我會記持細漢時攏是講茶甌仔，一甌水，敢若無咧講茶杯仔。但是開始學寫字講華語了，紲毋捌用過甌這字，攏是寫杯子、茶杯。

毋知有人研究過無？甌跟杯敢有啥物無仝？我干焦佇google揣到唐朝開始啉茶的時陣，吟詩做對的讀冊人就是用茶甌，共茶文化傳去日本的宋朝嘛是講茶甌，一直到清朝近代才有咧講茶杯。但是唐詩內底就有用到杯這字，較濟攏是跟啉酒做伙。我家己的感覺是甌就是較細塊的碗，無跤，用手捧的；杯是有跤的，用攑的。

上早聯絡長照2.0來看老菩薩是佇前年的十月份，彼時陣老菩蕯會使用四跤拐仔佇厝內底沓沓仔行，伊就感覺免遐工夫，閣愛開錢佇便所浴間內底做遐的扶手，來予伊較好扞較好搝。一份報告的期限是三個月，三個月內照報告建議去做環境改善，有通向政府申請淡薄仔補助。若超過三個月才想欲做，就愛閣去共報告延期才有通申請，無就干焦開家己的錢爾。

長照2.0逐年攏愛重看一遍個案的狀況，一年的時間真緊就過去。舊年十月份長照管理師閣來看一遍老菩蕯，老菩蕯仝款對做便所浴間的扶手無興趣，這擺管理師就無趕緊叫輔具中心的老師來看厝內矣。

今年過年了，老菩蕯感覺體力有閣咧退化，扶手可能愛做矣，管理師就佇二月份請輔具中心的老師來看厝內，出報告。我嘛請管理師介紹有咧做扶手的公司，提供價數予老菩薩參考。

老菩蕯過去是扞公司財務的，對價數較敏感，伊共感覺無需要做物件攏劃掉，譬如講壁頂有做扶手就好，共馬桶疊較懸的彼就免做，閣叫我加比幾間仔，看價數有較俗的無？

四月份，共存的疫情爆發，做扶手的毋敢來厝內量寸尺，老菩薩嘛驚予生份人穢到，叫人暫時莫來，一拖就拖到五月，報告閣過期矣。

頂禮拜，老菩薩的跤雄雄變足無力，毋知是毋是吃藥仔傷散的關係，連扞四跤拐仔就站未牢，免講是想欲共跤徙振動。大嫂趕緊買一張馬桶椅囥眠床邊予方便，大孫子嘛倩一個復健師來厝內教伊復健，伊今馬會使家己活動的範圍，干焦賰眠床到離眠床邊徙一兩跤步的藤椅爾。

報告有閣請輔具中心閣延期三個月矣，我就笑笑共老菩蕯問講「扶手是欲叫人來做無？」，伊講「阿旦今馬按呢毋著用袂到矣！敢愛做？」我干焦會使共鼓勵講「袂要緊，咱盡量復健，若會使恢復跟進前仝款用四跤仔來徙動，嘛會使家己去便所浴間，咱才來做。」

出門在外，身體健康真重要，若是有人毋知影咱台灣的健保有偌好？台灣的醫護人員有偌了不起？會使綴伊去蹛一擺就知影！看伊寫去蹛院的過程，咱若身體已經足無爽快矣，閣愛像伊按呢佇病院內底四界走傱，咱就知影蹛佇台灣有偌幸福！毋過，她有寫到一個現象，咱台灣人一定愛有覺察，尤其是跟中國咧比較時，更加袂使輸才對。

伊講伊入去成都病院了，拄到的逐個人攏干焦欲跟伊講四川話，一定愛伊大聲用喊的，用嚷的，叫怹講伊聽有的中文，才有人欲跟伊講怹彼叫做普通話的華語！想袂到佇政治上遐爾仔專制獨裁的共產黨，竟然會使予地方母語保存了遮好！佇故鄉生活的人，自然會先講母語，除非對方是外地來的，聽無伊咧講啥，才會配合來用通用語言。

最近看一齣日本連續劇，主角愛四界去出差，逐遍穡頭做煞，伊攏會去買一寡在地人食的口味，啉的燒酒，攜去哩新幹線，趁這段長途的坐車時間，好好款待家己。主角若去到較庒跤所在，伊對講地方腔口的人，嘛是定定會聽到霧煞煞。有一擺，伊去踅菜市仔的時陣，拄著一個查某囡仔，講話有足重的地方腔，予伊聽攏無；後來佇一間做家庭料理的店面，伊閣拄著仝一個查某囡仔，這擺主角就聽有伊咧講啥。原來這個查某囡仔出外幾若冬，這二年才轉來故鄉爾。伊講佇菜市仔內底，一定用母語來服務鄉親，這是對鄉親的一種尊重。

前年三月份有寫一篇對疫情的看法（ https://bit.ly/3sx2dHq ），內底有講到的國家，跤手攏算是緊的，人今馬差不多攏開放矣！這段期間，咱台灣算是好學生，雖然防了袂䆀，但是有較勥趖，趖到今馬才開始咧行人上尾的階段。咱的媒體應該愛較捷報已經開放的國家才對，予看新聞的人會使免遐煩惱。雖然逐工攏有幾偌萬人得病，但99%以上攏是輕的，抑是無症頭，外國攏按呢就咧共開放矣，咱台灣若共開放落去，嘛會是仝款才對！

