ប៉ុន្មាន​ថ្ងៃ​នេះ ក្រុម​អង្គការ​សង្គម​ស៊ីវិល​មួយ​ចំនួន​បាន​ចេញ​សេចក្តី​ថ្លែង​ការណ៍​រួម​បង្ហាញ​ពី​ការ​ព្រួយ​បារម្ភ​ពី​បញ្ហា​យាយី​ផ្លូវ​ច្បាប់​លើ​សកម្មជន​អតីត​បក្ស​ប្រឆាំង និង បញ្ហា​ប្រឈម​កើត​ចេញ​ពី​ការ​បំពាន​សិទ្ធិ​មនុស្ស​នៅ​កម្ពុជា​។ អ្នក​នាំ​ពាក្យ​គណបក្ស​ប្រជាជន​កម្ពុជា លោក សុខ ឥសាន ដែល​ជា​ភ្ញៀវ​របស់​យើង​នៅ​រាត្រី​នេះ បាន​ចាត់​ទុក​អង្គការ​សង្គម​ស៊ីវិល​ទាំង​នេះ​ថា កំពុង​លូក​ដៃ​ចូល​ក្នុង​កិច្ច​ការ​នយោបាយ​។ បន្ថែម​លើ​នេះ លោក​បាន​ចោទ​ប្រកាន់​ពួក​គេ​ថា ធ្វើ​សេចក្តី​ថ្លែង​ការណ៍​ដោយ​លម្អៀង​ទៅ​រក​ក្រុម​អតីត​បក្ស​ប្រឆាំង​។

ភ្ញៀវ​​ប្រចាំ​​ថ្ងៃ​​របស់​​វិទ្យុ​បារាំង​​អន្តរ​​ជាតិ​​នៅ​​ថ្ងៃ​នេះ គឺ លោក​ស្រី ឆាយ ស៊ីវលីន ប្រធាន​សមាគម​ទីភ្នាក់​ងារ​ទេសចរណ៍​កម្ពុជា​​។ ​ឆ្លើយ​​នឹង​​សំនួរ​​របស់​​វិទ្យុ​​បារាំង​​អន្តរ​ជាតិ​ ចំពោះ​ភ្ញៀវ​ទេសចរណ៍​មក​កម្ពុជា​ថយ​ចុះ​៧,៣​%​ក្នុង​រយៈ​ពេល​៥​ខែ​ដើម​ឆ្នាំ​២០១៩​នេះ ​លោក​ស្រី ​ឆាយ ​ស៊ីវលីន ​ថា​​មាន​កត្តា​ច្រើន​​យ៉ាង​ ប៉ុន្តែ​​​ការ​​តម្លើង​​ថ្លៃ​​សំបុត្រ​​ចូល​​ទស្សនា​អង្គរ​វត្ត​ និង​​ការ​​Promotion​ ប្រកួត​​ប្រជែង​​តម្លៃ​​ទាប​​របស់​​ប្រទេស​ជិត​ខាង​គឺជាមូល​ហេតុ​ចំ​បង​។

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្ដរជាតិ​នា​ថ្ងៃ​នេះ គឺ​លោក​វេជ្ជបណ្ឌិត មុំ គង់ ​ប្រធាន​អង្គការ​ចលនា​ដើម្បី​សុខភាព​កម្ពុជា​​។ នៅ​ក្នុង​ឱកាស​ទិវា​ពិភពលោក​គ្មាន​ថ្នាំ​ជក់ ៣១ឧសភា​នេះ លោក​វេជ្ជបណ្ឌិត មុំ គង់ បាន​កត់​សម្គាល់​ឃើញ​ថា ការ​អនុវត្ត​បរិស្ថាន​គ្មាន​ផ្សែង​បារី​នៅ​តាម​គ្រឹះស្ថាន​សិក្សា​នានា​ក្នុង​ប្រទេស​កម្ពុជា មានភាព​ល្អ​ប្រសើរ​គួរ​ឲ្យ​កត់​សម្គាល់។ យ៉ាង​ណា​ក៏​ដោយ ការ​អប់រំ​ស្ដី​ពី​ថ្នាំ​ជក់​ដែល​មាន​នៅ​ក្នុង​កម្មវិធី​សិក្សា ត្រូវ​ការ​ការ​កែ​លម្អ​បន្ថែមទៀត ដើម្បី​ឲ្យ​ទាន់​សភាពការណ៍​របស់​សកលលោក​។

