丈姆佇跤目的空喙，藥仔已經抹冬外矣閣猶未好！丈姆有足固執的主觀意識，醫生的治療若無隨有變好的感覺，伊就會揀咧看，甚至藥仔愛按怎食？按怎抹？伊攏有伊家己的看法。

丈人佮丈姆已經做六十外冬的翁仔某，其實伊有看過虔誠拜神的丈姆，幾偌擺神奇的靈異事件。照理講嘛是一個信神的台灣人才對，但是這擺若像丈姆閣按怎淒慘拜，伊感覺神明就是無來共鬥相共。彼工二舅怹翁仔某來厝裡開講，丈人就講「阿~恁咧講有啥物神明，我攏無咧共信啦！無~那有空喙抹規年迵天攏未好的！」

聽到丈人按呢講，丈姆除了氣怫怫叫丈人彼隻喙較踮咧！毋通烏白亂講，就跟阿舅兩個姐弟仔，輪流講怹所知影的，神明來共咱保庇過的代誌。丈人踮踮佇邊仔聽，表情就是一付「恁講有我就愛信喔？」的感覺。

丈人講伊無信神明？其實嘛是無影的，伊只是共伊對丈姆艱苦的毋甘，佮對丈姆固執的不滿，用挑戰丈姆相信一世人的神明地位，看會當來共改變無？希望丈姆會使莫彼固執，加聽一寡仔醫生講的話無？看彼隻跤會較緊好無？

今仔日的面冊，跳出一篇四年前寫的網誌，我共重貼咧下跤，內底嘛是寫到一寡朋友序大拄著的「先生緣，主人福」的經驗，予逐家參考。

最近有一個作家講伊學電腦繪圖，閣共伊繪的作品展予人看，有網路頂的鄉民共講，遐毋是妳用電腦來繪圖，是AI替妳繪的！作家毋但勥寫，喙嘛足勥謅，佇網路頂跟人戰幾偌工。落尾這個作家知影是伊講毋對，跟逐家會失禮了，AI替人繪圖的戲就散場矣。

一般的人分袂清啥物叫電腦繪圖，啥物是AI繪圖？專業咧繪圖的人是拄著另外一種問題：無伊的允准，有人就共伊繪圖的筆法、風格，提去作AI的學習庫，AI學了，就若像是伊繪的仝款，閣會使提去賣錢！

我看，考慮到著作權的問題，可能足濟文學、藝術作品，創作者若猶在世，就袂使共怹的作品提去飼AI，無AI會犯罪。AI干焦會使去學死人的物件爾。

# https://bit.ly/3IvPhtG

初一早，初二早，初三睏甲飽。暗時八九點就去睏的人，五六點起床嘛是睏誠飽矣。猶袂六點就騎丈人的鐵馬出門，想欲去昨早起有開門的早餐店食早頓，騎到位紲無人開門做生理，只好對下一個庄頭繼續騎。

好同事Kelly姐仔最近跟阮牽仔真有話講，三不五時會跟阮翁仔某中晝作伙食素。彼工毋知怹兩个人進前咧講啥？我捧飯菜坐落來時，干焦聽著Kelly講「相由心生」這句成語有當時仔嘛無啥準，因爲伊捌看過有人就是生作貓面橫肉、歹面腔，若像會刣人放火咧！但是對人卻是足軟心、足善良。

伊講到喙角全泡，我是聽到足礙謔矣！「相由心生」是咧講咱心理會影響著生理外表的變化，抑是講咱想啥就會看到啥的現象，那會去提「人不可貌相」來鬥，講「相由心生」無準咧！這个時陣我就真會當體會孟子伊講的「余豈好辯哉？余不得已也！」

俗語講了真對：心歹無人知，喙歹上厲害。莫怪阮牽仔會叫我莫定定跟人答喙鼓，按呢會無人緣、顧人怨，無人愛跟我講話，無人欲跟我交睬。新的一年，我就對遮開始反省。送二〇，接二一，自我反省好過日。

這界跟同事的早會讀冊會，是討論莊子的齊物論，有人舉例的話題講到袂收山，連別組的同事嘛聽到想欲來插一咧仔喙，發表伊的高論跟感想。

「欲是其所非而非其所是，則莫若以明。」莊子教咱若會使用日頭佮月娘的高度來看代誌，就袂佇遐咧諍講誰對誰毋對矣！無論按怎講，攏有對的道理，嘛攏有毋對的所在。

靜思語拄好有一个故事按呢講，我佇樓跤聽到邊仔有人咧罵我，我會氣怫怫足袂爽；我若是佇十樓看對樓跤罵我彼个人，紲毋知伊是咧罵我？抑是咧跟我相借問？我若是佇101大樓的茨頂看綴樓跤，凡勢罵我的人佇跎位著看無揣無。咱若親像莊子佇齊物論內底所講的，會使爬起到日頭月娘的懸度看倒落來，其實萬事萬物看起來攏仝款囉，就干焦是咱這粒色水足迷人的地球爾爾。

