សៀវ​ភៅ​ដែល​មាន​ចំណង​ជើង​ថា« ពូទីន​២០​ឆ្នាំ​ក្នុង​អំណាច»​ ត្រូវ​ដាក់​បង្ហាញ​នៅ​ក្នុង​ព្រឹត្តិការណ៍​ពិព័ណ៌​សៀវ​ភៅ​លើកទី​៨​នៅ​ឆ្នាំនេះ​។ ​សៀវ​ភៅ​កម្រាស់​ជាង​២៦០​ទំព័រ​នេះ​ និពន្ធ​ដោយ​លោក ​អេង ប៉ូលីត សូឡារី ដែល​បាន​រស់​និង​សិក្សា​នៅ​ប្រទេស​អតីត​សហភាព​សូវៀត​នេះ​អស់​រយៈ​ពេល​ជាង​១០​ឆ្នាំ​។​ អ្នកនិពន្ធ​រូប​នេះ ដែល​ជា​សាស្ត្រាចារ្យ​វិទ្យាសាស្ត្រ​នយោបាយ​ផង​ ​បាន​អះអាង​ថា ​«ការ​សម្រេច​ចិត្ត​របស់​រុស្ស៊ី ​ចង់​ឬ​មិន​ចង់​ ក៏​អាច​ជះ​ឥទ្ធិ​ពល​ដល់​ទី​ក្រុង​ភ្នំពេញ ដោយ​ផ្ទាល់​ឬ​ដោយ​​ប្រយោល​ផង​ដែរ​»។

លោក ខឺយ ស៊ីនឿន អតីត​សមាជិក​គណៈ​កម្មការ​នាយក​អតីត​គណបក្ស​សង្គ្រោះ​ជាតិ បាន​ថ្លែង​ថា ការ​ត្រៀម​បង្កើត​គណ​បក្ស​ប្រឆាំង​ថ្មី​មួយ នា​ពេល​ឆាប់ៗ​ខាង​មុខ​នេះ គឺ​ដោយ​សារ​អ្នក​គាំទ្រ​អតីត​គណ​បក្ស​សង្គ្រោះ​ជាតិ កំពុង​មាន​ការ​បែក​បាក់​ផ្ទៃ​ក្នុង លាប​ពណ៌​គ្នា ជា​ហេតុ​ធ្វើ​ឲ្យ​ក្រុម​លោក ជ្រើស​រើស​ផ្លូវ​កណ្តាល​មួយ​គឺ​ការ​បង្កើត​គណ​បក្ស​ថ្មី​មួយ​។ តាម​លោក ខឺយ ស៊ីនឿន ក្រុម​ការងារ​របស់​លោក ដែល​រួម​មាន​អតីត​តំណាង​រាស្ត្រ ដែល​រួច​បំរាម​នយោ​បាយ​ផង​នោះ នឹង​ដាក់​ពាក្យ​សុំ​បើក​គណ​បក្ស​ទៅ​ក្រសួង​មហា​ផ្ទៃ នៅ​ពេល​ឆាប់ៗ​ខាង​មុខ​។