លោក​នាយក​រដ្ឋ​មន្ត្រី ហ៊ុន សែន និង​គណៈ​ប្រតិភូ​រដ្ឋា​ភិបាល​កម្ពុជា បាន​ស្ថិត​នៅ​ទីក្រុង​តូក្យូ ប្រទេស​ជប៉ុន ដើម្បី​ចូល​រួម​ក្នុង​សន្និសីទ​អន្តរជាតិ​លើក​ទី២៥ ស្តីពី​អនាគត​របស់​អាស៊ី និង​ចូល​រួម​ព្រឹត្តិការណ៍​សំខាន់ៗ​ជា​ច្រើន​ទៀត ក្នុង​នោះ​ក៏​មាន​ជំនួប​ជាមួយ​ថ្នាក់​ដឹក​នាំ និង​ធុរកិច្ច​ជន ជប៉ុន​ផង​ដែរ​។ លោក​បណ្ឌិត ឈាង វណ្ណារិទ្ធ នាយក​វិទ្យា​ស្ថាន​ចក្ខុ​វិស័យ​អាស៊ី បាន​មើល​ឃើញ​ថា ការ​បង្ហាញ​ពី​សក្តា​នុពល​វិនិយោគ​របស់​ថ្នាក់​ដឹកនាំ​កម្ពុជា គឺ​ជា​ឱកាស​មួយ​ បង្ហាញ​ដល់​អ្នក​ធុរ​កិច្ច​ជប៉ុន ឲ្យ​គេ​ចាប់​អារម្មណ៍​បន្ថែម​ទៀត​ពី​កម្ពុជា​។

តម្លៃ​ខុនដូ​នៅ​រាជធានី​ភ្នំពេញក្នុង​ឆ្នាំ​២០១៩​នេះ ទំនង​ជា​មិន​ធ្លាក់​ចុះ​ទេ បើ​ទោះ​បី​ជា​ការ​ផ្គត់ផ្គង់​មាន​កំណើន​ក៏​ដោយ​។ នេះ​បើ​តាម​ការ​អះអាង​របស់​លោក លោក ច្រឹក សុខនីម ប្រធាន​សមាគម​អ្នក​វាយ​តម្លៃ​និង​ភ្នាក់​ងារ​អចលនវត្ថុ​កម្ពុជា ដែល​ជា​ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្ដរជាតិ​នា​រាត្រី​នេះ​។ ការ​អះអាង​របស់​លោក ច្រឹក សុខនីម ដូច្នេះ ធ្វើ​ឡើង​បន្ទាប់​ពី​មាន​របាយការណ៍​ថ្មី​ ព្យាករណ៍​ថា ចំនួន​បន្ទប់​ខុនដូ​​ក្នុង​រាជធានី​ភ្នំពេញ​នឹង​កើន​ឡើង​​​​ចំនួន​ជាង​១ម៉ឺន៤ពាន់​យូនីត​កាល​ពី​ចុង​ឆ្នាំ ​២០១៨ ទៅ​ដល់​​ចំនួនជាង​៣ម៉ឺនយូនីត​ នៅក្នុង​​ឆ្នាំ​២០១៩​នេះ​។ ត​ទៅ​នេះ​ជា​បទ​សម្ភាស​រវាង អ៊ឹម រចនា និង​លោក ច្រឹក សុខនីម​។

