ភ្ញៀវ​ប្រចាំថ្ងៃ​របស់​វិទ្យុ​បារាំង​អន្តរជាតិ ​RFI ​នៅ​រាត្រី​នេះ ​គឺ​លោក ​សយ ​សុភាព ​អគ្គនាយក​មជ្ឈមណ្ឌល​ព័ត៌មាន​ដើម​អំពិល ​និង​ជា​ប្រធាន​សមាគម​អ្នក​សារព័ត៌មាន ​កម្ពុជា​-​ចិន​។ ​សមាគម​អ្នក​សារព័ត៌មាន ​កម្ពុជា​-​ចិន ​ដែល​ទើប​នឹង​បង្កើត​ឡើង ​កាល​ពី​ថ្ងៃ​ចន្ទ ​ទី ​០៦ ​ឧសភា ​ត្រូវ​បាន​លោក ​សយ ​សុភាព​ អះអាង​ថា នឹង​ជួយ​​ការពារ​​ផល​​ប្រយោជន៍​កម្ពុជា​និង​ចិន​ ទប់ទ​ល់​ម​ជ្ឈដ្ឋាន​ខាង​ក្រៅ​។ ​បើ​តាម​អ្នក​អត្ថាធិប្បាយ​ទូរទស្សន៍​ដែល​គាំទ្រ​រដ្ឋាភិបាល​កម្ពុជា​រូប​នេះ ​កត្តា​ភូមិ​សាស្ត្រ​នយោបាយ​និង​ពេល​វេលា ​បាន​តម្រូវ​ឲ្យ​លោក​បង្កើត​សមាគម​នេះ​ឡើង​។ ​តើ​ហេតុ​អ្វី​?

ក្រសួង​អប់រំ យុវជន និង​កីឡា​កាលពី​ថ្ងៃ​ទី០៦ ឧសភា​កន្លងទៅ បានទទួល​ស្គាល់​ជា​ផ្លូវការ​ហើយ​នូវ​ប្រភេទ​កីឡា​អេឡិចត្រូនិក​Esports បន្ទាប់ពី​កីឡា​ប្រភេទ​នេះ​បានធ្វើ​សកម្មភាព​តាំងពី​ឆ្នាំ២០១៤មក។ នៅ​រាត្រី​នេះ លោក​ជា ច័ន្ទ​បរិបូរណ៍ រដ្ឋលេខាធិការ​ក្រសួង​ព័ត៌មាន និង ជា​ប្រធាន​សហព័ន្ធ​កីឡា​អេឡិចត្រូនិក​កម្ពុជា(Esports) គឺជា​ភ្ញៀវ​របស់​យើង​ដោយ​ជជែក​ពី​ប្រភេទ​កីឡា​ថ្មី​នេះ។ ឆ្លើយតប​នឹង​សំណួរ​ប​ស់វណ្ណ សុគន្ធា លោក​ជា ច័ន្ទ​បរិបូរណ៍ បាន​គូសបញ្ជាក់ថា កីឡា​Esports មិនមែនជា​ប្រភេទ​ល្បែង​លេង(Game)នៅតាម​អ៊ី​ន​ធើ​ណែ​ត​ឡើយ។

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្តរជាតិ​RFI​នៅ​រាត្រី​នេះ​ គឺ​លោក​ឧកញ៉ា ហ៊ុន ឡាក់ ម្ចាស់​ក្រុម​ហ៊ុន​ឡងមេត​។ ជា​ក្រុម​ហ៊ុន​មួយ​ក្នុង​ចំណោម​ក្រុម​ហ៊ុន​៥​ដែល​បាន​ទទួល​ការ​អនុញ្ញាត​ជា​ផ្លូវ​ការ នាំ​ចេញ​ចេកអំបូង​លឿង ទៅ​កាន់​ប្រទេស​ចិន​ដោយ​ផ្ទាល់​លើក​ដំបូង​ជាង​១០០​តោន​ កាលពី​ថ្ងៃទី​០៩​ ខែ​ឧសភានេះ។​ បើ​តាម​ឧកញ៉ា ហ៊ុន ឡាក់ ការ​ដាំ​ចេក​អំបូងលឿង​សម្រាប់​នាំ​ចេញ​ដោយសារ​តែ​ចេក​នេះ​រក្សា​ទុកបាន​រហូត​ដល់​៤៥​ថ្ងៃ​។​ ម្យ៉ាង​ទៀត​ដោយ​សារ​តែ​កម្ពុជា​បាន​ចុះកិច្ច​ព្រម​ព្រៀង​ជា​មួយ​ចិន​ក្នុង​នាំចេញ​ផ្លែឈើទៅ​កាន់​ប្រទេស​នេះ​។​ប៉ុន្តែលោកថាការ​នាំ​ចេក​អំបូង​លឿង​ទៅកាន់​ប្រទេស​ចិន​ នៅ​មិន​គ្រប់​គ្រាន់​តាម​តម្រូវ​ការ​នៅ​ឡើយ​។