នៅ​ថ្ងៃ​ស្អែក​នេះ គឺ​ជា​កម្មវិធី​ពិព័រណ៍​សៀវ​ភៅ​កម្ពុជា​ឆ្នាំ​ទី០៨ ដែល​រៀប​ចំ​ធ្វើ​នៅ​ក្នុង​បរិវេណ​បណ្ណា​ល័យ​ជាតិ​ក្នុង​ទីក្រុង​ភ្នំពេញ​។ ព្រឹត្តិការណ៍​ដែល​មាន​រយៈ​ពេល​បី​ថ្ងៃ​នេះ កំពុង​ក្លាយ​ជា​ព្រឹត្តិការណ៍​ដ៏​ធំ​មួយ​អស់​រយៈ​ពេល​៧ឆ្នាំ​មក​ហើយ ដោយ​ប្រមូល​ផ្តុំ​ទៅ​ដោយ​អ្នក​និពន្ធ អ្នក​បោះ​ពុម្ព​សៀវ​ភៅ និង​អ្នក​អាន បាន​មក​ជួប​ជុំ​គ្នា ដើម្បី​ចែក​រំលែក​នូវ​ចំណេះ​ដឹង​ថ្មីៗ និង​ដើម្បី​ជំរុញ​វប្បធម៌​នៃ​ការ​អាន​សៀវ​ភៅ​នៅ​កម្ពុជា​ផង​ដែរ​។ ដូច្នេះ​ភ្ញៀវ​របស់​វិទ្យុ​បារាំង​អន្តរ​ជាតិ RFI នៅ​រាត្រី​នេះ គឺ​លោក ហង់ ជួនណារ៉ុន រដ្ឋ​មន្ត្រី​ក្រសួង​អប់រំ យុវជន និងកីឡា ជុំវិញ​ចំណាប់​អារម្មណ៍​របស់​លោក​ក្នុង​ព្រឹត្តិការណ៍​នៅ​ចុង​ឆ្នាំ​នេះ​។ លោក ហង់ ជួនណារ៉ុន បាន​ថ្លែង​ថា កម្ម​វិធី​ពិព័រណ៍​សៀវ​ភៅ​កម្ពុជា​នេះ គឺ​ជា​វេទិកា​ដ៏​ធំ​មួយ​របស់​កម្ពុជា បន្ទាប់​ពី​ទិវា​ជាតិ​អំណាច ថ្ងៃទី ១១ មីនា​។

ការ​ប្រកួត​កីឡា​ស៊ី​ហ្គេម​លើក​ទី៣០​នៅ​ប្រទេស​ហ្វីលី​ពីន បាន​បញ្ចប់​ហើយ កាល​ពី​ថ្ងៃ​អង្គារ​ម្សិល​មិញ​។ ប្រទេស​កម្ពុជា​ទទួល​បាន​មេ​ដាយ​ចំនួន​៤៦ ក្នុង​នោះ​មាន​មេ​ដាយ​មាស ៤ ប្រាក់ ៦ និង​មេ​ដាយ​សំរិទ្ធ ៣៦ ហើយ​កម្ពុជា​ស្ថិត​នៅ​ចំណាត់​ថ្នាក់​លេខ​៨ ឈរ​ពី​លើ ប្រ៊ុយ​ណេ ឡាវ និង​ទីម័រ​ខាង​កើត​។ តាម​រយៈ​លទ្ធ​ផល​នេះ លោក ថោង ខុន រដ្ឋ​មន្ត្រី​ក្រសួង​ទេស​ចរណ៍ និង​ជា​ប្រធាន​គណៈ​កម្មា​ធិការ​ជាតិ​អូឡាំ​ពិក​កម្ពុជា បាន​ចាត់​ទុក​ថា គឺ​ជា​លទ្ធ​ផល​មួយ​ល្អ​សម្រាប់​កម្ពុជា ក្នុង​ដំណើរ​ឆ្ពោះ​ទៅ​រក​ស៊ីហ្គេម​ឆ្នាំ​២០២៣ ដែល​កម្ពុជា​ធ្វើ​ជា​ម្ចាស់​ផ្ទះ​។

