نیوز بلیٹن - وائس آف امریکہ

طالبان کے قائم مقام وزیر خارجہ مولوی امیر خان متقی کی قیادت میں ایک وفد نے بدھ کو امریکی سفیروں اور یورپی ممالک کے خصوصی نمائندوں سے افغانستان کی صورت حال پر تبادلہ خیال کیا؛ امریکی وزیرِ خارجہ اینٹنی بلنکن نے افغانستان سے امریکی فوج کے انخلا کے تفصیلی جائزے کا حکم دیا ہے؛ اقوام متحدہ کی ایجنسی برائے مہاجرین نے پاکستان کی جانب سے افغانستان کے لئے سرحدی پابندیاں نرم کرنے کا خیر مقدم کیا ہے؛ پنجاب اسمبلی نے نکاح نامے میں ختمِ نبوت کا خانہ ڈالنے کی قرارداد منظور کی ہے اور ایران نے کہا کہ وہ اپنے جوہری پروگرام پر عالمی طاقتوں کے ساتھ بات چیت نومبر کے آخر تک دوبارہ شروع کرے گا۔ مزید خبریں دیکھیئے اور سنئے وائس آف امریکہ اردو کی ویب سائٹ اور سوشل میڈیا پلیٹ فارمز پر۔

سعودی عرب نے پاکستان کو تین ارب ڈالر ادھار دیے ہیں اور مؤخر ادائیگیوں پر ایک ارب 50 کروڑ ڈالر تک مالیت کا تیل بھی فراہم کیا جائے گا؛ تہران میں آج افغانستان کے بارے میں مذاکرات ہو رہے؛ خیبرپختونخوا کے تین مختلف جنوبی اضلاع میں میں تشدد اور دہشت گردی کے واقعات میں مجموعی طور پر چھ سیکورٹی اہل کاروں سمیت سات افراد ہلاک ہو گئے ہیں؛ امریکی صدر جو بائیڈن نے منگل کو 10 رکنی بلاک آسیان کے سالانہ اجلاس میں ورچؤئل شرکت کر کے اس تنظیم سے اپنے ملک کے تعلقات کو دوبارہ شروع کیا اور جاپانی شہزادی ماکو نے منگل کو روایتی شادی کی تقریبات کے بغیر خاموشی سے ایک عام آدمی سے شادی کا بندھن باندھ لیا۔

پاکستان کے وزیر اعظم عمران خان اور چین کے صدر شی جن پنگ کے درمیان منگل کو ٹیلی فون پر ہونے والی بات چیت میں دونوں رہنماؤں نے اسلام آباد اور بیجنگ باہمی تعلقات کو مزید مستحکم بنانے پر اتفاق کیا ہے؛ وزیرِ اعظم عمران خان نے پاکستان کے اہم ترین خفیہ ادارے آئی ایس آئی کے نئے سربراہ کے تقرر کی منظوری دے دی ہے؛ طالبان کے دفتر خارجہ کے ترجمان عبدالقہار بلخی نے پیر کو کہا ہے کہ حکومت افغانستان اور عوامی جمہوریہ چین کے اعلیٰ حکام دوحہ میں دو روزہ اہم مذاکرات کر رہے ہیں؛ سوڈانی فوج کے لیفٹینینٹ جنرل عبدل فتح البرہان نے مشترکہ سول ملٹری کونسل کو معزول کرکے ملک میں ہنگامی حالت کا اعلان کر دیا ہے اور ٹی ٹوئنٹی ورلڈ کپ میں آج پاکستان اور نیوزی لینڈ کی ٹیمیں شارجہ آمنے سامنے ہیں۔

پاکستان کے وفاقی وزیر برائے منصوبہ بندی اسد عمر نے کہا ہے کہ سی پیک منصوبے پر تیزی سے کام جاری ہے، اور یہ تاثر درست نہیں کہ کام رک گیا ہے یا سست روی کا شکار ہے؛ پاکستان کے صوبے بلوچستان کے وزیرِ اعلیٰ جام کمال خان اتوار کو اپنے عہدے سے مستعفی ہو گئے ہیں؛ طالبان حکام کا کہنا ہے کہ افغانستان کے بارے میں پڑوسی ممالک کے وزرائے خارجہ کے ایران میں ہونے والے اجلاس میں ان کی حکومت کا کوئی بھی عہدیدار شرکت نہیں کرے گا؛ افغان مقامی میڈیا نے رپورٹ کیا ہے کہ یورپی یونین ایک ماہ کے اندر کابل میں اپنا سفارتی مشن دوبارہ کھولنے کا ارادہ رکھتی ہے؛ سوڈان میں فوجی بغاوت، لیفٹینینٹ جنرل عبدل فتح ال برہان نے ہنگامی حالت کا اعلان کر دیا اور پاکستان نے ٹی ٹوئنٹی ورلڈ کپ کے اپنے افتتاحی میچ میں بھارت کو 10 وکٹوں سے شکست دے کر نئی تاریخ رقم کر دی ہے۔

پاکستان نے افغانستان کے ساتھ سرحدی نقل و حرکت کو آسان بنانے کے لیے گیٹ پاس کی شرط ختم کر دی ہے؛ وزیرِ خارجہ شاہ محمود نے بھارت کی طرف سے افغانستان پر بلائی جانے والی کانفرنس کا دعوت نامہ موصول ہونے کی تصدیق کی ہے؛ صدر جو بائیڈن نے قانون سازی کی اپنی ترجیحات کو ووٹنگ کے حقوق، پولیس اصلاحات اور آب و ہوا کی تبدیلی اور نسلی انصاف سے منسلک کر دیا ہے؛ عالمی تنظیم فنانشل ایکشن ٹاسک فورس 'ایف اے ٹی ایف' نے پاکستان کو گرے لسٹ میں برقرار رکھنے کا فیصلہ کیا ہے؛ پاکستان کا کہنا ہے ملک میں رواں سال اب تک پولیو وائرس کا صرف ایک کیس سامنے آیا ہے اور بھارت اور نیپال میں سیلاب اور لینڈ سلائیڈنگ سے تقریباً دو سو افراد ہلاک ہو گئے ہیں۔