佇這個欲對四界管牢牢漸漸來行向開放的時陣，上重要的是愛予民眾安心，心若袂安，是欲按怎跟看袂到的病毒鬥陣生活？拍一下子咳啾，就開始煩惱是毋是著矣？規工就想欲去共人搶快篩劑，去排PCR。懷疑到底去予誰穢著？是鬥陣去吃喜酒的親戚五十？抑是坐我隔壁的同事？無定著是彼工轉來厝內食暗頓的囝兒媳婦？

其實，你四界去共看覓，今馬逐家攏是共喙罨掛牢牢，出入各種場所，嘛愛予人先磅體溫跟噴酒精，有確定得病的，一家伙仔攏愛關幾偌工袂使出門，是按怎逐工閣有幾偌萬人著到？這就表示咱用遮的手段，欲共病毒擋起來，予伊湠袂出去是無效的。橫直就無效矣，咱就以外國的經驗，放心開放就好。把所有強制的規定攏取消，欲叫人篩檢的愛家己出錢予人篩檢，欲做PCR嘛是愛自己出錢，檢驗的醫護人員人手不夠，就叫伊慢慢的排慢慢的等。干焦留一條規定就好，嚴格禁止非重症的任何病人，佔用醫療資源。

希望咱的媒體會使跟看新聞的民眾講予清，其實咱早就佮各種的病毒（https://bit.ly/3yu6vDc）做伙足久的矣！

你敢知影咱台灣今仔日有四五百的人蹺去？肺炎死的有三四十個？毋知嘛！因為無人規工咧報遮的數字。政府攏有統計國內主要的死亡原因，報告發表的時陣，新聞才會綴咧報一睏仔，無人逐工咧報啥物病今仔日閣得幾個、死幾個矣。咱過去本來就一直有跟病菌、病毒做伙生活鬥陣。

若欲跟新冠病毒共存，咱就莫規工咧報伊的消息。譬如講咱若喉嚨疼、拍咳啾、流鼻水敢愛去衛生所登記？免嘛！敢愛共人講咱去過佗位？免嘛！敢愛予人關佇厝內？無嘛，攏在人歡喜矣！欲歇睏的人歇睏，欲出門的人出門，驚共人穢著抑是驚予人穢著的，喙罨掛咧就好，無咧驚的做你免掛，無人會大驚小怪，無人會予人檢舉罰錢。

共存，就是政府轉去跟過去仝款就好，統計做你去統計，莫規工咧報得病的數字，規工咧報得病的人去過佗位，規工咧掠跟得病的人有接觸過的，攏無欲睬大部分得病的人根本就無症頭抑是輕症爾。預防射嘛注到七八成矣，看彼的尊重科學的國家按怎做咱綴咧做就好。

阮某問我敢有看到外公外媽的新聞？我共講有影過，無斟酌看，因為我無啥物感覺。伊講伊細漢就有感覺到，是按怎阿母這爿的阿公阿媽叫做外，阿爸這爿的就叫做內，這有重男輕女的差別。

我細漢的時陣，台北有一個阿媽跟阮住做伙，轉去斗南有一個阿媽，轉去大埤嘛閣有一個阿媽。做囡仔就是單純，大人叫你叫啥，你就叫啥，無咧想啥物重男輕女啦，抑是那會遮濟個阿媽？叫人的時陣毋捌叫過外公外馬抑是內公內媽，攏是叫阿公阿媽。其實佇我細漢有記持以來，毋捌看過阿公，當然就毋捌叫過，干焦有看過阿媽，叫過阿媽爾。

啥物時陣有用到「內、外」？干若是咧解釋、說明，是阿爸抑是阿母，佗一爿的親戚時，才會用到吧！無普通時無人按呢咧叫。分內外敢就是因為男尊女卑？我是感覺袂出來啦。內，敢有較高尚？抑是較親？外，就代表是外人的意思？這可能愛予專門的人來研究探討才知。

古早人嘛有講家己的翁婿叫做外子，牽手叫做內人，若內公內媽是因為男尊，外公外媽是因為女卑，按呢外子跟內人毋對拄好倒反？閣講一個較無關係、滾耍笑的講法，痔瘡嘛有分內痔跟外痔，敢講伊嘛有歧視的意思？

我家己的看法是，古早人結婚了，較濟是跟查埔這爿的親戚住做伙，若是講到阿爸這爿的阿公阿媽，會講是住佇咱厝內底的阿公阿媽，才叫做內公內媽；阿母彼爿的阿公阿媽，因為無住做伙，所以是外口的阿公阿媽，毋才叫做外公外媽。