អង្គការ​សង្គម​ស៊ីវិល​ជា​ច្រើន​ស្ថាប័ន​បាន​ប្រារព្ធ​ទិវា​សិទ្ធិ​មនុស្ស​អន្តរ​ជាតិ​១០​ធ្នូ ​លើក​ទី​៧១​ឆ្នាំ​នៅ​ទី​លាន​ប្រជា​ធិប​តេយ្យ ដោយ​មាន​អ្នក​ចូល​រួម​ប្រមាណ​២០០០​នាក់​​មក​ពី​អង្គការ ​និង​សហជីព​ ព្រម​ទាំង​តំណាង​ស្ថាន​ទូត​មួយ​ចំនួន​ទៀត​។ ​លោក រស់ សុដ្ឋា ជា​ទី​ប្រឹក្សា​នៃ​អង្គការ​សម្ពន្ធ័ភាព​ការងារ​សិទ្ធិមនុស្ស​កម្ពុជា​ដែល​ជា​អ្នក​សម្រប​សម្រួល​ពិធី​នេះ​ បាន​​ថ្លែង​ក្នុង​កម្ម​វិធី​ភ្ញៀវ​ប្រចាំ​របស់​វិទ្យុ​បារាំង​អន្តរជាតិ​ថា​ ការ​ប្រារព្ធ​ទិវា​សិទ្ធិ​មនុស្ស​ឆ្នាំ​នេះ ​គឺ​ដំណើរ​ការ​ទៅ​ដូច​ការ​គ្រោង​ទុក​ប៉ុន្តែ​អាច​ធ្វើ​សកម្មភាព​បាន​តែ​ក្នុង​ដែន​កំណត់​របស់​សមត្ថកិច្ច​តែ​ប៉ុណ្ណោះ​។

ភ្ញៀវ​ប្រចាំ​ថ្ងៃ​របស់​យើង​នៅ​រាត្រី​នេះ គឺ​លោកឱម យ៉ិនទៀង ប្រធាន​អង្គ​ភាព​ប្រឆាំង​អំពើ​ពុក​រលួយ​។ នៅ​ថ្ងៃ​នេះ​ដែល​ជា​ថ្ងៃ​ទិវា​ជាតិ​ប្រយុទ្ធ​ប្រឆាំង​អំពើ​ពុក​រលួយ អង្គ​ភាព​ប្រឆាំង​អំពើ​ពុក​រលួយ​បាន​រៀប​ចំ​សន្និ​បាត​មួយ​ស្តីពី​ការ​បូក​សរុប​ការងារ​រយៈ​ពេល​៨ឆ្នាំ គឺ​តាំង​ពី​ឆ្នាំ​២០១១​ដល់​ឆ្នាំ​២០១៨ និង រយៈ​ពេល​ពេញ​មួយ​ឆ្នាំ​២០១៩​នេះ និង លើក​ទិស​ដៅ​ការងារ​សម្រាប់​ឆ្នាំ​២០​២០​ខាង​មុខ​។ លោក​ឱម យ៉ិនទៀង បាន​បញ្ជាក់​ពី​កិច្ច​ការងារ​ដែល​អង្គ​ភាព​នេះ​សម្រេច​បាន​នា​ពេល​កន្លង​មក​។ ជាមួយ​គ្នា​នេះ លោក​ក៏​បាន​អះ​អាង​ដែរ​ថា បើ​សិន​អង្គការ​សង្គម​ស៊ីវិល ឫ​មជ្ឈ​ដ្ឋាន​ណា​មួយ​មាន​តម្រុយ​នៃ​អំពើ​ពុក​រលួយ​របស់​អ្នក​ធំ​ណា​ម្នាក់ គឺ​អាច​ផ្ញើ​មក​អង្គ​ភាព​ប្រឆាំង​អំពើ​ពុក​រលួយ​បាន ហើយ​អង្គភាព​នេះ​នឹង​ធ្វើ​ការ​ស៊ើប​អង្កេត​។

សម្រាប់​ទិវា​សិទ្ធិមនុស្ស​អន្តរជាតិ​១០ ធ្នូ ​ខាង​មុខ​នេះ ​អង្គការ​ការពារ​សិទ្ធិមនុស្ស​លីកាដូ​បាន​ចេញ​របាយការណ៍​មួយ​ស្តីពី​ការ​រំលឹក​ឡើងវិញ​ពី​ការ​រំលោភ​សិទ្ធិមនុស្ស​នៅក្នុង​ប្រទេស​កម្ពុជា​នា​រយៈពេល​១០​ឆ្នាំ​មកនេះ​។ ​ដូច្នេះ​នៅ​រាត្រីនេះ ​លោ​កអំ សំអាត ​នាយករង​ទទួល​បន្ទុក​ផ្នែក​ឃ្លាំមើល​សិទ្ធិមនុស្ស​នៃ​អង្គការ​លីកាដូ គឺ​ជាភ្ញៀវ​របស់​យើង​។ ​ឆ្លើយតប​នឹង​សំណួរ​របស់​វណ្ណ​ សុគន្ធា ​លោក​អំ សំអាត​ បាន​អះអាង​ថា ​នៅក្នុង​រយៈពេល​១០ឆ្នាំ​មក​នេះ ​សិទ្ធិ​ពលរដ្ឋ​ និង​ នយោបាយ ​គឺ​ត្រូវ​បាន​រំលោភ​បំពាន​ច្រើនជាង​នៅ​កម្ពុជា​។

