Í Lestinni í dag er meðal annars fjallað um japanska kvikmyndaleikstjórann Yasujiro Ozu en í dag hefjast kvikmyndadagar í Bíóparadís þar sem fjórar myndir hans verða sýndar. Ozu er álitinn einn af merkustu leikstjórum kvikmyndasögunnar. Þekktasta kvikmynd hans, Tokyo Story, frá árinu 1953, er gjarnan valin ein af bestu kvikmyndum allra tíma. Gestir Lestarinnar í dag verða Friðrik Þór Friðriksson kvikmyndaleikstjóri og Hrönn Sveinsdóttir framkvæmdastjóri hjá BíóParadís. HönnunarMars er haldinn í ellefta sinn næstu daga. Hátíðin verður formlega sett í dag klukkan 17:15 og stendur fram á sunnudag. Rætt verður í Lestinni í dag við fatahönnuðinn Helgu Láru Halldórsdóttur sem sýnir í Ráðhúsi Reykjavíkur í kvöld. Verk hennar, Cornered Compsitions, er afrakstur rannsóknar hennar á hversdagslegum vandræðaleika, þar sem sambandi líkama, fatnaðar og rýmis er breytt í skúlptúra sem hægt er að klæðast. Lestin nemur staðar í Ráðhúsi Reykjavíkur og fræðist nánar um sýningu Helgu Láru. Í þættinum á þriðjudag var fjallað um bresk/bandaríska tónlistarmanninn Scott Walker, sem andaðist á föstudag, sjötíu og sex ára gamall. Áfram verður fjallað um þennan merka listamann í þætti dagsins, dánarorsök er enn ókunn, og það er kannski viðeigandi þegar í hlut á tónlistarmaður sem sagði skilið við poppstjörnufrægðina í upphafi ferils síns og dró sig lengra og lengra inn í skel framúrstefnunnar og þoku einsetumannsins eftir því sem leið á lífshlaupið, og gaf fáum færi á sér. Davíð Roach Gunnarsson talar um Scott Walker í Lestinni í dag. Og það fellur strompur í þættinum í dag, síðastliðinn föstudag ríkti mikil sprengjugleði á Akranesi og bærinn fylgdist með einu helsta einkennismerki sínu, strompi Sementsverksmiðjunnar, falla til jarðar. Í pistli sínum í dag fjallar Tómas Ævar Ólafsson um þá einkennilegu sorg sem fylgdi þessum viðburði.