ទីភ្នាក់ងារ​ជាតិ​មុខរបរ​ និង​ការងារ​ សហការ​ជាមួយ​អង្គការ​UNDP ​កាលពី​រសៀល​ថ្ងៃ​ព្រហស្សតិ៍​ម្សិលមិញ ​បាន​ដាក់​សម្ពោធ​ខ្សែ​វីដេអូ​មួយ ​មាន​៧​វគ្គ ​ឈ្មោះថា​«​Doctor Job​» ​ដើម្បី​ផ្តល់​ការ​ប្រឹក្សា​យោបល់​អាជីព​ការងារ ​និង​ការ​តម្រង់​ទិស​ដល់​អ្នក​ដែល​ស្វែងរក​ការងារ​ធ្វើ ​ដោយ​វីដេអូ​នេះ​ សំដៅ​ដល់​ការ​ផ្តល់​ព័ត៌មាន​។ ​លោក ​ហៃ ហ៊ុនឡេង ​ប្រធាន​ស្តីទី​ទីភ្នាក់ងារ​ជាតិ​មុខរបរ​ និង​ការងារ ​ថ្លែងថា​ឃ្លីប​វីដេអូ ​Doctor Job ​នេះ ​នឹង​ជួយ​ដល់​យុវជន​ ឲ្យ​ពួកគាត់​បាន​ដឹង​ពត៌មាន​កាន់តែ​លម្អិត ​និង​អាច​ជួប​ប្រឹក្សា​ដោយផ្ទាល់​ជាមួយ​អ្នក​ជំនាញ​។

ឯក​អគ្គ​រដ្ឋ​ទូត​ចិន​ប្រចាំ​នៅ​កម្ពុជា លោក វ៉ាង វិនធាន បាន​ធ្វើ​ការ​បក​ស្រាយ​នៅ​លើ​ទំព័រ​ហ្វេស​ប៊ុក​ផ្លូវ​ការ​របស់​ស្ថាន​ទូត​ចិន​ប្រចាំ​កម្ពុជា អំពី​ផែន​ការ​សកម្មភាព​កសាង​សហគមន៍​ជោគ​វាសនា​រួម​គ្នា​រវាង​ចិន និង​កម្ពុជា​។ ជុំវិញ​ការ​លើក​ឡើង​របស់​ឯក​អគ្គ​រដ្ឋ​ទូត​ចិន​ប្រចាំ​កម្ពុជា​ដូច្នេះ ត្រូវ​លោក​បណ្ឌិត ឡេង ធារិទ្ធ នាយក​មជ្ឈ​មណ្ឌល​មេគង្គ​សម្រាប់​ការ​សិក្សា​យុទ្ធ​សាស្ត្រ​នៃ​វិទ្យា​ស្ថាន​ចក្ខុ​វិស័យ​អាស៊ី មើល​ឃើញ​ថា ការ​បក​ស្រាយ​នេះ មាន​ចំណុច​២ធំៗ​គួរ​ឲ្យ​ចាប់​អារម្មណ៍ គឺ​ភាគី​ចិន​និង​កម្ពុជា​យល់​ព្រម​ពិភាក្សា​រួម​គ្នា មុន​នឹង​សម្រេច​អ្វី​មួយ និង​ការ​គាំទ្រ​គ្នា​ចំពោះ​កិច្ច​ព្រម​ព្រៀង​ពាណិជ្ជកម្ម​ពហុ​ភាគី​រវាង​កម្ពុជា​និង​ចិន​។

