Gia è puspè in onn passà. Per «Noss Chors» in onn cun festas, festivals, concerts ed ina u l'autra nova. Cun quest'emissiun faschain nus in pitschensguard enavos sin l'onn 2019. «Noss Chors» han chantà, fatg festa ed in u l'auter ha era registrà novas chanzuns. Saja quai stà a la festa da chant ceciliana a Sedrun, tar l'emprim Festival da la chanzun rumantscha a Trun u tar la Concurrenza dals chors giuvenils a Glion – era quest onn è il program stà vast. Trais chors grischuns han registrà il 2019 in album: Il Chor da giuvenils grischun (Bufatg), il chor maschadà da seniors grischun Canziano (Miar singed mitenand) ed il Cor viril Alpina Val Müstair (Regordanzas). Era dad els savain nus tadlar ina u l'autra chanzun durant quest'emissiun.

Redacziun: Dominic Pohle

Chant e musica per la festa da Nadal. Nadal en vitg e val – chors rumantschs dechantan la vegnida dal Messias. L'emissiun «Noss chors» porta bels chants da Nadal en ils divers idioms rumantschs: La notg da Nadal, Da Nadalnotg en sogn ruaus, Tedlei o fideivels, Nadal-Nadal, Gesu, tü meis Signur, Glisch nuviala, O stalla ventireivla, Chanzun da Nadal, Misteri da Nadal e sa chapescha Clara notg da Nadal. Munids vegnan quels chants cun musica dal baroc talian: Corelli, Torelli e Manfredini èn ils cumponists.

Gia è la terza dumengia d'advent vargada. L'entir conturn è decorà e las chandailas sin il tschupè traglischan. Da «Noss Chors» dat quai anc la dretga musica per vegnir en l'atmosfera da Nadal. Il temp d'advent duess esser in temp da ruaus e reflexiun, il temp da preparaziun per Nadal. «Noss Chors» chantan oz per vus insaquantas chanzuns da Nadal per stgaffir in'atmosfera ruassaivla e paschaivla. Emblidai per quell'ura tut ils regals n'anc betg cumprads e las decoraziuns n'anc betg plazzadas. Giudai e ruassai.

14 chanzuns, chantadas dals 25 chantadurs dal chor viril Alpina Val Müstair – quai è il novischem disc cun chanzuns rumantschas, talianas e tudestgas. Il nov disc dal chor viril Alpina da la Val Müstair duai oravant tut mantegnair e conservar las chanzuns dal chor e reflectar la val. Perquai cuntegna il disc chanzuns rumantschas e talianas, dentant era chanzuns tipicas per la Val Müstair sco «Il clucher da Sta. Maria». Durant quest'emissiun preschentan «Noss Chors» insaquantas da las chanzuns dal disc nov ed il dirigent Gervas Rodigari raquinta da ses chor e da sias experientschas.

Ils culms tutgan tar il Grischun sco la mar tar la Caribica – senza na san ins betg s'imaginar ella. La stad van blers en la muntogna a viandar e l'enviern sin pista. Sch'ins ha cuntanschì la tschima san ins esser losch e survegn sco remuneraziun in panorama ed in'atmosfera tut speziala. Per in curt mument pon ins sa sentir sco la regina u il retg dal mund. Da quell'atmosfera e quels sentiments chantan oz «Noss Chors».

Cun il november è arrivada la naiv e perquai derasan «Noss Chors» oz atmosfera denviern. Ils emprims segns denviern èn arrivads – en differents lieus hai gia dà quantitads da naiv da record. Perquai derasan «Noss Chors» oz cun chanzuns denviern l'endretga luna per la stagiun alva e mainan Vus per in mument en in mund plain naiv.

Redacziun: Gion Dominic Pohle

L'atun è il temp che tut vegn pli quiet. La natira sa prepara per l'enviern durant ch'ils dis daventan pli curts. Per accumpagnar quest temp chantan «Noss Chors» oz tocs ruassaivels. Ils dis vegnan pli curts e tut enturn ins daventa in pau pli ruassaivel. Igl è il temp da las davosas racoltas ed il temp che la muaglia banduna cun lur pasturs l'alp. Ina stagiun fitg bella e contemplativa. Perquai chantan «Noss Chors» en l'emissiun dad oz tocs ruassaivels, paschaivels u meditativs.

La saira è tar ils blers la lavur vargada, ins ha temp da star patgific e giudair la cumpagnia dals chars u po sa deditgar ad in hobi. «Noss Chors» chantan perquai oz da la saira, da la notg e las stailas. Pli manaivel che l'enviern vegn e pli baud ch'i vegn stgir la saira. Las chasas èn illuminadas e la glieud è endadens e giauda il chaud. Mo pli paucs èn sin via per contemplar il lieu transfurmà entras l'atmosfera da la saira. Da quell'atmosfera chantan oz «Noss Chors».

Redacziun: Dominic Pohle

Chanzuns da chors cun ina massa schlantsch e ritmus cumbinà cun chanzuns pli ruassaivlas. «Noss Chors» dattan ina giada in sguard sin chanzuns cristianas afroamericanas. Chors cun resti da tuttas colurs che sautan en il ritmus durant ch'i chantan – quai è gospel. A l'entschatta dal 20avel tschientaner è quai gener sa sviluppa en l'America ord il Negro Spiritual cun influenzas dal Blues e dal Jazz. Il Negro Spiritual è in chant che deriva oriundamain dals sclavs dal 17avel tschientaner. Quellas chanzuns raquintan savens da la vita dals sclavs, da speranza e da la cardientscha en Dieu.

La baselgia catolica festivescha l'entschatta da november Numnasontga ed ils dis da las olmas. Durant quels dus dis vegn sa regurdà dals sontgs e defuncts cun far uraziun e cun rugar per els. L'entschatta da november sa regorda la baselgia catolica da ses sontgs e defuncts. L'emprim da november celebrescha ella tut ils sontgs. Perquai ch'i na dat betg avunda dis durant l'onn per mintga sontg vegnan els onurads tuts per la festa da Numnasontga. Ils dus da november, il di da las olmas, sa regordan ils catolics da lur defuncts. «Noss Chors» chantan oz chanzuns en memoria da tut ils sontgs e da las olmas.