咱的過年欲閣到矣，愛來揣一寡仔寫春聯的靈感。明年是兔子年，用「兔」跟「吉祥話」「台語」飼予google，揣到的攏是華文成語的諧音較濟，只好家己來想看覓。

我第一個想到的是「掠兔子」，彼是台語用兔跟吐的仝音，講人掠兔子就是歹腹肚抑是暈車咧吐，這欲提來鬥吉祥話若像無稍適合。

第二個想到的是細漢看布袋戲定定聽會到的「心涼脾土開」，但是布袋戲的音聽起來較像「心涼脾吐開」。布袋戲佇較早時陣遐時行，誠濟人攏綴咧按呢講，我就用諧音來替換做「脾兔開」，這句提來鬥春聯會較合。

明年輪到合我的名，「振」跟「陽」就真正想無步矣，只好查網路頂的字典。台語查到的詞足少的，華語查到的較濟，而且足濟詞是對古冊出來的，後來變成華文的四字成語。

老一輩佇台灣讀過漢文的人，怹攏是用台語咧唸古文；細漢看的布袋戲，嘛定定會搬到歷史人物唸古文的劇情，有人講河洛話是古早中原漢人的語言，按呢彼時陣的讀冊人寫文章，嘛是會用台語來讀才對。

「振」做頭「陽」收尾，拄好有揣到兩句成語鬥做伙。「振鷺充庭」是比喻朝廷內攏是賢良之士；「鳳鳴朝陽」是呵咾人講伊的德行跟才華攏足優秀的。按呢共寫做伙，頂聯就是：振鷺充庭鳳鳴朝陽，祝賀咱的親戚五十，厝內攏出勥人，無論大人囝仔，攏有好品行，好才藝，通人佮意跟尊重。

「心涼脾兔開」嘛愛共改做八字句才會使做下聯。心會涼就是中醫講的養心降火氣，按呢用養心降火代替心涼的下聯就出來矣：養心降火脾兔全開。祝賀大家喙斗好，身體健康食百二。

兔年的春聯就是：

振鷺充庭鳳鳴朝陽

養心降火脾兔全開

暗頓食麵，下晡五點捅爾，店裡干焦兩三塊桌有人客，其中有一對爸仔囝，予我感覺誠心適。阮牽仔嘛有注意著，直直跟我使目尾，叫我越頭看一咧。

老爸看起來真少年，可能才三十左右，囡仔嘛誠細漢，差不多三四歲爾。囡仔講話較細聲，我聽無啥有，但是少年老爸講話足洪聲，丹田有力，應該店內的人攏聽甲一清二楚。

囡仔：.........

老爸：我干焦欲跟你講台語爾，佇厝內咱就是講台語。你若去學校讀冊，就會學國語，恁老師跟同學攏講國語較濟，我袂煩惱你的國語學袂好。外口無人跟你講台語，轉來厝裡，若閣無通講台語，你大漢就袂曉講囉！

囡仔：..........

老爸：你自出世我就跟你講台語，即馬你三歲，會曉跟阿爸講台語矣，阿爸足歡喜。

...............................................

重視母語，推捒母語的家長，我干焦佇網路頂迷眾頁內底拄過爾，猶毋捌佇我家己的生活中，看著人遮骨力做。若社會中的少年爸母對家己的母語攏有這款覺醒，按呢台灣各族群的母語會使活落來的機會就愈來愈大了。

查某囝聽著我家己一個人佇遐咧踅踅唸，雄雄問我是毋是欲用台語寫春聯，我掣一趒！伊那會知？伊講看我佇遐憨神憨神伊就臆出來矣。敢講伊有聽著我咧唸啥？我就字猶鬥袂好勢咧，抑是我頭殼內想啥攏寫佇面頂矣？

今年貓鼠仔年，全世界攏予病毒摃甲麋麋卯卯，人的生活方式改變誠濟。但是我家己改變上濟應該是共母語抾轉來捷講捷用，食甲五十偌偌這年歲，才開始學台語漢字按怎寫。雖然有一寡面冊朋友看袂慣勢台語漢文，佳在秦始皇有統一文字，朋友看了應該有捌七八成的意思，賰無偌濟才用臆的就好。