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្តរជាតិ​នៅ​រាត្រី​នេះ គឺ​លោក យិន ម៉េងលី អ្នក​សម្រប​សម្រួល​សមាគម​អាដហុក​ខេត្ត​បាត់​ដំបង​។ តុលាការ​ខេត្ត​បាត់​ដំបង​ដែល​បាន​និង​កំពុង​បន្ត​នីតិវិធី​សាក​សួរ​ទៅ​លើ​សកម្មជន​អតីត​គណបក្ស​ប្រឆាំង​ចំនួន​៥រូប ក្នុង​ចំណោម​២៦​រូប ក្រោម​ការ​ចោទ​ប្រកាន់​ថា «ប្រឆាំង​នឹង​សាល​ដីកា​តុលាការ​កំពូល»​ដែល​រំលាយ​គណបក្ស​សង្រ្គោះ​ជាតិ​កាល​ពី​ចុង​ឆ្នាំ​២០១៧​។ ចំណាត់​ការ​នេះ​ធ្វើ​ឡើង​ដោយ​សារ​តែ​សកម្មជន​ទាំង​នោះ​ជួប​ជុំ​គ្នា​ហូប​នំ​បញ្ចុក​នៅ​ហាង​របស់​កញ្ញា ស៊ិន ចាន់ពៅរ៉ូហ្សេត​ កន្លង​ទៅ។ប៉ុន្តែ លោក យិន ម៉េងលី និយាយ​ថា គ្មាន​ច្បាប់​ណា​ហាម​ឃាត់​ការ​ជួប​ហូប​នំ​បញ្ចុក​ទេ​។

ស្ថាន​ភាព​វិស័យ​សំណង់ និង​អចលន​ទ្រព្យ​នៅ​ប្រទេស​កម្ពុជា នៅ​តែ​មាន​សុខភាព​ល្អ និង​មាន​កំណើន​ទៅ​មុខ​។ លោក​ច្រឹក សុខនីម ប្រធាន​សមាគម​អ្នក​វាយ​តម្លៃ និង​ភ្នាក់ងារ​អចលន​វត្ថុ​កម្ពុជា បាន​លើក​ឡើង​ថា វិស័យ​សំណង់ និង​អចលន​ទ្រព្យ​កម្ពុជា បន្ត​ឡើង​ខ្ពស់​រយៈ​៥ឆ្នាំ ២ដង​បន្ថែម​ទៀត ក៏​ប៉ុន្តែ​វា​អាច​ប្រឈម​នូវ​ហានិភ័យ​ខ្លះ​។ ការ​អះអាង​របស់​លោក ច្រឹក សុខនីម ដូច្នេះ គឺ​ដោយ​សារ​តែ​មាន​ចរន្ត​នៃ​ការ​វិនិយោគ​ពី​បរទេស និង​វិនិយោគ​ក្នុង​ស្រុក រួម​នឹង​កត្តា​មួយ​ចំនួន​រួម​មាន តម្រូវ​ការ​ជាក់​ស្តែង​របស់​អ្នក​ប្រើ​ប្រាស់​ផ្ទះ​សម្បែង កត្តា​គាំទ្រ​ពី​ធនាគារ និង​កត្តា​ស្ថាន​ភាព​សេដ្ឋកិច្ច និង​នយោបាយ​។

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្តរជាតិ RFI នៅរាត្រីនេះ គឺ លោក សាន ដារ៉ាវីដ ប្រធាន​ក្រុម​យុវជន​សម្រាម ដែល​គេ​ល្បី​តៗ​គ្នា តាម​រយៈ​សកម្មភាព​ប្រមូល​សម្រាម​នៅ​លើ​ប្រឡាយ​ទឹក​ស្អុយ​បឹង​ត្របែក ស្ថិត​នៅ​ប៉ែក​ខាង​ត្បូង​ទីក្រុង​ភ្នំពេញ​។ តាម​រយៈ​បទ​សម្ភាសន៍​ជាមួយ​វិទ្យុ​បារាំង​អន្តរ​ជាតិ RFI លោក សាន ដារ៉ាវីដ ថា ការ​សម្រេច​លូក​ដៃ​ចូល​ក្នុង​សកម្មភាព​ប្រមូល​សម្រាម​ដែល​មាន​ក្លិន​ស្អុយ​ជាប់​ខ្លួន​នេះ គឺ​ដោយ​សារ​ឈឺចាប់​នឹង​ពាក្យ​រិះគន់​ពី​មិត្តភក្តិ​បរទេស ហើយ​បាន​ប្តេជ្ញា​បន្ត​ធ្វើ​សកម្មភាព​នេះ​រហូត​ដល់​ប្រទេស​កម្ពុជា​ស្អាត​។ ប៉ុន្តែ​ទន្ទឹម​នឹង​ការ​ប្តេជ្ញា​ចិត្ត​នេះ ​លោក​បាន​សូម​អំពាវនាវ​ឲ្យ​មាន​ការ​សហការ​ចូល​រួម​ពី​ប្រជាពល​រដ្ឋ និង​ភាគី​ពាក់​ព័ន្ធ ជា​ពិសេស​ពី​សប្បុរស​ជន ជួយ​បរិច្ចាគ​ថវិការ​ម្នាក់​១ដុល្លារ ដើម្បី​ជួយ​ទ្រទ្រង់​ដល់​សកម្មភាព​របស់​ពួក​គេ​បន្ត​ទៅ​ទៀត​។

