佇合唱團內底學到一條足出名的英文歌You raise me up的主調佮合音的唱法，今仔日是2022年的頭一工，我就用三腳貓的吉他，家己彈，家己唱，家己合，祝賀所有的親戚朋友新年快樂，感恩大家過去對阮的牽成，勞力！

人攏講阮是搝保險的，搝到旦嘛二十偌冬矣。raise me up 我共翻做「搝我起來」拄好跟我的工課穡頭有合。

https://youtu.be/jzxF7HF3ygY

When I am down, and oh! my soul so weary;

佇我失志的時陣，噢! 我的靈魂遮爾忝；

When troubles come, and my heart burdened be;

拄到麻煩來，我的心沉重;

Then, I am still and wait here in the silence,

彼時陣，我猶原踮遮恬恬等待，

Until you come, and sit awhile with me.

等到你來，陪佇我身軀邊坐一睏仔。

You raise me up, so I can stand on mountains;

你搝我起來，我才會當徛佇山頭懸頂；

You raise me up, to walk on stormy seas;

你搝我起來，予我會當行過風浪海湧；

I am strong, when I am on your shoulders;

有你的肩胛頭予我倚靠的時陣，我就強壯勇健；

You raise me up… to more than I can be.

你搝我起來，超過我做會夠的所在。

大學同窗佇下晡二三點的時陣，擲予我面冊頂的私訊，若照伊是美國人的美國時間來講，應該是老大人半暝仔厚尿，跔便所順紲耍手機仔才對，無伊無遐早起床的。開講了才知影伊今馬人轉來佇台灣矣。伊講伊跟另外一個同窗仝款，跟人咧綴流行。我知影伊講的彼個同學，是舊年底編號一百號以內的境外移入確診個案。

舊年有注預防射的人猶無偌濟，今年全世界是淒慘注，美國嘛是注了緊的國家，我知影這個同窗已經注過兩筒矣，那會佇美國好好，轉來台灣就隨中？伊閣丟一個咱CDC公佈的，12/29境外移入確診的名單，內底得病的，就干焦有一個查晡人是五十偌歲對美國轉來的。

「老楊，你誤會啦！是彼個三十偌歲的。我轉來住佇板橋的防疫旅館，三工後接到板橋衛生所敲電話來講，跟我仝班飛機，坐我附近的人得病矣，叫我家己愛細膩。我是攏無啥物無爽快的症頭啦！毋過，拜一恁英文總統就共我關來病院矣！按算欲共我關到1月7號。」

「老崔，你著較保重的！按呢你去注預防射，毋就注心酸的？到底是有效抑無效？既然入去矣，你就安心仔住，我知影病院的病房冷氣攏開足強的，你衫就穿較燒的。」

「是啊！我看我無予病毒毒死，會先佇病院寒死，遮是冷到若像太平間咧囥死人的所在！」

今馬全世界跟咱有飛行機咧飛的國家，有注預防射的人應該比無注的較濟矣，所以境外移入確診的人內底，無注的跟注猶未兩筒的紲變是少數。專家攏講這叫做病毒變種，突破感染。其實，預防射自頭到尾就無人保證你袂得病，說明書跟你講到足清楚的，跟無注的人比起來，有注預防射的人較少得病爾，毋是袂得病。

橫直注射嘛有可能得病，咱就免遐大驚小怪，政府嘛免發明新的名詞來安慰民眾（變種、突破...若像是嚇驚民眾較多？），嘛免叫人三筒四筒直直注落去，這毋知是對民眾好？抑是對預防射的廠商好？注了閣得病的人，好歹運爾，人若衰，種匏仔嘛會生菜瓜，流年無順，凡事細膩就好。

相片翕了媠抑無媠？予人看了會佮意無？我本來掠準是一件足主觀的代誌，就干焦是你欣賞的角度、我佮意的色水，有無仝款的所在爾。毋過，自從查某囝開始對翕相有趣味，讀大學的時陣就開家己的錢去買一台單眼相機，規家歲仔鬥陣出去𨑨迌幾擺了後，我才知影，平平是仝一個景，查某囝翕出來的相片就是較好看。伊若共阮翁仔某翕，一擺就ok，若是換阮翕伊，就愛翕幾偌擺，阮是做到流汗，紲予伊嫌到流瀾。後來，伊若有想欲翕佗一咧景，就會先叫阮做model去徛予好，伊先翕一張予阮看。看了換伊去徛，阮才學樣綴咧翕就好矣。綴咧翕講起來真簡單，翕起來才知影一丈差九尺。毋管練啥物功夫，一定攏愛開時間落去磨，才會有出師的時陣啊！

黑色趣味是一種予人想欲笑閣笑袂出來的笑詼，這齣「最後一個平安夜」（https://www.youtube.com/watch?v=5vg15qSmnwU）

的電影就是這款趣味。尤其佇這馬猶閣無一個政府敢來宣佈講免閣管制矣，會使恢復正常生活的疫情期間，咱敢有法度做會夠親像電影內面彼個叫做Art的查甫囡仔仝款？

電視台、網路頂，規工放送的攏是政府、專家的講法，身軀邊的大人嘛干焦知影接受佮相信，對家己未來的生存權利一點仔攏無主張。Art問伊身軀邊的大人，教怹數學的老師就有講毋對的時陣，是按怎政府佮專家一定對？無定著有人做實驗的時陣踅神去，做出來就毋對矣！伊無想欲放棄，伊無愛跟大家仝款去食藥仔死。

電影看煞，我干焦想到這馬的預防射，政府是叫咱對二筒三筒四筒直直注起哩，若是電影內底彼個查甫囡仔Art一定會問講：按呢敢對？

日本觀光局一開始干焦邀請佐藤先生佇十月的台中國際旅展，予來看鬧熱的民眾體驗原汁原味的日本茶道，結果現場的民眾是呵咾甲會觸舌。旅展結束了，日本觀光局隨跟先生注文，十一月的台北國際觀光博覽會佮十二月的高雄旅行公會國際旅展，一定愛閣去現場，款待遮爾愛護日本文化的台灣民眾。

南部的朋友會使佇這個禮拜跟後禮拜一兩工，去高雄旅行公會國際旅展的日本觀光局遐踅踅喔！

人的記持真奇妙，定定咧叫的人名，有當時仔就是會雄雄想袂起來，顛倒有一寡三四十冬來攏毋捌閣啍過的歌，最近紲直直想到伊的旋律，甚至歌詞猶閣唱會出來！

今馬差不多逐工攏會開二三十分鐘，共欲合唱的歌練一遍，照理講洗腦的效果應該干焦這幾條歌才對，神奇的是，不但這幾條歌定定佇我頭殻內踅，連四十冬前國中合唱過的歌曲嘛浮出來鬥鬧熱！

國中合唱團的歌攏是藝術歌曲，伊無親像流行歌仝款，電視、電台抑是百貨公司、店面，四界攏有人咧放，畢業了就毋捌唱嘛無底聽。本來叫是已經攏袂記持，想袂到四十冬後加入讀冊會合唱團練新歌，紲干焦去搜到一塊拍毋見佇眠床跤的錄音帶仝款，放出來聽攏是國中合唱的歌曲。這款的經驗真正神奇閣趣味！

阮查某囝嘛愛唱歌，應該有種到我，最近佇Youtube揣著一支影片，是十偌冬前做予同事早起運動喊口號用的，會使算是第一條我跟阮查某囝鬥陣唸的歌。