只要係人，總要為三餐而奔波、煩惱，廣東話好傳神，一方面稱之為「搵食」，一方面稱之為「醫肚」。工作，就係搵食，搵食，係因為我哋個肚有病，所以要定時去醫佢。而肚嘅醫生，就係廚師。

今日要同大家介紹嘅書，係關於為俄國政客醫肚嘅廚師訪談錄，叫做《克里姆林宮的餐桌》。

歡迎你返到嚟有文有路，有文有路，文化方見道。今集，我會同你以廚師秘聞，窺探蘇聯政治秘辛——秘，指隱，辛，指苦。

呢本，係一本用俄國飲食，講俄國政治嘅書。作者維特多．沙博爾夫斯基，被認為係波蘭最優秀嘅報導文學作家之一，佢透過走訪前蘇聯嘅唔同地區，訪問當地嘅廚師，將訪談結果集結成呢本書。佢講到：「為了寫這本書，我東南西北跑遍俄國、烏克蘭、白俄羅斯及其他前蘇聯共和國，與一名又一名身分特別的廚師交談，因為這不僅是一本歷史書或報導文學，同時也是一本……食譜。我走訪了在克里姆林宮擔任多年主廚的維克特．別瓦耶夫，跟另外幾場由俄國掀起的戰爭中的廚師聊過，也向車諾比或給太空人做飯的廚娘討教。」

點解廚師同政治可以拉上關係？作者一開頭嘅故事，就會表露得相當清楚……