نیوز بلیٹن - وائس آف امریکہ

امریکہ کی سینیٹ نے پیر کو حکومت کی جانب سے ہنگامی اخراجات اور قرضوں کی حد بڑھانے سے متعلق دو بلوں کو روک دیا ہے جس کے بعد وفاقی حکومت کو جزوی شٹ ڈاؤن کے خطرے کا سامنا ہے؛ چین میں تین سال سے روکے گئے امریکی شہریوں کی واپسی ہو گئی؛ طالبان، سابق شاہ محمد ظاہر شاہ کے دور کا آئین ملک میں نافذ کریں گے، سوائے ان شقوں کے جو اسلامی اصولوں کے مخالف ہوں گی اور برطانیہ میں پیٹرول بحران شدت اختیار کر گیا ہے جس کے بعد حکومت نے فوج کو ایندھن کی ترسیل کے لیے تیار رہنے کی ہدایت کر دی ہے۔

افغانستان میں طالبان حکومت نے اتوار کو غیر ملکی ایئرلائنز سے کابل کے لیے تجارتی پروازیں دوبارہ شروع کے لیے کہا ہے؛ پاکستان نے افغانستان سے تازہ پھلوں کی درآمد پر عائد 17 فیصد سیلز ٹیکس ختم کرنے کا اعلان کیا ہے؛ میڈیا رپورٹس کے مطابق پاکستان نے افغان طلباء کے لیے 100 وظائف اور افغانستان کو 10 کروڑ روپے کے امدادی سامان کی پیشکش کی ہے اور پیر کو برطانیہ کے کئی شہروں میں پیڑول پمپ تیل کی عدم دستیابی سے بند ہو گئے۔

امریکہ، جاپان، آسٹریلیا اور بھارت کے رہنما آج جمعہ کے روز واشنگٹن میں ملاقات کر رہے ہیں تاکہ خطے میں چین کی بڑھتی ہوئی طاقت کے پیش نظر انڈو پیسفک میں تعاون پر تبادلہ خیال کیا جا سکے؛ اقوام متحدہ کی جنرل اسمبلی کے سالانہ اجلاس میں عالمی رہنماؤں نے اپنی تقریروں میں آب و ہوا کی تبدیلی اور کرونا وائرس کے خطرے کے مسائل سے نمٹنے پر زور دیا؛ چین کے وزیر خارجہ نے جی 20 کے وزرائے خارجہ کے ورچوئل اجلاس میں افغانستان کی طالبان حکومت پر معاشی پابندیاں ختم کرنے پر زور دیا ہے؛ امریکی فوجی حکام کے مطابق افغانستان میں داعش خراساں گروپ کے دو ہزار کٹر جنگجو موجود ہیں اور اقوام متحدہ کے خصوصی تفتیش کار نے کہا ہے کہ میانمار کی فوجی حکومت کے اپنے عوام پر منظم مظالم انسانیت کے خلاف جرائم ہیں۔

امریکی صدر جو بائیڈن نے غریب ملکوں کے لیے کووڈ 19 کی ویکسین کی 50 کروڑ سے زیادہ خوراکیں خریدنے کا اعلان کیا ہے؛ افغانستان میں طالبان نے جمعرات کی صبح طورخم کی سرحدی گزرگاہ کو ہر قسم کی دو طرفہ آمد و رفت اور تجارت کے لئے بند کر دیا ہے؛ صوبہ پنج شیر سے تعلق رکھنے والے نورالدین عزیزی کو طالبان نے صنعت و تجارت کا قائم مقام وزیر مقرر کیا گیا ہے؛ عالمی ادارہ صحت نے خبردار کیا ہے کہ افغانستان میں صحت کی دیکھ بھال کا نظام تباہی کے دہانے پر پہنچ چکا ہے اور عالمی برادری کی فوری مدد کے بغیر وہاں انسانی تباہی کا سامنا ہو سکتا ہے اور چین کے صدر ژی جن پنگ نے اقوام متحدہ کی جنرل اسمبلی سے خطاب میں کہا ہے کہ وہ توانائی پیدا کرنے کے متبادل ذرائع کی فراہمی پر مدد کرے گا۔

امریکی صدر جو بائیڈن نے اقوام متحدہ کی جنرل اسمبلی کے سالانہ اجلاس میں خطاب کرتے ہوئے عالمی چیلنجوں کے حل کے لیے مل کر کام کرنے پر زور دیتے ہوئے کہا ہے کہ اس بات کی جتنی ضرورت آج ہے پہلے کبھی نہیں تھی؛ طالبان حکومت نے عالمی ادارے سے درخواست کی ہے کہ ان کے قائم مقام وزیرِ خارجہ کو جنرل اسمبلی سے خطاب کی اجازت دی جائے؛ پاکستان کے وفاقی وزیر اطلاعات فواد چوہدری نے دورہ نیوزی لینڈ اور انگلینڈ کی منسوخی پر دعویٰ کرتے ہوئے کہا ہے کہ اس کی وجہ بھارت میں بننے والے جعلی تھریٹس تھیں؛ کینیڈا کے وزیر اعظم جسٹن ٹروڈو کی پارٹی انتخابات میں واضح اکثریت حاصل نہیں کر سکی۔

افغانستان سول ایوی ایشن اتھارٹی نے پیر کے روز اعلان کیا کہ کابل بین الاقوامی ہوائی اڈہ ملکی اور بین الاقوامی پروازوں کے لیے تیار ہے؛ داعش خراساں گروپ نے گزشتہ 48 گھنٹوں میں جلال آباد میں طالبان جنگجوؤں کے خلاف سات حملوں کا دعویٰ کیا ہے؛ فرانس نے کہا ہے کہ امریکہ کے صدر جو بائیڈن اور فرانسیسی ہم منصب ایمانوئل میخواں آئندہ چند دنوں میں آسٹریلیا کی جانب سے پیرس کے ساتھ آبدوزوں کی خریداری کا معاہدہ ختم کرنے کے معاملے پر بات چیت کا ارادہ رکھتے ہیں؛ روس کی ایک یونیورسٹی میں ایک طالب علم نے پیر کے روز فائرنگ کی جس میں کم از کم آٹھ افراد ہلاک ہوئے؛ پاکستان کی حکومت نے پارلیمنٹ کے مشترکہ اجلاس میں انتخابی اصلاحات کے بل کو پاس کروانے کا فیصلہ کیا ہے۔

پاکستان کے دورے پر آئی نیوزی لینڈ کرکٹ ٹیم کے بورڈ نے میچ شروع ہونےکچھ گھنٹوں قبل اچانک سیکیورٹی خدشات کی بنا پر سیریز منسوخ کرنے کا اعلان کیا ہے؛ تاجکستان کے دار الحکومت دوشنبے میں منعقد ہونے والے شنگھائی تعاون تنظیم (ایس سی او) کے سربراہ اجلاس میں افغانستان اور دہشت گردی کا مسئلہ چھایا رہا اور بین الاقوامی مالیاتی فنڈ آئی ایم ایف کے عہدیداروں نے افغانستان میں بگڑتے ہوئے معاشی حالات پر تشویش کا اظہار کیا اور عالمی برادری پر زور دیا کہ وہ ملک میں ممکنہ انسانی بحران کو روکنے کے لیے فوری اقدامات کرے۔