlasting in Khayelitsha na 'n bus gegooi waarin Zille gery het. 'n Paar ure later is De Lille weggejaag van 'n openbare vergadering in Phillipi. De Lille het die ANC-jeugliga hiervoor blameer.

Die ANC ontken dat sy lede betrokke was by voorvalle waarby die Wes-Kaapse premier, Helen Zille, en die Kaapse burgemeester, Patricia de Lille, betrokke was. Eers is menslike ontlasting in Khayelitsha teen 'n bus gegooi waarin Zille gery het. 'n Paar uur later is De Lille weggejaag van 'n openbare vergadering in Phillipi. 'n ANC-woordvoerder, Phillip Dexter, sê die party sal dit nie duld as sy lede betrokke was, by wat hy as laakbare gedrag beskryf het nie.