ក្រុម​យុវជន​ Start​ from​ us ​គឺ​ជា​ជ័យលាភី​នៅ​ក្នុង​ការ​ប្រកួត​ប្រជែង​ពានរង្វាន់​យុវជន​គាំទ្រ​សិទ្ធិ​មនុស្ស ​ដែល​រៀបចំ​ឡើង​ដោយ​ការិយាល័យ​សិទ្ធិ​មនុស្ស​អង្គការ​សហប្រជាជាតិ ​នៅ​ពហុកីឡា​ដ្ឋាន​ជាតិ​អូឡាំពិក​នៅ​ល្ងាច​ថ្ងៃទី ​០៧ ​ធ្នូ​នេះ។​ កញ្ញា ​សី ចរិយា ​តំណាង​ក្រុម​ Start​ from​ us​ បាន​ថ្លែង​ថា ​បញ្ហា​នៅក្នុង​សង្គម​នឹង​អាច​ដោះ​ស្រាយ​បាន ​ប្រសិន​បើ​យុវជន​ហ៊ាន​ចាប់​ផ្តើម​។​ សូម​បញ្ជាក់​ថា ​នៅ​ថ្ងៃទី ​០៧​ ធ្នូ ​នេះ ​ការិយាល័យ​សិទ្ធិ​មនុស្ស​អង្គការ​សហប្រជាជាតិ​សហការ​ជា​មួយគ​ណៈកម្មាធិការ​សិទ្ធិ​មនុស្ស​កម្ពុជា ​ក្រុម​អង្គការ​សហប្រជាជាតិ​ប្រចាំ​ប្រទេស​កម្ពុជា ​និង​ប្រតិភូស​ហភាព​អឺរ៉ុប ​បាន​រៀបចំ​អបអរ​សាទរ​ទិវា​សិទ្ធិ​មនុស្ស​អន្តរជាតិ​ ១០​ ធ្នូ​ នៅ​ពហុកីឡា​ដ្ឋាន​ជាតិ​អូឡាំពិក​ ក្រោម​មូលបទ​ “​យុវជន​ក្រោក​ឡើង ​ដើម្បី​សិទ្ធិ​មនុស្ស​”​។ ​ព្រឹត្តិការណ៍នេះ​នឹង​ជួយ​រំលេច​ពី​តួនាទី​ដឹក​នាំ​របស់យុ​វជន​ដែល​ជា​ប្រភព​នៃការ​ជំរុញ​ឲ្យ​មាន​អនាគត​មួយ​កាន់​តែ​ប្រសើរ​។

