Úrslitakvöld Músíktilrauna fór fram í gær í Norðurljósum í Hörpu og það var ung kona sem notar listamannsnafnið KUSK (Kolbrún Óskarsdóttir) sem kom, sá og sigraði ? og það er í fyrsta sinn sem einstaklingur sigrar í þesari gömlu og rótgrónu ?hljómsveita?keppni sem fagnar 40 ára afmæli í ár. Við heyrum í seinni hluta Rokklands í dag í KUSK, og líka hljómsveitunum sem lentu í 2. og 3. sæti ? rapparanum Gunna Karls og hljómsveitinni Sameheads, og líka hljómsveit fólksins ? Bí Bí og Joð sem var valin í símakosningu í gær. En í fyrri hlutanum ætlum við að skauta yfir sögu Músíktilrauna, ég og Arnar Eggert Thoroddsen og Árni Matthíasson sem hafa verið í dómnefnd Músíktilrauna lengur en allir aðrir ? og Árni hefur t.d. verið formaður dómnefndar svo lengi að það man enginn lifandi maður hversu lengi. Dúkkulísurnar koma við sögu, og Vök, Of Monsters And Men, Botnleðja, Kolrassa Krókríðandi, XXX Rottweilerhundar og fleiri Músíktilraunabönd. Lengi lifi Músíktilraunir!

Rokkland dagsins er endurfluttur þáttur frá 8. Júní 2008. Þetta er einn skemmtilegasti þáttur sem ég hef gert (finnst mér) og það var allt skemmtilegt við það. Þátturinn segir frá pílagrímsferð íslenskra tónlistarmanna til Bítla-borgarinnar Liverpool í lok maí 2008. Fararstjóri var Jakob Frímann Magnússon sem þá var formaður FTT (Félag tónskálda og textahöfunda) sem stóð fyrir ferðinni í tilefni af 25 ára afmæli félagsins. Hópurinn (ég var með) fór í Magical mystery tour- Bítla-skoðunarferð um Liverpool. Á Sgt. Peppers sjó í Cavern klúbbnum. Það var hátíðar-kvöldverður á Hard Days Night ? Bítla-hótelinu í Liverpool þar sem Alan Williams, fyrsti umboðsmaður Bítlanna var heiðursgestur. Svo voru tónleikar með Paul McCartney á Anfield Road, og síðast en ekki síst - tónleikar með sjálfum Hljómum í Cavern klúbbnum, 44 árum eftir að þeir spiluðu þar fyrst - árið 1964. Meðal þeirra sem koma við sögu í þættinum eru auk Jakobs, Bjartmar Guðlaugsson, Þorsteinn Eggertsson, Rúnar Júlíusson, Júlíus Guðmundsson, Jakob Bjarnar Gretarsson, Gunnar Thordarson, Óttar Felix Hauksson, Tryggvi Jónsson, Þorgeir Ástvaldsson, Sverrir Stormsker, Tryggvi Hübner, Edwyna skólasystir Lennons, Grímur Atlason, Gísli Helgason og ýmsir fleiri. Þetta er þáttur fyrir alla Bítla-aðdáendur og marga fleiri.

Gestur Rokklands í dag er tónlistarkonan Lovísa Elísabet Sigrúnardóttir - Lay Low. Hún sló hálfpartinn óvænt í gegn árið 2006 Þegar fyrsta platan hennar kom út, platan Please don?t hate me. Síðan hafa árin liðið, plöturnar hennar eru orðnar sjö talsins, með tveimur tónleikaplötum og einni leikhúsplötu, en í dag eru liðin 9 ár frá því Lay Low sendi síðast frá sér plötu. Hún vinnur ekki mjög hratt en alltaf þegar hún sendir eitthvað frá sér þá vitum við af því ? það vekur athygli, og oftar en ekki slær það í gegn. Hún gerði í fyrra lag mjög vinsælt með Eyþóri Inga, hún er stanslaust að syngja Þannig týnist tíminn sem var valið lag aldarinnar í samnefndum sjónvarpsþætti fyrir nokkrum árum, en hún söng þetta litla fallega lag eftir Bjartmar Guðlaugsson inn á plötu með Ragga Bjarna fyrir áratug. Það er eins og það sé einhver stemning í kringum Lay Low. Hún er einhvernveginn á réttum stað á réttum tíma og nú er nýjasta ævintýrið ? Júróvision lagið sem hún samdi. Lagið Með Hækkandi sól sem Systur - Sigga, Beta og Elin ætla að syngja í Torino í vor. Kvikmyndahátíðin Stockfish Film Festival 2022 sem verður sett í Reykjavík eftir helgi og Sineád O?Connor koma líka við sögu.

