نیوز بلیٹن - وائس آف امریکہ

امریکہ کے صدر جو بائیڈن نے دنیا کے امیر ترین 20 ملکوں کے سربراہان کے ساتھ افغانستان کے معاملے پر بات چیت کی ہے؛ روسی صدر ولادیمیر پوٹن نے بدھ کے روز روس کے زیر اثر کامن ویلتھ کی آزاد ریاستوں (CIS) کے انٹیلی جنس سربراہوں کے ساتھ ایک ورچوئل کانفرنس میں افغانستان سے شدت پسندی کے خطرے کے خلاف خبردار کیا ہے؛ پاکستان انٹرنیشنل ایئر لائن نے کابل کے لیے فضائی آپریشن معطل کردیا ہے اور ناروے میں ایک شخص نے تیر کمان سے حملہ کر کے پانچ افراد کو ہلاک اور دو کو زخمی کر دیا ہے۔

دنیا کی 20 بڑی معیشتوں کے سربراہان حکومت اور وزرائے خارجہ نے منگل کو ایک ویڈیو کانفرنس کے دوران افغانستان میں مزید سرمایہ فراہم کرنے پر اتقاق کیا؛ یورپی یونین نے افغانستان کو ایک بڑی انسانی اور سماجی و معاشی تباہی سے بچانے کے لیے ایک ارب 15 کروڑ ڈالر کے امدادی پیکیج کا اعلان کیا ہے؛ پاکستان کے وزیر اطلاعات و نشریات فواد چوہدری کا کہنا ہے کہ وزیراعظم اور آرمی چیف کے درمیان نئے ڈی جی آئی ایس آئی کی تقرری پر مشاورت مکمل ہونے کے بعد تقرری کا پراسس شروع ہوچکا ہے؛ ممبئی کی خصوصی عدالت نے بالی وڈ اداکار شاہ رخ خان کے بیٹے آرین خان کی درخواست ضمانت پر سماعت جمعرات تک ملتوی کر دی ہے۔

دنیا کے 20 مضبوط ترین معاشی ملکوں کے رہنما آج منگل کے روز افغانستان کی صورتِ حال پر تبادلہ خیال کر رہے ہیں؛ اقوامِ متحدہ کے سیکرٹری جنرل انتونیو گوتریس نے پیر کو صحافیوں سے بات کرتے ہوئے خبردار کیا کہ افغانستان تباہی کے دہانے پر پہنچ گیا ہے جسے نقد رقم کی اشد ضرورت ہے؛ طالبان کے قائم مقام وزیرِ خارجہ امیر خان متقی کا کہنا ہے کہ منگل کو ان کی یورپی یونین کے نمائندوں سے ملاقات ہو رہی ہے؛ افغانستان اور پاکستان کے درمیان چمن اسپن بولدک اور طورخم سرحدیں ایک ہفتے سے زائد عرصے سے بند ہیں اور جرمنی کے شہر کولون کے حکام نے کہا ہے کہ وہ مساجد میں لاؤڈ اسپیکر پر اذان دینے کی اجازت دینے کا آغاز کر رہے ہیں اور جمعہ کی دوپہر سے اذان دی جاسکتی ہے۔

پاکستان کے معروف اور ممتاز ایٹمی سائنس دان ڈاکٹر عبدالقدیر خان کو اسلام آباد کے ایچ ایٹ قبرستان میں سرکاری اعزاز کے ساتھ سپردِ خاک کر دیا گیا؛ امریکہ نے کہا ہے کہ طالبان سے قطر کے دارالحکومت دوحہ میں ہونے والی بالمشافہ ملاقات میں سیکیورٹی اور دہشت گردی پر تحفظات سمیت دیگر امور پر بات چیت ہوئی ہے؛ امریکہ اور برطانیہ نے پیر کے روز اپنے شہریوں کو خبردار کیا کہ وہ افغانستان میں ہوٹلوں میں جانے سے گریز کریں؛ بھارت اور چین کی جانب سے لداخ میں جاری تعطل اور کشیدگی کو دور کرنے کے لیے ہونے والے مذاکرات ایک بار پھر ناکام ہو گئے اور آج امریکہ میں کولمبس ڈے کے موقع پر وفاقی تعطیل ہے۔

امریکہ کی نائب وزیر خارجہ وینڈی شرمن نے اسلام آباد پہنچنے کے بعد وزیرخارجہ شاہ محمود قریشی سے ملاقات کی ہے؛ افغانستان کے صوبے قندوز میں آج جمعہ کو ایک پرہجوم مسجد میں بم دہماکے میں متعدد ہلاکتیں ہوئی ہیں؛ پاکستانی حکام نے افغان تجارت اور راہداری کے لیے کل سے طورخم بارڈر کراسنگ پوائنٹ کو بند کر دیا ہے جب کہ طالبان نے گزشتہ ہفتے چمن سپن بولدک کراسنگ پوائنٹ کو بند کر دیا تھا؛ امریکی سینیٹ کے رہنماؤں نے حکومت کے قرض لینے کے اختیار کو دسمبر کے اوائل تک بڑھانے کے لیے ایک معاہدے پر دستخط کیے ہیں، تاکہ ملک کو ڈیفالٹ ہونے سے بچایا جا سکے اور تنزانیہ کے مصنف عبدالرزاق گرناہ نے 2021 کا نوبیل انعام برائے ادب حاصل کر لیا ہے۔