我講到喙角全泡，阮某干焦落這句話爾，你無感覺是你的代誌！伊就是感覺重男輕女，應該改！這時陣，做外子的就毋通閣出聲才袂著銃！

佇面冊記錄家己身上的一寡症頭，有一個好處，咱會使對發作的時間，做一個整理，來發現一寡家己會使注意的所在。

進前有寫過我的流鼻水，定定攏佇十月底十一月初的時陣，無緣無故來發生。後來發覺是天氣開始愈變愈寒的時陣，除了愛加穿衫褲，嘛愛順紲共襪子穿起來，按呢就袂無代無誌流鼻水矣。

目睭紅我寫過兩三篇（ https://bit.ly/3rOy0nf ），連今年初這遍算起來，我目睭的症頭，佇一二月發生較濟。進前攏是正蕊，會紅會癢會流目油，不捌酸疼過。這擺是倒蕊，加足吃力矣！袂癢，但是酸疼到擘袂金，擘開就目屎佝佝流，看物件嘛貼一層白霧，看攏袂清楚，干焦賰正蕊會用持，我連車就毋敢駛。

一開始，我叫是跟去日本彼擺仝款，干焦目睭紅爾，無其他的無爽快，有感覺比正蕊較快忝，我就較捷瞌瞌予倒蕊歇睏。差不多經過一禮拜，無啥物變化，突然間，佇禮拜下晡，紲直直酸疼起來，啥物代誌攏袂做持，我就規氣去倒咧眠床頂，目睭瞌瞌歇睏，看會較好無？

對禮拜下晡睏到拜一早起，倒蕊的症頭完全無改善。酸疼到擘袂金閣看袂清楚，目睭皮一擘開，目屎若咧倒水。毋敢駛車載阮某去上班，只好叫查某囝作司機。這情形進前毋捌拄過，我嘛會驚，毋知會變做倒蕊青瞑的獨眼龍無？

睏會落眠是恢復元氣上好的方法，有元氣的身體才有自我完全的能力。但若是睏了病疼攏無改善，咱會愈想愈驚。我只好起來揣我看過的中醫冊，看有寫到醫目睭的藥方無。

進前看過一位清朝獨眼御醫的「四聖心源」電子冊，嘛捌拆過內底的藥方家己吃過。用目字搜查，真緊就揣著目病根源，看了隨去藥病，拆這帖柴胡芍藥丹皮湯轉來煎。三帖食了，就知影妥當矣，繼續共煎來食，倒蕊目睭就會慢慢好矣。

初四透早欲駛車上北，我四點半就起來煎粿，順紲幫丈人跟丈姆怹消一寡菜，無怹若食無了，會共菜閣捾起來台北。

丈人起來便所了，就徛佇邊仔看我煎。丈人佇厝內是無咧煮食，灶跤攏是查某人咧款，伊嘛罕咧看我佇灶跤無閒，感覺誠心適，就問我講：

「小陽，你那會啥物攏會曉？」

「爸，你毋知今馬的查埔人攏愛做遮的代誌喔？」

「毋知吶！」

「齁，阿毋對好佳哉！你是生佇你彼咧時代才免做。你看，媽今馬腰攏徛袂直矣，嘛愛閣款予你食。」

「係，對齁。。。。。。」

虎年冬，過虎年，欲閣來一年一擺合生肖鬥人名寫阮兜的門聯矣。舊年牛年是鬥阮某的名（ https://bit.ly/3KOMjQd ），今年換來鬥阮查某囝的名。

好跟虎字的台語聽起來差不多，用虎代好字的春聯應該誠好鬥才對。我前一站仔送予二兄的對聯嘛是按呢用。民國四五十年時，台灣茶出口第一名的，人攏叫伊茶虎，公視最近的客語大戲「茶金」就是咧搬茶虎的故事，所以二兄的好業績，我就共叫做業績虎，業績虎就是業績好。

查某囝的名有心字，頭殻內隨跳出來七字句是「好哩佳哉心免驚」，用虎代好字來做頂聯就會使矣。紲落來是欲配「好哩佳哉」這四字，我現想到是「予你去啊」，但是欲提伊來鬥祝賀人的春聯內底干若無啥妥當。其實「予你去啊」毋是一句歹聽話，只是人定定講到伊的時陣攏較大聲爾！若是對歹物仔講，伊嘛會使算一句好話，就是希望歹物仔緊走，歹運氣緊散了了。

共「予去」寫做音相倚的「福氣」，看起來就有祝賀人的氣味矣。按呢下聯就共寫做「福哩氣呀云飛散」，希望今年會使解除疫情的困擾，逐家攏恢復正常生活，就干若是遮到日頭的雲已經飛散矣，世界閣是一片光明。

虎哩佳哉心免驚

福哩氣呀云飛散

若是照傳染病科學講的「群體免疫」，應該是七八成的人民注過兩筒的預防射了，就會使免管制，恢復正常生活矣，這款的政府才是尊重科學。跟佇外國的同窗開講，人今馬是佇咧度假滑雪，怹遐已經無咧報幾個人得病矣。

若是無愛睬已經有七八成民眾注過兩筒，嘛無欲看病毒的傳染力越變越強，重症率越來越少的趨勢，仝款規工咧報幾個人確診，有任何風吹草動就全區PCR，共確診的人數當做執政的成績，這就變成是政治創治科學矣，全世界的政府攏愛注意，疫情才有結束的一工。