ក្លឹប​អ្នក​កាសែត​កម្ពុជា នៅ​វេទិកា​និពន្ធ​នាយក​លើក​ទី១៦​នា​ថ្ងៃ​សុក្រ​នេះ បាន​លើក​យក​ប្រធាន​បទ «ប្រព័ន្ធ​ផ្សព្វ​ផ្សាយ​ព័ត៌មាន​កម្ពុជា​ក្នុង​យុគ​សម័យ ៤.០» មក​ជជែក​គ្នា ដើម្បី​ផ្សព្វ​ផ្សាយ​ដល់​និពន្ធ​នាយក​សារ​ព័ត៌មាន​ធ្វើ​ការ​ចាប់​អារម្មណ៍​ត្រៀម​ខ្លួន​ចាប់​យក​ឱកាស ដោះ​ស្រាយ​បញ្ហា​ប្រឈម ដើម្បី​ដើរ​ឲ្យ​ទាន់​ពិភព​លោក​។ លោក ប៉ែន បូណា ប្រធាន​ក្លឹប​អ្នក​កាសែត​កម្ពុជា លើក​ឡើង​ថា វេទិកា​និពន្ធ​នាយក​នា​ថ្ងៃ​នេះ បាន​សម្រេច​នូវ​សេចក្តី​ថ្លែង​ការណ៍​រួម​ចំនួន​១៤​ចំណុច ដោយ​ក្នុង​នោះ​បាន​ផ្តោត​សំខាន់​ទៅ​លើ​ការ​ពង្រឹង​ខ្លួន របស់​អ្នក​សារព័ត៌មាន ឲ្យ​មាន​សមត្ថ​ភាព វិជ្ជាជីវៈ​ទាំង​ការ​សរសេរ​ព័ត៌មាន និង​ទាំង​បច្ចេក​វិទ្យា នៅ​ក្នុង​យុគ​សម័យ​ឧស្សាហ​កម្ម ៤.០​នេះ​។

ក្នុង​រយៈពេល​ប៉ុន្មាន​ថ្ងៃ​ចុង​ក្រោយ​នេះ ​ក្រុមអ្នកគាំទ្រលោក កឹម សុខា និងលោក សម រង្ស៊ី​ បាន​​ប្រើ​ប្រាស់​​បណ្តាញ​​សង្គម​​ហ្វេស​បុក ​​និង​​ធ្វីតធ័រ ​​ធ្វើ​​ជា​​ទី​លាន​នៃ​ការ​វាយ​ប្រហារ ​ចោទ​ប្រកាន់ ​និង​លាបពណ៌​គ្នា​ទៅ​វិញ​ទៅ​មក​។​ ក្នុង​នោះ ​កូន​ស្រី​ច្បង​របស់​លោក ​កឹម ​សុខា ​គឺ​កញ្ញា ​កឹម ​មនោវិទ្យា​ ក៏​បាន​ចេញ​មក​រិះគន់​ក្រុម​គាំទ្រ​លោក ​សម​ រង្ស៊ី ​ដែល​បាន​ចោទ​ប្រកាន់​និង​លាបពណ៌​មក​លើ​លោក​ កឹម​ សុខា ​ថា ​ជា​អាយ៉ង​របស់​គណបក្ស​ប្រជា​ជ​ន​កម្ពុជា​ បន្ទាប់​ពី​ក្រុម​មេធាវី​ការពារ​ក្តី​ឲ្យ​លោក ​កឹម​ សុខា ​បាន​ប្តឹង​ទាស់​នឹង​ការ​បញ្ជូន​រឿង​ទៅ​ជំ​នុំ​ជម្រះ​។ ​បន្ថែម​លើនេះ​ កញ្ញា​បាន​ប្តេជ្ញា​ថា ​នឹង​ប្រើ​ប្រាស់​គ្រប់​មធ្យោបាយ​ទាំង​អស់​ ដើម្បី​តស៊ូ​លុប​បំបាត់​វប្បធម៌​លាប​ពណ៌​គ្នា​នេះ​។​ ប៉ុន្តែ​យ៉ាង​ណាក្តី ​លោក​ អេង ​ឆៃអ៊ាង​ ដែល​ជា​ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្តរជាតិ ​RFI​ នៅ​រាត្រី​នេះ ​បាន​ចាត់​ទុក ​ការ​វាយ​ប្រហារ​គ្នា​ក្នុង​​​បណ្តាញ​សង្គ​ម​នេះ​ថា ​មិន​អាច​យក​ជា​ផ្លូវ​ការ​បាន​ទេ ​ហើយ​ថា ​វា​គ្រាន់​តែ​ជា​ទស្សនៈ​របស់​បុគ្គល​ម្នាក់ៗ​តែ​ប៉ុណ្ណោះ។