پاکستان کے صوبے بلوچستان کے ضلع ہرنائی سمیت کئی علاقوں میں زلزلے کے شدید جھٹکے محسوس کیے گئے اور مکانات گرنے کے نتیجے میں 20 افراد ہلاک اور 200 سے زائد زخمی ہو گئے ہیں؛ گزشتہ چند ماہ میں امریکی ڈالر کے مقابلے میں پاکستانی روپے کی قیمت 10 فیصد سے زائد کمی کے بعد پاکستان کے مرکزی بینک نے کئی نئی پابندیاں عائد کی ہیں؛ وائٹ ہاؤس نے بدھ کو تصدیق کی ہے کہ رواں برس کے آخر میں صدر جو بائیڈن اور ان کے چینی ہم منصب شی جن پنگ کے درمیان ورچوئل سربراہ ملاقات کا منصوبہ بنایا جا رہا ہے اور پاکستان میں کرونا وائرس سے اموات کی تعداد 28 ہزار کے قریب پہنچ گئی ہے۔

پاکستان کے صوبہ بلوچستان کے افغانستان سے متصل سرحدی علاقے چمن میں طالبان حکام نے دونوں جانب سے سرحد کو ہر قسم کی آمدو رفت کے مکمل طور پر بند کردیا ہے؛ ایمنسٹی انٹرنیشنل کی ایک نئی تحقیقاتی رپورٹ میں بتایا گیا ہے کہ طالبان فورسز نے دے کندی صوبے میں ہزارہ نسل کے 13 افراد کو غیر قانونی طور پر قتل کر دیا، جن میں ایک 17سالہ لڑکی بھی شامل ہے؛ طالبان نے 15 اگست کو کابل کا کنٹرول سنبھالنے کے بعد پہلی بار پاسپورٹ جاری کرنا شروع کر دیے ہیں؛ افغانستان میں چین کے سفیر نے بگرام ایئربیس افغانستان میں چینی فوجیوں کی موجودگی سے متعلق خبروں کو مسترد کر دیا ہے اور سمندری طوفان شاہین سے ہلاک ہونے والوں کی تعداد 13 ہو گئی ہے۔

طالبان کے قریبی ذرائع نے بتایا ہے کہ اتوار کی شام کابل میں عید گاہ مسجد کے نزد قریب ایک دھماکے میں آٹھ افراد ہلاک اور 20 زخمی ہو گئے؛ صحافیوں کی عالمی تنظیم انٹرنیشنل کنسورشیم آف انویسٹی گیٹو جرنلسٹس (آئی سی آئی جے) 'پاناما پیپرز' کے بعد ایک اور بڑے مالیاتی اسکینڈل 'پینڈورا پیپرز' کو سامنے لائی ہے؛ امریکہ اور فرانس کے درمیان آبدوزوں کی فروخت کے تنازے پر کشیدگی کے بعد امریکی وزیرِ خارجہ اینٹی بلنکن آئندہ ہفتے پیرس کا دورہ کر رہے ہیں؛ ایک دوا ساز کمپنی، میرک اینڈ کو نے کہا ہے کہ کرونا وائرس میں مبتلا مریضوں کے لیے اس کی تیار کردہ تجرباتی دوا کے استعمال سے اسپتالوں میں ان کے داخلے اور اموات میں نصف تک کمی ہوئی ہے اور جاپان میں فومیو کیشیدا آج پیر سے وزیر اعظم کا عہدہ سنبھال رہے ہیں۔

امریکہ میں ایوان نمائندگان اور سینیٹ نے جمعرات کو اسٹاپ گیپ بل کے حق میں ووٹ دیا جس سے حکومت کو شٹ ڈاؤن سے بچنے کے لیے 3 دسمبر تک کا وقت مل گیا ہے؛ پاکستان کے وزیر خارجہ شاہ محمود قریشی نے کہا ہے کہ امریکی سینیٹ میں افغانستان سے متعلق پیش کیے گئے مجوزہ بل میں پاکستان کے لئے خطرات کو نظرانداز نہیں کیا جا سکتا؛ طالبان نے ایک بار پھر عالمی برادری سے کابل میں سفارتخانے کھولنے کا مطالبہ کیا ہے؛ پشاور میں نامعلوم افراد نے جمعرات کو ایک دکان میں گھس کر ایک سکھ حکیم کو گولیاں مار کر قتل کردیا ہے اور مئی 2021 سے اب تک پاکستانی کرنسی روپیہ کی قدر میں 11 فیصد سے زائد کی کمی ریکارڈ کی جا چکی ہے۔

امریکہ میں وفاقی حکومت کی جزوی بندش سے بچنے کے لیے سٹاپ گیپ فنڈنگ کے اقدام پر آج جمعرات کو ووٹ ڈالے جا رہے ہیں؛ چین کی وزارت خارجہ نے کہا ہے کہ افغانستان ایک خود مختار ریاست ہے اور امریکہ کو افغانستان کی خودمختاری، آزادی اور علاقائی سالمیت کا احترام کرنا چاہیے؛ پاکستان نے طورخم سرحد پرافغان باشندوں کو اجازت نامے کے بغیر ملک میں داخلے کی اجازت دینے کا فیصلہ کیا ہے اور کراچی کو اس وقت ممکنہ طوفان کا سامنا ہے جس کے نتیجے میں آج رات سے کراچی اور سندھ کے مختلف علاقوں میں تیز آندھی اور موسملادھار بارشوں کا سلسلہ شروع ہوجائے گا۔