Radioteater

By RSGArts Performing Arts

Radioteater episodes

June 06, 2013 BY VERLIES AAN WOORDE deur Fanie Viljoen
Xander is ’n skrywer op soek na rus en stilte op die platteland, maar sy nuwe buurvrou laat hom nie een oomblik met rus nie. Mia se dominerende aard herinner hom gevaarlik baie aan sy gewese vrou en die houvas wat sy op hom gehad het. Hy probeer juis herstel van die traumatiese egskeiding. André Stolz, Heidi Mollentze en Sulette Thompson vertolk die rolle. Fanie Viljoen se vorige radiodramas is Die losprys, Agter geslote deure en Die handtekeningjagter. Hy is ook ‘n bekroonde jeugboekskrywer.
45 min
May 30, 2013 TOT SIENS DENISE deur Mari Snyman
Colin val sy lewe lank rond en drink om sy ellende te probeer verwerk. Hy is weer eens in ‘n tronksel vir die nag om sy roes af te slaap. Hy is alleen. Sielsalleen. Maar dan hoor hy ‘n bekende stem wat sê, “Ek is hier. Jy ken my. Dis Denise”. Hy besef hy is nie alleen nie. Of is hy? Colin word noodgedwonge gekonfronteer met sy kinderjare wat allesbehalwe rooskleurig was en leer uiteindelik om eerlik te wees met homself en om hom te aanvaar nes hy is. Maar eers moet hy aanvaar wie en wat Denise is - of was. Denver Vraagom speel die rolle van Colin en sy alter ego, Denise.
58 min
May 23, 2013 MY JAPAN deur Schalk Schoombie
Op 11 Maart 2011 het ŉ verwoestende tsoenami Japan getref. ŉ Onderwyseres wat Engels in Japan gee, Angelique Naudé, het die ramp eerstehands meegemaak en het haar ervarings en indrukke met die bekende joernalis Schalk Schoombie gedeel. Schalk het dit toe in ŉ pryswennende jeugdrama verwerk en toe weer as radiodrama. In hierdie drama word die verwoestende gebeure deur verskeie karakters se oë uitgebeeld. Tegnies en akoesties is dit een van die mees ingewikkelde produksies nog op radio en, regisseur Leon van Nierop en sy tegniese span, waaronder Karen Gravett, moes ure lank voorberei aan veral die tsoenami-byklanke wat nog nie tevore op radio gebruik is nie. Donna-Lee Roberts, Rolanda Marais en Melt Sieberhagen speel die hoofrolle teenoor Stefan Vermaak, Christine Voorendyk en Ursula Vorster.
59 min
May 16, 2013 MIS deur Reza de Wet
“Sien is glo,” sê die konstabel, met sy wit kierie, aan sy verbaasde toehoorders. Verlustig jou in hierdie “sprokie” vir oud en jonk, wat jou sal laat nadink en bespiegel. Die uitdagende vrouerolle word vertolk deur Isadora Verwey, Marga van Rooy, Annaliesa Weiland (wat haar debuut as radio-aktrise maak) en Lelia Etsebeth. Dis ook ‘n voorgeskrewe werk vir hoërskole.
1 hr 27 min
May 09, 2013 Radiodramaslypskool
Kobus Burger leer jou hoe om 'n radiodrama te skryf.
22 min
May 09, 2013 GLASKAS deur Ireneusz Iredynski
‘n Middeljarige aktrise beland in die hospitaal ná ‘n mislukte selfmoordpoging. Hier deel sy haar lewensverhaal, anekdotes oor haar loopbaan en gebeure uit haar kinderjare met ‘n jong psigiater. Wilna Snyman het in 1991 die Radio Artes gekry vir beste spel deur ‘n aktrise in ‘n dramatiese werk vir haar vertolking van die aktrise teenoor Nic de Jager.
30 min
May 02, 2013 ONS GAAN HUIS TOE deur William Oosthuizen
William Oosthuizen het met hierdie debuutwerk van hom die eerste plek verwerf in RSG en Sanlam se radiodramaskryfkompetisie. Dit is die verhaal van 'n vrou wie se dogter op die ouderdom van 18 die huis verlaat en later weer onverwags opdaag.
42 min
April 25, 2013 VEERTIG DAE deur Wilken Calitz
Wat gebeur wanneer ‘n klomp skoolseuns besluit om ‘n kosbare Pierneef-skets te steel as deel van die sogenaamde 40 Days in matriek? Dit wys presies wie hulle eendag sal wees wanneer hulle volwasse is. Maar watter rol speel die volwassenes, wat veronderstel is om hulle leiding te gee, in hierdie diefstal – wetend of onwetend?
1 hr
April 24, 2013 BEHOORT deur Saartjie Botha
Hierdie werk, ’n eerste radiodrama vir Botha, kyk met groot deernis na die bekende situasie in soveel Suid-Afrikaanse gesinne. Die du Toits se huishulp, wat reeds 35 jaar by hulle werk, word siek en die vader, moeder, seun en dogter raak intens bewus van hulle verhoudings met mekaar en met haar.
57 min
April 18, 2013 JOHN BIRKENHEAD deur SD Fourie
Die Birkenhead, haar majesteit se troepeskip, vertrek vroeg in 1852 vanaf Cork na Algoabaai. Aan boord is nie alleen tien regimente nie, maar ook vroue, kinders en agt trommels goud, wat as soldy vir die soldate bedoel is. Daar word vandag nog bespiegel oor wat van die goud geword het.
52 min