'n Span Suid-Afrikaanse fisici was betrokke by die deurbraak deur die Europese Organisasie vir Kernnavorsing in Geneve. Professor Simon Connell van die Universiteit van Johannesburg is een van die span wat gehelp het om die Higgs Boson, ook bekend as die Godpartikel, te vind. Die deeltjie verklaar basies hoekom die heelal massa het. 'n Woordvoerder by Cern, Joe Incandela, het gister vanuit Geneve gesê die uitslag is wetenskaplik gefundeer en akkuraat, maar steeds nie 100-persent seker nie. Anita Visser praat hieroor met prof. Connell.

Die driejarige brandslagoffer, Pippie Kruger, wat bykans sewe maande in die Garden City hospitaal in Johannesburg deurgebring het, word vandag na 'n rehabilitasie-hospitaal verskuif. Pippie het erg gebrand toe vuurmaakjel ontplof het. Die bestuurder van die Netcare Rehabilitasiesentrum in Auckland Park in Johannesburg, Marietha van Vuuren, het aan Valda Jansen gesê brandslagoffers ontvang intensiewe terapie wat deur 'n span kundiges verskaf word.

Die kwesbaarste deel van die bevolking, die armes, lei die swaarste wanneer kos sonder enige aankondiging, van die mark onttrek word. Dit is die mening van die hoof van die Kosveiligheidsinisiatief van die Verbruikersraad, Ronel Burger. Elvis Presslin praat met haar hieroor.

Die druk wat 'n groep van 30 Suid-Koreaanse evolusionêre wetenskaplikes en paleontoloë op die land se onderwysowerhede uitgeoefen het, het nou daartoe gelei dat die besluit om alle verwysings na voorbeelde van evolusie uit skoolhandboeke te verwyder, hersien gaan word. Anita Visser praat hieroor met Monitor se wetenskapkorrespondent, dr. George Claassen.

Die Egiptiese Verkiesingskomitee het Mohamed Morsy van die Moslem Broederskap as die eerste demokratiese president verklaar. Hy het die voormalige generaal, Ahmed Shafic, met 51,7 % van die stemme gewen. Hy volg Hosni Moeburak op wat 16 maande gelede omver gewerp is in 'n populistiese opstand. Die militêre raad wat die land daarna beheer het, het dié maand die magte van die Presidensie ingeperk. Dit beteken dat die staatshoof nou met die weermag moet saam werk. Morsy is 'n ingenieur wat in die VSA opgelei is en was in die tronk tydens Moebarak se regering. 'n Onafhanklike risiko-ontleder gesetel in Nederland, Heinrich Matthee, sê dié oorwinning is 'n teken van die vooruitgang van die Islamiste.

Alle oë is vandeesweek gerig op die ANC se belangrike beleidskonferensie in Midrand in die aanloop tot die party se Mangaung-konferensie in Desember. Uitlatings deur die adjunkpresident van die ANC-jeugliga dat grondonteiening sonder vergoeding 'n uitgemaakte saak is, het die afgelope week hewig reaksie ontlok. Die sogenaamde tweede oorgang, soos president Zuma dit noem, is deel van die ANC se besprekingsdokumente. Aspekte soos armoede, werkskepping en die omstrede grondkwessie sal hoog op die agenda wees. Volgens prof. Ben Cousens van Plaas (Poverty, Land and Agrarian Studies) verbonde aan die Universiteit van die Wes-Kaap, het die grondkwessie vir die meerderheid Suid-Afrikaners 'n simboliese politieke betekenis.

Die ANC se voorgestelde tweede oorgang word reeds druk bespreek en selfs op leierskapsvlak is daar verskillende standpunte oor die kwessie. Die voorstelle behels omvattende veranderinge ten einde die uitdagings van werkloosheid, ongelykheid en armoede te kan oplos. Die Tweede oorgang sal volgende week by die ANC se nasionale beleidskonferensie in Midrand, Gauteng, bespreek word. Maar sommige ANC-lede soos adjunkpresident Kgalema Motlanthe het 'n ander mening. Cobus Bester praat hieroor met twee ontleders, prof. Willie Breytenbach van die Universiteit van Stellenbosch en prof. Dirk Kotzé van Unisa.

Wetenskaplikes in die Wes-Kaap is in 'n heftige debat gewikkel oor die streek se fynbos en bosboubedrywighede. Die een skool wil dit hê dat bosbou, soos dit tans toegepas word, skadelik is vir die Kaap se unieke fynboskoninkryk. Bosbouwetenskaplikes sê, aikôna, kry julle feite reg, ons maak 'n positiewe bydrae, ook tot die ekonomie. Cobus Bester praat hieroor met die president van die Bosbou-instituut, dr. Ben du Toit, en met die WNNR se hoofekoloog, dr. Brian van Wilgen.

Die Internasionale Unie vir Natuurbewaring waarsku in die jongste opdatering van sy sogenaamde Rooidatalys dat die wêreld se voedselsekuriteit besig is om stadig maar seker agteruit te gaan. Drie voëls wat in die land voorkom se status is negatief aangepas tot bedreig. Dit is die witrugaasvoël, die mahem of gekroonde kraanvoël en die kroonarend. Cobus Bester praat hieroor met twee kundiges, die entomoloog of insekkundige, prof. Erik Holm en die Oppenheimer Genoot by Birdlife Suid-Afrika, dr. Hanneline Smit.

Die drie-jarige Pippie Kruger se veloorplantingsoperasie was 'n sukses. Spesiale gekloonde vel is verlede Maandag van Amerika af na Johannesburg gebring en in die Garden City kliniek op haar oorgeplant. Die verbande is gisteraand afgehaal en die nuwe vel het goed geheg.