Í Rokklandi í dag er aðallega komið við á tveimur stöðum. Í Keflavík hjá Rúnari Júl, Trúbroti og Júlíusi Frey syni Rúnars. Hann var að senda frá sér lag og segir okkur frá því. Óskar Logi Ágústsson úr Vintage Caravan segir okkur frá Lifunar-tónleikunum sem fara fram í Eldborg 8. Apríl nk. En þar spilar Vintage Caravan Lifun og aðra Trúbrots-músík með Gunna, Magga og Shady úr Trúbroti. Pétur Grétarsson, Stefanía Svavars, Jón Ólafsson og Stebbi Jak eru líka með. Svo er það söngvarinn, lagahöfundurinn, íslendingurinn og tónskáldið Damon Albarn sem flutti nýja verkið sitt The Nearer the Fountain, More Pure the Stream Flows í heild sinni í Eldborg núna á föstudaginn - og það voru fyrstu tónleikarnir hans á íslandi í 25 ár, eða síðan Blur spilaði í Laugardalshöll á hátindi ferilsins. Damon Albarn er auðvitað söngvarinn í hljómsveitinni Blur, hann er líka Gorillaz og svo margt margt annað. Ég geng svo langt að segja að að Damon sé áhrifamesti tónlistarmaður sinnar kynslóðar í Bretlandi. Hann er búinn að eiga hús í Grafarvogi í 20 ár eða þar um bil ? og búinn að vera hérna mikið ? og sífellt meira á undanförnum árum og nýja platan hans The Nearer the Fountain, More Pure the Stream Flows - er innblásinn af náttúru Íslands og landslagi. Platan ? eða þetta verk var skrifað og samið að fullu á Íslandi. Damon sótti svo óvænt um íslenskan ríkisborgararétt og fékk hann í fyrra. Damon Albarn er ss. íslendingur. Rokkland ræddi við hann í síma í vikunni og við heyrum það í Rokklandi í dag og lög af nýju plötunni.

Tónlistarmaðurinn Mark Lanegan, fyrrum söngvari hljómsveitarinnar Screaming Trees lést heima hjá sér í Killarney á Írlandi 22. febrúar sl. hann var 57 ára gamall. Dánarorsök liggur ekki fyrir en hann fór ekki alltaf vel með sig. Hann drakk mikið þegar hann var yngri og var um tíma heimilislaus heróínsjúklingur. En hann er líka einn af forvígismönnum grugg-rokksins sem varð til á Seattle svæðinu í Bandaríkjunum fyrir rúmum 30 árum. Hann var ein af fyrirmyndum Kurts Cobain og það var Courtney Love ekkja Kurts sem kom Mark í meðferð á sínum tíma. Hún borgaði fyrir hann og leigði í framhaldinu fyrir hann íbúð ? hann var allslaus. Hann náði sér á strik og lifði nokkuð góðu lífi síðustu árin. Hann var aktífur, gaf út plötur og úraði. Gaf út tvær ævisögur 2020 og 2021. Hann var líka eftirsóttur gestasöngvari og söng og vann með fólki eins og Nick Cave, Moby, Unkle, Pj. Harvey, Soulsavers, Tinariwen, Neko Case, Manic Street Preachers, Marianne Faithful ofl. Lanegan kom til Íslands í nóvember 2013 og hélt tónleika í Fríkirkjunni. Rás 2 hljóðritaði tónleikana. Í þættinum í dag heyrum við brot frá tónleikunum, heyrum brot af viðtali sem Matthías Már Magnússon tók við hann á KEX-hostel daginn eftir tónleikana. Daníel Hjálmtýsson sem stóð að tónleikunum minnist vinar síns Marks, Magni Ásgeirsson og Hannes Friðbjarnarson gera það líka, sem og Kevin Cole útvarpsmaður hjá KEXP í Seattle. Lanegan dansaði oft við dauðann, var í dauðadái á sjúkrahúsi á sínum tíma í 10 daga eftir eiturlyfjatripp. Hann fékk Covid 2020 og það gekk næstum af honum dauðum ? hann fór alla leið í öndunarvél. Og núna í fenbrúar hafði dauðinn svo betur. Við heyrum í Erpi Eyvindarsyni ? Blaz Roca í þættinum í dag og heyurm nýja lagið hans; Slaki babarinn, þar sem Egill Ólafsson er gestur - og Kristján Sigurjónsson rifjar upp plötu Jethro Tull; Thick as a brick, sem átti 50 ára afmæli í vikunni.

Í Rokklandi í dag eru tveir tónlistarmenn í brennidepli. Annarsvegar ung og áhugaverð tónlistarkona að vestan, og svo ný-látinn tónlistarmaður frá Englandi. Unga tónlistarkonan heitir Árný Margrét, en hún sendi frá sér fyrstu fjögurra laga plötuna núna á föstudaginn, Intertwined, sem kemur út um allan heim á vegum One Little Independent Records sem gefur t.d. út Björk og Ásgeir Trausta. Tátni tónlistarmaðurinn er svo Gary Brooker, forsprakki hljómsveitarinnar Procol Harum, en hann lést núna 19. Febrúar, 76 ára að aldri. Gunnlaugur Sigfusson útvarpsmaður með meiru segir okkur frá Gary Brooker og Procul Harum.

