科學從十六世紀開始窺視宇宙，當宇宙變得極度宏大，地球亦慢慢從存在嘅中心被踢到銀河系嘅邊緣，最終構築出一個冷冰冰嘅宇宙，唯一嘅熾熱就只有一開始嘅Big Bang同恆星嘅核聚變。失去地心說，彷彿暗示住，生命只係隨機嘅意外結果。霍金話：

「我們只是「化學渣滓」，存在於一個中等大小的星球表面，繞著一個沒什麼重要性的星球運行。」

唔通，人只係「無意義宇宙中的被動機械」、喺無關痛癢嘅星球、過住無關痛癢嘅生活？

其實，自然科學並唔係對天文學嘅唯一詮釋。《人類大宇宙》嘅作者喬．馬錢特希望從一個宏觀視角去檢視人類對宇宙信仰嘅「深度歷史」，亦即係我哋喺上集所提到嘅「深邃時間」。用十二個故事，帶你重新體會「深邃時間」下嘅天文學，透過將人類有紀錄以嚟對天文嘅想像，我哋會發現天空點燃人嘅生命力同創意，引發人無限聯想。

好長時間以嚟，考古學家都唔選擇用天文知識去理解石器時代嘅建築、藝術、文化。作者表示，與其話學界否定石器時代嘅人擁有天文知識，倒不如話根本無討論呢個可能性。因為考古學家認為，星座最早嘅文字紀錄係源自於三千年前嘅巴比倫祭司，佢哋會將昴宿星團睇成天上公牛背上嘅鬃毛。

換言之，金牛座係三千年前嘅產物。所以當人發現拉斯科洞窟中畫住大大小小嘅公牛，都無諗過呢班二萬年前嘅狩獵採集者會有金牛座嘅概念。

但係，近年有唔少人類學、神話學同天文學等等領域嘅專家都主張，人應該徹底重新評估舊石器時代祖先嘅知識同能力；佢哋嘅故事，可能有住極深遠嘅影響力。甚至，有天文學家表示，兩萬年前嘅拉斯科洞窟壁畫上面嘅原牛，唔係畫緊狩獵場境，而係天上嘅金牛座。到底點解佢會咁諗呢？

今集，我哋就要一齊思索：金牛座係三千年前巴比倫人嘅創造，定係兩萬年前嘅產物呢？

你會發現，天空嘅故事植根於遠古文化，而天空對人類嘅影響，比你想像中深遠得多。