合生肖鬥人名寫佇春聯內底，是我這幾冬過舊曆年的儀式之一。紲落來2021是牛年，我就用台文來寫，繼續我這個過年儀式。

牛佇古早農業社會中，是咱做穡的好朋友，氣力大，性地溫純，不管是拖犁鬆土、拖車載重，真濟作田人攏愛靠伊食穿。人會老，牛嘛會老；人食老有幾若䆀，牛食老穡頭嘛會作袂振動。所以老牛若猶會犁田，就表示食老閣誠勇健；若食老無老歲仔款，閣綴少年人咧時行流行，俗語講老牛展春草，雖然是咧共剾洗，但是講老歲仔猶綴會著少年人的跤步，嘛是一種呵咾才對。

頂聯就用「老牛犁田展春草」，來祝賀蹛佇這茨內的規家伙仔，老的勇健，毋旦體力好會犁田，抑有家己的田通犁，而且思想觀念袂輸少年人，綴著時代一直咧進步。

下聯來鬥阮牽仔的名「美绣」。绣若鬥尾字，讀起來會共頂聯的草字無仝韻，按呢鬥中央就好。真濟同事朋友攏知影阮牽仔誠勥變東變西，物件若佇伊手頭，不論是包裝禮物抑是佈置環境，伊做起來攏足幼路，若生佇查某囡仔愛學針黹的古早時代，一定是足勥挑花刺繡。按呢下聯用「美人手幼绣花勥」來讚嘆茨內的女主人會合。

所以，牛年的春聯鬥好囉。

「老牛犁田展春草」

「美人手幼绣花勥」

華語講的油條，台語叫油炸粿。台語叫做粿的喙食物，我知影的攏是用米做的，譬如講菜頭粿，紅龜粿，草仔粿...，不捌食過用麵粉做的，但是油炸粿卻是用麵粉落去糋的。

彼工看一齣báng-gà，一個日本浪人問一個華人阿媽，這食起來脆脆真好食的物件叫啥？阿媽共講叫做「油炸檜」。

原來有一個民間傳說，講油炸粿是宋朝傳落來。彼時陣大奸臣秦檜怹翁仔某，害死忠良岳飛了後，引起全國人民的憤慨，有人就用麵粉捏成怹翁仔某的模樣，黏作伙了，用油共糋來食，順續喊厝邊頭尾來看「來食油炸檜喔！」

有人講秦檜其實毋是啥物大奸臣，伊只是一個主和派，跟岳飛的主戰派，立場無仝爾。南宋後來會使偏安遐久，閣拖過百外年來看，主和派的秦檜顛倒貢獻較大。

彼時陣的宋朝皇帝，無定著本體就無想欲相戰，共主戰派的岳飛處死了 ，紲想袂到會引起遮呢大的民怨，就趕緊叫御用寫手，用戲劇、小說、抑是民間傳說，塑造主戰派的政敵主和派秦檜，是一個十惡不赦的大奸臣。這款𤆬風向的手段，會使講是今馬側翼媒體一條龍的祖公矣。

一面食早頓，一面咧看ipad的查某人，無代無誌紲雄雄大聲，共坐佇膨椅，當咧盹龜的查埔人問講：恁查某囝哪會愛遐早出門？攏是你直直共催啦！

查埔人三四點就起床，早頓食飽愛略仔盹一下的睏蟲，紲予怹某問一下走甲無半隻。

「伊昨暗就講，早起八點五十愛到啊！當然嘛愛較早出門。我哪有共催？我是看已經八點矣，提醒一下爾。」

「我看時間表，八點五十到九點二十是第一批二百號內的人報到，伊是二百外號，九點五十進前到就好矣。」

「奇怪呢！厝內底上無時間觀念的人，阿就不是你的活動，你是共人佇遮咧煩惱人愛幾點到欲創啥？伊的活動伊家己知影時間啦。」

查埔人耳空重，講話加較大聲，若佇辦公室予同事聽到，一定閣予怹剾洗「你嘛莫遐大聲，對恁某較好咧！」

查某人煩惱查某囝記毋對時間，外口閣咧落雨，毋知愛佇遐等足久無？

查埔人貧惰共查某人諍，拍開投影機，揣看網路頂有出新的báng-gà無？

兩個人恬恬無講話一睏仔，就聽著查某人用已經無煩惱的聲調講「伊十一點就到神社矣，伊講報名的群組內底，第一批有真濟爬袂起來的人，想欲調較晚的時間，伊昨暗就跟人換好矣。」

「你看，你是毋是加操煩的！伊的時間觀念是種著我，上無時間觀念的人閣對家己的查某囝無信任。伊就是想欲參加早起的活動，嘛想欲中晝前去神社開店，拄著問題就想辦法解決，所以人早就共時間撨予好矣，輪袂著你來替伊煩惱遮的有的無的啦。」

查埔人早就放手予查某囝去飛，毋知查某人當時才放會落手啊！