Die Gautengse onderwysdepartement wil hê ses Afrikaanse skole in Johannesburg moet elkeen volgende jaar twee bykomende Engelse klasse akkommodeer. Die skole wat verlede week deur 'n distriksbestuurder oor dié besluit ingelig is, is die hoërskole Randburg en Linden en die laerskole Fountainebleau, Unika, Louw Geldenhuys en Fairland. Maar die skole meen almal hulle is vol en voorsien ook dat hulle in die afsienbare toekoms onder groot druk gaan wees om selfs Afrikaanssprekende leerlinge te akkommodeer. Cobus Bester praat hieroor met die uitvoerende hoof van die Federasie van Beheerliggame van Suid-Afrikaanse Skole, Paul Colditz.

Turkye is besig om homself as 'n streeksmoondheid en selfs 'n wêreldmoondheid te posisioneer. So het die politieke redakteur, Jan-Jan Joubert, gister in Beeld berig. Die land is ook in die kollig met adjunkpresident Kgalema Motlanthe wat later vandag na Turkye vertrek op 'n ampsbesoek. Cobus Bester praat hieroor met Jan-Jan en Anita Visser wat drie weke gelede saam met 270 ander Afrika-joernaliste na Turkye genooi is .

Suid-Afrika het 'n hoë egskeidingsyfer en dit lei tot hofsake oor wie toesig oor die kinders moet kry - gewoonlik die moeder en nie die pa nie. Wessel Snyman van Pretoria is vervreem van sy vrou en sien sy kind net vier keer 'n maand nadat sy vrou toesig gekry het. Snyman sê die hof is nie altyd aan die pa se kant nie. Hy sê die regters maak besluite gebaseer op verklarings en kom nie na die ouers se huise toe voordat hulle 'n besluit maak nie.

Die bohaai wat oor die omstrede Spear of the Nation-skildery losgebars het, het al wat mens is weer laat gryp na die Grondwet, ander wetgewing en die massas het ook die strate ingevaar. Maar luister 'n mens na die redenasies deur verkillende partye vanoor die politieke spektrum, staan dit ook duidelik uit: daar is dalk meer vrae as wat daar grondige kennis is. Mense se optrede word in baie gevalle gedryf deur 'n bepaalde politieke of kulturele siening en word dikwels ook gebaseer op 'n skrapse kennis van die wetgewing wat sulke sake reguleer. Uiteindelik ook: weeg een reg swaarder as 'n ander? Die reg van vrye spraak, by voorbeeld teenoor die reg op menswaardigheid, privaatheid? Ons praat vanoggend met twee mense wat op uiteenlopende maniere al jare met die sake en vrae moes worstel. Die een is die joernalis en oud-koerantredakteur, Max du Preez en die ander gas vanmôre is Prof. Kobus van Roooyen, Voorsitter van die Appelraad oor Publikasies van 1980-90 en ook Voorsitter van die Taakgroep wat die nuwe Wet op Publikasies geskryf het.

Die man wat daarvan beskuldig word dat hy sy nege-jarige stiefdogter vermoor en haar lyk in 'n vrieskas weggesteek het, het in die hof by die Pretoria Sentraal gevangenis verskyn. Daniella Gaysma van Eersterust, oos van die stad, het Saterdagmiddag vermis geraak. Die polisie was besig om 'n foto van haar te versprei, toe haar lyk in 'n vrieskas in die gesinswoning gevind is.

Die saak teen twee mans wat daarvan aangekla word dat hulle 'n skildery van President Zuma beskadig het, is tot 28 Junie uitgestel. Die hofsaak sal in die Hillbrow Landdroshof in Johannesburg plaasvind. 'n Johannesburgse sakeman, Barend le Grange, en 'n taxibestuurder van Limpopo, Lowie Mabokela, word daarvan aangekla dat hulle die kunswerk, wat Zuma se geslagsdele vertoon, in die Goodman-galery in Rosebank geskend het.

Een van die mans wat teregstaan weens die beskadiging van Brett Murray se omstrede skildery van president Jacob Zuma sê hy het dit gedoen omdat nasiebou belangriker is as kuns. Die 58-jarige Barend le Grange is Dinsdag saam met sy medebeskuldigde, Lowie Mabokela, in hegtenis geneem nadat hulle die portret met onderskeidelik rooi en swart verf toegetakel het. Le Grange, 'n sakeman van Gauteng, sê hy het nie 'n probleem met die kunswerk opsig self nie, maar dat hy gevoel het dit is besig om 'n verdelende invloed in die land te hê.

Sogenaamde lewenseinde-besluite bly 'n omstrede, sensitiewe saak vir baie. Daar was uiteenlopende reaksie op die onlangse geval waar die Kaapstadse professor Sean Davison huisaanhouding in Nieu-Seeland moes uitdien nadat hy erken het dat hy sy terminaal-sieke moeder, 'n mediese dokter, op haar versoek gehelp het om te sterf. Dis 'n optrede wat onmiddellik lei tot allerhande debatte en vrae, alles afhangende van mense se eie geloofsoortuigings en dikwels ook hulle onkunde oor wat alles betrokke is. Die organisasie Dignity SA beywer hom vir ondermeer groter seggenskap deur sterwendes in hoe hulle hulle einde tegemoetgaan. 'n Medestigter van Dignity SA is die Uitvoerende Direkteur van die Etiekinstituut, dr. Willem Landman. Hy praat hieroor met Cobus Bester.

Vandag is die Internasionale Dag Teen Homofobie. Homofobie se definisie loop wyd, maar kom neer op 'n wye reeks negatiewe houdings en gevoelens jeens homoseksualiteit of mense wat homoseksueel is of so verdink word. In baie lande word dit vandag gelyk gestel aan rassisme, antisemitisme en enige ander vorm van vooroordeel wat daarop gemik is om mense se menslikheid te ontken. Cobus Bester praat hieroor met die entrepreneur en rubriekskrywer, Chrisjan Fourie.

Baie kinders kan nie presies sê wat die woord TROETEL beteken nie, maar dit laat hulle aan liefde dink. Dit is volgens die meestersverhandeling van Gerda Simpson van Stellenbosch. Sy het op 82 haar MPhil-graad in Leksikografie aan die Universiteit van Stellenbosch verwerf. Simpson sê toe sy op 78 afgetree het as ontvangsdame van haar seun, dr. Andre Simpson, se mediese praktyk, het sy besef dat sy nie net kan stilsit nie, en besluit om weer te studeer. Sy sê haar tesis se tema, TROETELTAAL, was nie beplan nie.