ថ្ងៃអាទិត្យ​នេះ គឺជា​ថ្ងៃទី៥ នៃ​ការចាប់ផ្តើម​ពិនិត្យ​បញ្ជី​ឈ្មោះ​បោះឆ្នោត និង ចុះឈ្មោះ​បោះឆ្នោត​ថ្មី​ក្នុង​ឆ្នាំ២០១៩នេះ​ដែល​ធ្វើឡើង​ពីថ្ងៃ​ទី១ ឧសភា និង បញ្ចប់​នៅ​ថ្ងៃទី២២ ឧសភា។ ដូច្នេះ​នៅ​រាត្រី​នេះ លោក​ហង្ស ពុទ្ធា អ្នកនាំពាក្យ​គណៈកម្មាធិការ​ជាតិ​រៀបចំ​ការបោះឆ្នោត គឺជា​ភ្ញៀវ​របស់​យើង។ ឆ្លើយតប​នឹង​សំណួរ​របស់​វណ្ណ សុគន្ធា លោក​ហង្ស ពុទ្ធា បាន​លើកឡើងថា នៅក្នុង​រយៈពេល​ប៉ុន្មាន​ថ្ងៃ​នៃ​ការពិនិត្យ​បញ្ជី​ឈ្មោះ​បោះឆ្នោត និង ចុះឈ្មោះ​បោះឆ្នោត​ថ្មី​នេះ មាន​ប្រជាពលរដ្ឋ​ជាច្រើន​បាន​ចាប់អារម្មណ៍ ក្នុងនោះ យុវជន​គ្រប់​អាយុ​បានមក​ចុះឈ្មោះ​ឆ្នោត​ច្រើន​គួរឱ្យកត់សម្គាល់។

ភ្ញៀវ​ប្រចាំថ្ងៃ​របស់​វិទ្យុ​បារាំង​អន្តរជាតិ ​RFI ​នៅ​រាត្រី​នេះ ​គឺ​លោក ​សម​ រង្ស៊ី ​ប្រធាន​ស្តីទី​អតីត​គណបក្ស​សង្រ្គោះ​ជាតិ​។ ​លោក​ សម រង្ស៊ី ​ដែល​កាល​ពី​ថ្ងៃទី ​០២ ​ឧសភា ​កន្លង​ទៅ ​ទើប​ត្រូវ​បាន​តុលាការ​កម្ពុជា​កាត់​ទោស​ឲ្យ​ជាប់​ពន្ធនាគារ​រយៈ​ពេល​៨​ឆ្នាំ​ទៀត ​ក្នុង​សំណុំ​រឿង ​«​ប្រមាថ​ព្រះ​មហាក្សត្រ ​និង​ញុះ​ញង់​កុំ​ឲ្យ​យោធិន​ស្ដាប់​បង្គាប់​»​។ ​ប៉ុន្តែ​តាមរយៈ​បទសម្ភាសន៍​ជា​មួយ​វិទ្យុ​បារាំង​អន្តរជាតិ ​RFI ​លោក​ សម​ រង្ស៊ី ​បាន​ហៅ​ការ​កាត់​ទោស​នេះ​ថា ​លោក​កំពុង​តែ​ធ្វើ​ត្រូវ ​ដោយ​ខិតខំ​ទាមទារ​សេរីភាព​ជូន​ប្រជារាស្ត្រ​ខ្មែរ​ទាំង​មូល​។