پاکستان کے وزیر خارجہ شاہ محمود قریشی ایک اعلیٰ سطحی وفد کے ساتھ افغانستان کے ایک روزہ دورے پر کابل میں ہیں؛ افغانستان پر ماسکو میں ہونے والی کانفرنس سے علیحدہ ایک چار فریقی ملاقات ہوئی جس میں روس، چین اور پاکستان کے ساتھ طالبان کے ایک وفد نے نائب وزیر اعظم مولوی عبدالسلام حنفی کی قیادت میں گفتگو کی؛ نئی دہلی میں اگلے ماہ افغانستان کی صورت حال پر ایک اجلاس منعقد ہونے کا امکان ہے اور خیبر پختونخوا میں سیکیورٹی فورسز نے ایک کاروائی میں داعش خراسان سے منسلک تین مبینہ دہشتگردوں کو ہلاک کرنے کا دعوٰی کیا ہے، جب کہ دہشت گردوں کے دو حملوں میں پانچ سیکیورٹی اہل کار مارے گئے۔

طالبان حکومت اور تقریباً گیارہ ملکوں کے نمائندے آج بدھ کو افغانستان کی صورت حال پر ماسکو میں اجلاس کر رہے ہیں؛ بین الاقوامی مالیاتی فنڈ نے منگل کے روز اپنی رپورٹ میں کہا ہے کہ اس سال افغانستان کی معیشت میں 30 فی صد تک سکڑ جائے گی؛ دہشت گرد تنظیموں کی مالی معاونت کے تدارک کے لیے قائم فنانشل ایکشن ٹاسک فورس کا اجلاس پیرس میں جاری ہے جس میں پاکستان کی کارکردگی کا جائزہ لے کر اس کی گرے لسٹ میں موجودگی کے متعلق فیصلہ کیا جائے گا اور امریکہ کے صدر جو بائیڈن نے کئی اہم عہدوں کے لیے نامزدگیوں کا اعلان کیا ہے جن میں پاکستان کے لیے سفیر کی نامزدگی بھی شامل ہے۔

طالبان اسلامی امارات کا ایک وفد، نائب وزیر اعظم عبدالاسلام حنفی کی قیادت میں ماسکو میں افغانستان پر ہونی والی کانفرنس میں شرکت کرے گا؛ امریکی نمائندہ خصوصی برائے افغان مفاہمت، زلمے خلیل زاد نے پیر کے روز اپنا عہدہ چھوڑ دیا، ان کی جگہ یہ عہدہ تھامس ویسٹ سنبھالیں گے؛ جنوبی کوریا کی فوج کا کہنا ہے کہ شمالی کوریا نے منگل کو ایک آبدوز سے بیلسٹک میزائل کا تجربہ کیا؛ عراق کا کہنا ہے کہ اس نے بغداد کے ایک شاپنگ سینٹر میں 2016 کے مہلک بم دھماکے کی سازش تیار کرنے والے کو حراست میں لیا ہے اور چین کے تین خلاباز ہفتے کے روز چین کے نئے خلائی اسٹیشن پر کامیابی سے پہنچ گئے ہیں۔

افغانستان چیمبر آف ٹریڈ اینڈ انویسٹمنٹ کے عہدیداروں کا کہنا ہے کہ طورخم بارڈر کراسنگ پوائنٹ اتوار کو افغانستان اور پاکستان کے درمیان تجارت کے لیے دوبارہ کھول دیا گیا ہے؛ افغانستان کی صورت حال پر بات چیت کے لیے ماسکو کانفرنس 19 اکتوبر کو روس میں ہورہی ہے؛ صوبہ بلوچستان کے مرکزی شہر کوئٹہ میں ایک بم دھماکے میں ایک پولیس اہل کار ہلاک جب کہ عام شہریوں سمیت 17 افراد زخمی ہوگئے ہیں؛ ہیٹی میں پولیس نے ایک بدنام زمانہ گینگ پرامریکہ میں قائم ایک تنظیم کے 17 مشنریوں کے اغوا کا الزام لگایا ہے؛ امریکہ کے پہلے سیاہ فام امریکی وزیر خارجہ اور اعلیٰ فوجی افسر کولن پاول، آج پیر کے روز، کووڈ نائینٹین کی وجہ سے انتقال کر گئے ہیں۔

افغانستان کے جنوبی شہر قندھار میں جمعہ کی نماز کے دوران ایک شیعہ مسجد میں بم دھماکہ ہوا ، جس میں درجنوں نمازی ہلاک یا زخمی ہوئے ہیں؛ افغانستان کے صوبے غور سے تعلق رکھنے والے سابق سینیٹر احمد خان کو ان کے بھتیجے کے ساتھ قتل کر دیا گیا؛ ترکی کے وزیر خارجہ نے جمعرات کے روز طالبان حکومت کے اعلیٰ سطحی وفد سے ملاقات کی؛ لبنان کے دارالحکومت بیروت میں گزشتہ سال بندرگاہ پر ہلاکت خیز دھماکے کی تحقیقات کرنے والے جج کے خلاف احتجاج کے دوران کم از کم چھ افراد ہلاک اور 20 زخمی ہو گئے اور نائیجیریا کے فوجی سربراہ کا کہنا ہے کہ اسلامک اسٹیٹ سے منسلک گروپ کا ایک لیڈر مارا گیا ہے۔