主流嘅觀點認為，如果想得到人生當中夢寐以求嘅嘢，例如係大隻、成功、財富自由、唔使煩惱、可以有多啲時間做自己鍾意嘅嘢……咁就唔使問阿貴，最好嘅方法就係設定確切目標。

好多年以來，《原子習慣》嘅作者詹姆斯・克利爾（James Clear）都係用呢一種方式面對習慣，亦即係話，將每一個習慣視為達成目標嘅手段，呢種就叫做目標優先嘅心態。經過年月嘅洗禮之後，佢發現到呢種目標優先嘅心態係一種誤入歧途，因為成果同自己所設定嘅目標係冇乜關係，而喺同自己遵循着系統息息相關。

系統同埋目標有啲乜嘢唔同呢？著名諷刺漫畫《呆伯特》嘅作者史考特．亞當斯講到：「目標是你想要達到的成果，而系統是讓你達到那些成果的過程。」

系統聽落去相當重要，咁咩係系統呢？

• 如果我係球隊教練，咁我嘅目標就係要奪得冠軍，而我嘅系統就係要徵集球員、管理教練同訓練模式。

• 如果我係企業家，咁我嘅目標就係建立起價值百萬美金嘅事業，而我嘅系統就係測試產品概念、請人、行銷

• 如果我係一個音樂家，咁我嘅目標就係演奏好一首歌，我嘅系統係管理練習嘅頻率、處理困難嘅部份、尋找指導者

有趣嘅問題係：如果我哋徹底無視目標，只係關注系統，仲能唔能夠成功呢？

作者嘅回答係，答案係肯定嘅。

以運動為例，但凡牽涉競技嘅運動嘅目標當然就係想隊波攞到高分，但係攞到高分唔係靠住望住個計分板就得。

「真正能帶來勝利的唯一方法，就是每天都進步。贏得三屆超級盃的美式足球教練比爾．沃爾希是這樣說的：「分數會顧好自己。」同樣的道理也適用於人生其他領域。想要更好的成果，就不要管目標了，把焦點放在系統上就好。」

目標能指引方向，但進步靠系統實現。過分專注目標而忽略系統，往往事倍功半，因為要進步就要靠系統。諗得太多個目標，而用太少時間去設計個系統，就會出現好多問題。

今集係十分鐘跟住《原子習慣》改變人生（3），我會同你一齊睇下點解作者要咁強調目標係方向、系統係進步——原來目標優先嘅心態，會令人陷入嘅四個誤區，使人追求目標會越追越攰。