Die gevierde Afrikaanse digter en dramaturg, Adam Small, het gisteraand die Suid-Afrikaanse Akademie vir Wetenskap en Kuns se hoogste toekenning, die Hertzogprys, in Stellenbosch ontvang. Die prys is vir al sy werk toegeken. Die Hertzogprys word gewoonlik toegeken aan 'n skrywer wat in die laaste drie jaar nuwe en substansiële werk gepubliseer het. Small se laaste toneelstuk is in die jare tagtig gepubliseer. Hy kon weens swak gesondheid nie self die prys in ontvangs neem nie.

Suid-Afrika het in die jongste Mededingendheidsopname van die Wêreld Ekonomiese Forum skerp uiteenlopende vlakke van welslae behaal. Die land vaar of baie goed of uiters vrot. Die goeie nuus: die land is volgens dié opname die heel beste wat die regulering van sy aandele- en ander sekuriteitebeurse betref. Eerste wat die gehalte van sy ouditering en verslagdoening betref. Eerste wat die doeltreffendheid van sy korporatiewe direksies betref. Eerste wat die Wetlike Regte-Indeks betref. Tweede wat die veiligheid van sy banke betref. Tweede en derde wat 'n rits ander finansiële maatstawwe betref. Maar DAN: 140ste met die gehalte van sy onderwysstelsel; 143ste met die gehalte van sy wiskunde- en wetenskaponderwys; 132ste met die gehalte van primêre onderwys. Cobus Bester praat hieroor met prof. Saartjie Gravett van die Universiteit van Johannesburg se Departement Opvoedkunde.

Toetse deur die maatskappy Drug Detection International, het bevind dat Coca-tea wél die dwelmmiddel kokaïene bevat. Dié produk, wat by Dischem verkoop is, is van die winkelrakke verwyder as 'n voorsorgmaatreël.

Die polisie in Brits in Noordwes sal vandag bewysstukke van 'n vermeende kinderpornografienetwerk in hul omgewing ontvang nadat 'n liefdadigheidswerker al langer as 'n maand probeer om dit vir hulle te gee. Die liefdadigheidswerker, Mike Cronje, het op die netwerk wat glo onwelvoeglike halfkaal foto's van meisies so jonk as 13 vervaardig en versprei, afgekom toe hy gehelp het om 'n dogtertjie te soek wat in Augustus weggeraak het. Hy het sonder sukses glo vir meer as 'n maand probeer om die polisie te kry om die bewysstukke by hom te neem. Een man is reeds van ontvoering en die besit van kinderpornografie aangekla, maar die ander verdagtes is steeds op vrye voet en is glo besig om getuienis te vernietig.

Die regering se besluit om die moratorium op gas-eksplorasie en ontginning in die Karoo op te hef, het die omstredenheid oor die kwessie van voor af laat opvlam. Beskuldigings word nou gemaak dat die regering se besluit voortydig is, dat 'n klomp mense wat regstreekse belang by die saak het geensins geraadpleeg is nie en dat die negatiewe ervaring met die hidro-brekingsmetode elders in die wêreld nie voldoende in ag geneem is nie. Ons het wel 'n kenner wat ten gunste van hidrobreking is, genooi om aan vanoggend se gesprek deel te neem, maar hy het vanoggend laat weet hy kan dit nie bybring nie. Ons sal wel probeer om môre die ander kant ook te stel, maar vanoggend praat ons met Prof. Gerrit van Tonder van die Instituut vir Grondwaterstudies aan die Universiteit van die Vrystaat.

Die 68-jarige komponis, musikant en sanger Louis van Rensburg is gister in Johannesburg aan 'n longkwaal oorlede. Een van sy jarelange vriende, die sanger en liedjieskrywer, Jannie du Toit, sê Van Rensburg sal veral onthou word vir die komposisies wat hy vir dramareekse soos Arende geskryf het.

Die Suid-Afrikaanse Lugdiens het mense onlangs warm onder die kraag gehad weens omstredenheid met werksaansoeke deur wittes. Nou gons dit weer op sosiale netwerke oor die kettingwinkel Woolworths wat in sy advertensies vir die werwing van nuwe personeel nie wittes insluit nie. Sommige mense op die netwerke het Woolworths daarvan beskuldig dat die maatskappy rassisties is. Maar Woolworths het hierdie aantygings weerlê. Intussen het die vakbond Solidariteit bekend gemaak dat hy vandag 12:00 met 'n openbare veldtog teen Woolworths begin indien die groep nie advertensies vir poste, waarvoor slegs swart kandidate oorweeg sal word, terugtrek nie. Solidariteit sê die veldtog sal grootliks op sosiale media gevoer word. Jean Esterhuizen doen verslag.

Alle onderwysstelsels in die wêreld is onder geweldige druk en verandering vind nie maklik plaas nie. Suid Afrika is geen uitsondering nie en is selfs in baie gevalle beter daaraan toe as vele ander lande. Dis die mening van die algemene sekretaris van Educational International, Fred Leeuwen, wat 'n gasspreker was by die jaarlikse SAOU simposium vir skoolhoofde in Port Elizabeth. Veronica Fourie doen verslag.

Met doofheidbewustheidsweek fokus ons vanoggend op die debat in die dowegemeenskap tussen die voorstanders van liplees en die voorstanders van gebaretaal. 'n Menslike Hulpbronbestuurder van Bloemfontein, Bobby van Essen, sê hy is al so gewoond aan sy vrou se gehoorgestremdheid, dis eintlik vir hom normaal. Sy vrou, Astrid, liplees en gebruik glad nie gebaretaal om te kommunikeer nie. Van Essen sê hy het Astrid meer as 20 jaar gelede ontmoet terwyl hulle op hoërskool was.

Die Amerikaanse ruimtevaarder, Neil Armstrong, se dood is as 'n groot verlies vir ruimtewetenskap en verkenning beskryf. Armstrong het op 82-jarige ouderdom van komplikasies weens kardiovaskulêre chirurgie gesterf. Sy voormalige bemanningslid, Buzz Aldrin, sê dis hartseer dat al drie ruimtevaarders nie met die vyftigste herdenking van die maanlanding daar sal wees nie.