បន្ទាប់​ពី​ទទួល​បាន​ជោគ​ជ័យ​ក្នុង​ការ​រៀប​ចំ​ពាន​រង្វាន់​គីណាល់​ក្នុង​រយៈ​ពេល​៦ឆ្នាំ កន្លង​ទៅ នៅ​ឆ្នាំ​២០១៩​នេះ មូល​និធិ​គីណាល់ បាន​រៀប​ចំ​ឲ្យ​មាន​ការ​ប្រកួត​ប្រជែង​ស្នាដៃ​អត្ថបទ​ស្រាវ​ជ្រាវ លើ​វិស័យ​កសិកម្ម និង​ចំណី​អាហារ ដើម្បី​ដណើ្តម «ពាន​រង្វាន់​ត្នោត​មាស»លើក​ទី២​។ លោក ហ៊ឹម ពិសិដ្ឋ អគ្គ​នាយក​រង​នៃ​ក្រុម​ហ៊ុន Confirel បាន​ថ្លែង​ថា ស្នាដៃ​របស់​និស្សិត​ទាំង​៣ក្រុម ដែល​ទទួល​បាន​ពាន​រង្វាន់​លេខ១ លេខ២ និងលេខ៣ គឺ​ជា​ស្នាដៃ​ដ៏ល្អ ដែល​ទទួល​បាន​ការ​ផ្តល់​ពិន្ទុ យ៉ាង​សុក្រឹត​ពី​គណៈ​មេ​ប្រយោគ​ឯករាជ្យ​។

ភ្ញៀវប្រចាំ​ថ្ងៃ​របស់​វិទ្យុ​បារាំង​អន្តរជាតិ​RFIនៅរាត្រីនេះ គឺ​លោក ហេង សួរ អ្នក​នាំ​ពាក្យ​ក្រសួង​ការងារ​។ ក្រសួង​ការងារ និង​ភាគី​ពាក់​ព័ន្ធ​មាន​អង្គការ​ILO​ជា​ដើម​បាន​រៀប​ចំ​កិច្ច​សន្ទនា​ថ្នាក់​ជាតិ​មួយ​នៅ​ថ្ងៃ​ចន្ទ​ស្តី​ពី​អនាគត់​ការងារ​សម្រាប់​កម្ពុជា។ បើ​តាម​លោក ហេង សួរ កម្ពុជា​មិន​ទាន់​ប្រឈម​នឹង​ហានិភ័យ​ស្វ័យ​ប្រវត្តិ​កម្ម​ការងារ ដោយ​សារតែការរីក​ចម្រើន​នៃ​ប្រព័ន្ធ​បច្ចេក​វិទ្យា​នោះទេ ក្នុង​រយៈ​ពេល​៥ឆ្នាំ​ខាង​មុខ​ទៀត។ ប៉ុន្តែក្រោយ​រយៈនេះ ក៏ពលរដ្ឋខ្មែរ​អាចប្រឈម​បញ្ហានេះ​តែ​ថារដ្ឋាភិបាល​បាន​ត្រៀម​ខ្លួនដោះស្រាយហើយ។

ភ្ញៀវ​ប្រ​ចាំ​ថ្ងៃ​របស់​វិទ្យុ​បារាំង​អន្តរ​ជាតិ​RFI​នៅ​រាត្រី​នេះ គឺ​លោក ឌឹម សុវណ្ណរុំ សមាជិក​ និង​ជា​អ្នក​នាំ​ពាក្យ​គណៈ​កម្មា​ធិការ​ជាតិ​រៀប​ចំ​ការ​បោះ​ឆ្នោត​ហៅ​កាត់​ថា ​គជប​។​ គជប ដែល​បាន​បិទ​ការិយា​ល័យ​បោះ​ឆ្នោត​នៅ​ទូទាំង​ប្រទេស​កាល​ពី​ម៉ោង​៣​រសៀល​ បន្ទាប់​ពី​បើក​ទ្វារ​នៅ​ម៉ោង​៧​ព្រឹក​ថ្ងៃអាទិត្យនេះ។​បើ​តាម​ លោក ឌឹម សុវណ្ណរុំ ​អ្នក​ចេញ​ទៅ​បោះ​ឆ្នោត​មាន​រហូត​ដល់​ជាង​៩៩​ភាគ​រយ​ ខណៈ​អវត្ត​មាន​ចំនួន​៦នាក់​ ដែល​ក្នុង​នោះមាន​ម្នាក់​ស្លាប់​ដោយ​គ្រោះ​ថ្នាក់​ចរាចរណ៍​ពេល​ធ្វើ​ដំណើរ​ទៅ​បោះ​ឆ្នោត​។

