莊子身處喺戰國前中期，各種思想同學術都喺呢個時代展示出最大（而且最後）嘅活躍。儒墨作為兩大思想流派、黃老楊朱得到充足發展、法家適應現世政治需要、名家展露名理思辯。「其學無所不窺」嘅莊子，自然了解當時百家爭嗚嘅盛況。

但係，有邊啲思想真係影響住莊子呢？儒墨固然係莊子所非常著意，《齊物論》入面提到「道隱於小成，言隱於榮華。故有儒、墨之是非」就係一方面描述儒道之間辯論之多，另一方面扮演斷水流大師兄，表示儒墨都有問題。

雖然從立場上，我唔完全接受王博嘅判斷。佢嘅立場較為傳統，即係莊子反孔而繼老。但我呢集嘅目的唔在於批評佢，而我認為大家熟知莊子反孔繼老嘅立場亦都係一件好事。你接受嘅，起碼有個立場可言。唔接受嘅，起碼有個反駁嘅起點。

我哋第三集莊子哲學入門會講到王邦雄嘅睇法，佢認為讀莊子要先讀〈天下〉，因為〈天下〉嘅特色就係要從莊子視角去評斷百家，從莊子面對百家嘅態度，就可以反顯出莊子嘅態度同工作。我喺線上讀書組有同大家睇過〈天下〉嘅內容，但並唔係每一個人都有時間逐句睇〈天下〉，王博呢篇短文〈引言：莊子的思想世界〉就可以當係雞精版，幫我哋睇睇一個傳統嘅莊子，係點睇孔墨、楊朱、惠子、列子、老子。最後，王博用咗一段我無法反駁嘅說話，總結莊子同諸子百家嘅關係。

• 〈天下〉係中國第一篇論百家思想嘅文章，後有荀子、韓非
• 嚟緊會講多啲莊子，如果大家未聽過之前講莊子嘅集數，記得聽咗先
• 極度建議大家去聽《存在莊子》系列