Sepetuko

BABA atafuta kura za Mt Kenya lakini aandamana na vijana wasiojua kuzungumza, Je wazee wa jamii watakubali kumwoza binti aitwaye ‘kura za Mt Kenya?’ William Ruto akielekea kule huandamana na wale wanaojua kuzungumza.

Awali shujaa wa mikutano ya hadhara, mwanasiasa wa mvuto mbele ya umati alikuwa BABA. Siku hizi shujaa wa umati na kampeni za mikutano anaibuka kuwa Dkt William Ruto. Je mbinu hizi zitamfaa nani zimlemee nani?

Mawaziri na wabunge wana uwezo wa kurekebisha bei ya mafuta; wabunge kulia machozi ya kwikwi sasa ni kuwachezea wakenya mchezo wa shere- ni sherehe za tumbili!

Eneo la Mt Kenya linachangia 23% ya idadi nzima ya watu nchini Kenya, kudai 40% ya nyadhifa serikalini ni kuwafanyia wakenya stihizai na kejeli. Yafaa wanasiasa hao wafanye utafiti waelewe ukweli wa mambo!

Kuhusika ufisadi ni kutoelimika. Elimu ya vyuoni yafaa ifunze Filosofia. Filosofia hufunza maadili; nidhamu, tabia na mienendo. Anayedai kuwa na elimu ya chuo kikuu lakini anahusika ufisadi hajaelimika!

Adhabu yaja baada ya miaka mitano ya kutokea ufisadi uliovuruga ushujaa wa wanamichezo wa Kenya Rio De Janeiro. Sakata nyingine zinazovuruga maisha ya wakenya zasubiri kusuluhishwa, kuu zaidi ikiwa NYS!

Mafuta yakiwa ghali, gharama ya maisha hupanda maana mafuta ndio kawi ya kuendesha maisha. Serikali inafahamu hilo lakini inakosa roho ya kulegeza gharama hizo kumpunguzia mkenya mzigo.

Mkataba wa Anglo-Maasai treaty -1904, uliifanya jamii ya Maasai kuwa iliyoathirika zaidi kwa ukoloni kuliko jamii nyingine za Kenya. Kwa hivyo ahadi za wanasiasa zisiwe za kimatamshi tu. Ziwe ahadi za kurekebisha athari za ukoloni.

Nathan Mtume alifika mbele ya Daudi Mfalme na kumwambia ukweli kwamba alikuwa amefanya makosa. Akasema pia kwamba Mungu atamwadhibu! Kuwaambia viongozi ukweli ni jukumu la viongozi wa dini.

Idara za usalama zafaa kuangalia kwa umakini chanzo cha mavamizi ya Laikipia; kichocheo ni ushindani wa 2022.