Já það er Rokkland í dag eins og alla sunnudaga og ýmislegt og allskonar á dagskrá. Við kynnumst Jónasi Björgvinssyni (Jonas Bjorgvinsson) aðeins, en hann var að senda frá sér fyrstu sólóplötuna sína ? 50 ára gamall. Hann fékk Ómar Guðjónsson til að vera sín hægri hönd og upptökustjóri. Hann ætlaði að gera allt öðruvísi plötu og fá hina og þessa til að syngja lögin sín en endaði á að syngja allt sjálfur. Við heyrum í þeim Jónasi og Ómari í þættinum. Við heyrum líka aðeins í Gogga í Sigur Rós frá Abbey Road, en þær gleðifréttir bárust í vikunni að Kjartan Sveinsson er genginn aftur til liðs við Sigur Rós og þeir Goggi, Kjarri og Jónsi eru þessa dagana staddir í Abbey Road í London að taka upp nýja músík. Við heyrum í Gogga beint frá Abbey Road. Elvar Þór Hjörleifsson, Mamiko D. Ragnarsdóttir og Elíza Geirsdóttir Newman segja okkur frá nýju lögunum sínum. Svo heyrum við í Sting og Jimmy Page, Fontains DC, Abba og Patti Smith t.d. Ég óska konum þessa lands til hamingju með konudaginn.

Í Rokklandi dagsins eru konur í aðalhutverki ? ein íslensk og ein færeysk. Stina Missnasti Agustsdottir er íslensk tónlistarkona sem býr í Svíþjóð og ég spjalla við í þættinum en hún sendi í vikunni frá sér lag sem heitir Body af væntanlegri plötu sinni; Drown to die a little. Svo er það Guðrið Hansdóttir frá Færeyjum. Hún bjó um árabil á Íslandi - var t.d. í FÍH skólanum. Hún sendi í vikunni frá sér tvö lög ? fyrstu lögin í nokkur ár, og annað lagið syngur Eivør Pálsdóttir með henni. Margrét Eir segir okkur svo frá nýja laginu sínu, Days of Roses, sem hljómsveitin hennar Thin Jim var að gefa út í vikunni. Svo kemur Iggy Pop líka við sögu, en það var tilkynnt í vikunni að hann hlyti í ár sænsku Polar-tónlistarverðlaunin sem verða afhent í Stokkhólmi í maí. Meðal þeirra sem hafa hlotið þessi eftirsóttu verðlaun eru; Paul McCartney, Elton John, Bruce Springsteen, Joni Mitchell, Led Zeppelin, Metallica, Patti Smith og Björk. Og í dag, 13. febrúar, er alþjóðadagur útvarps. Útvarpsnotkun er mikil á Íslandi, meirihluti Íslendinga hlustar á útvarp á hverjum degi og 87% landsmanna hlustar í hverjum mánuði. Unga fólkið hlustar líka, í um klukkustund á dag (12-24 ára) ? samkvæmt nýjustu könnunum. Stefán Eiríksson útvarpsstjóri sendir hlustendum Rásar 2 stutta kveðju í tilefni dagsins.

Í Rokklandi í dag eru konur í aðalhlutverki ? nokkrar glæsilegar tónlistarkonur. Hildur Vala á afmæli í dag og við heyrum aðeins í henni í þættinum. Svo er það CAT POWER ? frá Atlanta í Georgíu ? hún átti afmæli núna í janúar, er fimmtug og frábær og var að senda frá sér plötu sem heitir Covers og þar syngur hún meðal annars lög eftir Frank Ocean, Jackson Browne, Shane McGowan ofl. Við heyrum reyndar aðeins í Band of Horses líka en þetta tvinnast allt saman einhvernveginn. Ég spjalla svo við tónlistarkonuna Sigrúnu Stellu (Sigrun Stella Haraldsdottir Bessason) sem er fædd í Winnipeg, alin upp á Akureyri en býr í dag í Toronto. Hún á topplagið á vinsældalista Rásar 2 um þessar mundir ? lagið Baby Blue.

Í Rokklandi í dag ætla ég aðeins að fjalla um tónlistarfrett vikunnar; Joni Mitchell, Neil Young og fleiri haf ákveðið að taka tónlistina sína út af Spotify í þeim tilgangi að mótmæla því að Spotify sé með podcast-stjörnuna Joe Rogan á sínum snærum, en Neil og Joni og margir fleiri vilja meina að hann sé að dreyfa fölskum og hættulegum skilaboðum um Covid, bólusetningar ofl. Til hlustenda sinna sem skipta milljónum í hverri viku. Hvað er rétt í þessu? Hver hefur rétt fyrir þér ? það hafa mrgir skoðun á því og ekki allir þær sömu. Heyrum um þetta undir lok þáttarins og Arnar Eggert Thoroddsen kemur með smá innlegg. En stærstan hluta þáttarins færi stóri maðurinn - Meatloaf sem lést núna um daginn. Og það var einmitt Covid sem tók hann. Mér skilst að hann hafi ekki viljað láta bólusetja sig. Ég minnist Meatloaf með hlýju ? hann á hluta í mínu músikuppeldi frá því ég var 8 ára gamall og platan hans Bat Out Of Hell hefur síðan hún kom út verið í miklu uppáhaldi hjá mér. Mér finnst hún frábær!