ភ្ញៀវ​ប្រចាំថ្ងៃ​របស់​យើង​នៅ​រាត្រី​នេះ គឺ​លោ​កអំ សំអាត ដែលជា​នាយករង​ទទួលបន្ទុក​ផ្នែក​ឃ្លាំមើល​សិទ្ធិមនុស្ស​នៃ​អង្គការ​លីកាដូ (LICADHO)។ ជុំវិញ​ការកាត់ទោស​លោក​អឿ​ត អាង ហៅ ជួប សម្លាប់​ឱ្យ​ជាប់ពន្ធនាគារ​អស់​មួយជីវិត​ក្នុង​សំណុំរឿង​ឃាតកម្ម​លើ​លោក​បណ្ឌិត​កែម ឡី​នោះ លោក​អំ សំអាត យល់ថា នេះ​គឺជា​ជំហាន​មួយ​នៃ​ការផ្តល់​យុត្តិធម៌​ដល់​លោក​កែម ឡី តែ​មិនទាន់​ពេញលេញ​នៅឡើយ​ទេ។ សម្រាប់​លោក​អំ សំអាត ការផ្តល់​យុត្តិធម៌​ពិត​ដល់​លោក​កែម ឡី គឺ​លុះត្រាតែ​តុលាការ​រកឱ្យឃើញ​នូវ​អ្នក​ជាប់​ពាក់ព័ន្ធ​ផ្សេងទៀត​យកមក​កាត់ទោស​ជាមួយ​លោក​ជួប សម្លាប់។

ភ្ញៀវប្រចាំថ្ងៃ​របស់​វិទ្យុ​បារាំង​អន្តរជាតិ​RFIនៅរាត្រីនេះ គឺ លោក ហង្ស ពុទ្ធា អ្នកនាំ​ពាក្យ​គណៈកម្មាធិការ​ជាតិ​រៀប​ចំការ​បោះ​ឆ្នោត(គជប)។ យុទ្ធនាការ​ឃោសនា​បោះឆ្នោត​ជ្រើស​រើស​ក្រុម​ប្រឹក្សារាជធានី ខេត្ត ក្រុង ស្រុក ខណ្ឌ អាណត្តិ​ទី៣ ត្រូវ​បិទ​បញ្ចប់​នៅ​ម៉ោង​១០​យប់​នេះ​។ តាម គជប ការ​ឃោសនា​៨ថ្ងៃ​មក​នេះ មិន​មាន​អ្វី​ខុស​ប្រ​ក្រតី​គួរឲ្យកត់​សំគាល់​ឡើយ ខណៈ​មិន​មាន​ការ​ចូលរួម​ពី​អតីត​បក្ស​សង្រ្គោះ​ជាតិ​។ ប៉ុន្តែ​លោក ហង្ស ពុទ្ធា ឆ្លើយ​តប​ថា អវត្តមាន​នៃ​អតីត​បក្ស​ប្រឆាំង​មិន​មែន​ជា​បញ្ហា​ដែល​ត្រូវ​យក​មក​ផ្ទៀង​ផ្ទាត់​ក្នុង​ការ​បោះ​ឆ្នោត​ក្រុម​ប្រឹក្សា​អាណត្តិទី៣​នេះ​ទេ​។