雪文 vs 茶箍

「雪文」佮「茶箍」意思是仝款的，猶毋過𪜶的由來有淡薄仔無仝~

「雪文」是對法文來的，佮咱這馬華語講的「肥皂」較相像；
「茶箍」是較早的人提茶油粕來做的，會當講是上早的「肥皂」。

Powered by Firstory Hosting

「菁仔欉」就是「檳榔樹」！？

檳榔樹嘛會當講是 tshenn-á-tsâng 抑是 tshinn-á-tsâng。
「菁仔欉」閣會當形容一个人毋捌看過世面、做代誌較莽撞、無細膩。
日本時代的一百摳，頂懸有印一个青仔欉。彼當時，一百摳是一筆真大的數目，毋捌看過的人，就等於是無看過世面的人，才會產生這款講法。

Powered by Firstory Hosting

外國人嘛號做「阿啄仔」。

其中一个講法是，佇第二擺世界大戰的時陣，真濟美軍來台灣，大部分的人攏會叫𪜶「啄鼻仔」。尾仔，就變做「阿啄仔」。
另外一款的講法是，佇1860年的時陣，有一个英國的生意人，伊的名號做John Dodd。來到台灣了後，一蹛就是30冬。毋但真照顧咱的農民佮茶商，閣引進茶米，創立Formosa Oolong的品牌，予世界看著台灣。台灣人真信任，嘛真佮意伊，攏叫伊「Mr. Dodd」。落尾，台灣的外國生意人越來越濟，逐家就慣習用Dodd這个姓來共𪜶稱呼。尾仔，就變做「阿啄仔」。

Powered by Firstory Hosting

「點心」是為著欲補充正頓無夠的營養；「四秀仔」是提來啖糝的。

其中一款講法是，古早時代的糕仔頂懸，會印四種野獸，虎、豹、獅佮象。較早的糕仔嘛會當算是提來啖糝的物件，所以逐家攏會用「四獸仔」來形容。
另外一種的講法是，過年的時陣，逐家攏會佇厝內攢一个盒仔，中央一格圓的，邊仔三格，總共合起來四格。這个盒仔會提來囥冬瓜糖等等，欲予人客吃甜甜的糖仔，久來，因為盒仔有四格，逐家就攏講「四秀仔」。

Powered by Firstory Hosting

「伊的穿插真時行！」

講人的穿插真綴會著時代，會當講「流行」、「奅」、「奅哩奅哩」。
「奅哩」是對日語的「パリ」來的。佇日語，「パリ」就是法國巴黎。
較早講到巴黎，咱攏會提伊佮「流行」這兩个字鬥作伙。久來，「奅哩奅哩」就變做流行的意思。

Powered by Firstory Hosting

是誰蹛佇咧巷仔內？

街頭巷尾是聯絡感情的好所在，裡面有真濟「好厝邊」。
猶毋過，蹛佇巷仔內的毋但厝邊爾爾！
閣有一款人蹛佇巷仔內~
咱會用「巷仔內」形容對某乜代誌真專業的人，就佮「內行」的意思仝款。

Powered by Firstory Hosting

袂當食的「糖霜丸」？

「糖霜」就是華語的『冰糖』，「丸」會提來形容一塊一塊的物件。
「糖霜丸」佇古早時代是真貴重的物件，就佮囝仔佇老爸老母心目中的地位仝款！
這个用法頭先是用佇孤囝身上，毋過這馬只要是咧講家己的寶貝囝，攏會當按呢形容。

Powered by Firstory Hosting

「三八啦~」

佇十九世紀的時陣，配合開港通商的政策，逐個月的初八、十八、二八，就會開放外國人入港貿易。
彼咧時陣的台灣較保守，所以逐家看著外國來的查某囡仔穿插較開放的時，感覺無啥好。
因為遮的查某囡仔佇逐個月拄著三个八的日子，八號、十八號、二十八號才會來，
所以就用「三八」來稱呼遮的查某囡仔。
一直到這馬，「三八」這个詞會提來形容較無正經的查某人。
毋過，有當時陣嘛會用佇查埔身上，譬論講，「三八兄弟」就是提來形容感情真好的朋友。

Powered by Firstory Hosting

Q=𩚨！？

華語內底的「Q」，代表物件食起來真「𩚨」。
真濟台灣的好食物攏有這款口感，親像粉圓、紅龜粿、草仔粿。
「Q」雖然是英語，猶毋過你若是共外國人講：「這食起來真Q！」
絕對無人知影你咧講啥…


Powered by Firstory Hosting

「500萬雨傘」毋免開500萬！

佇咧1980年，逐家對保險的觀念無仝，認為彼是一个較無必要的物件。
為著欲予民眾閣較了解保險的重要性，一間保險公司就決定拍一支予人印象真深的廣告。
佇彼个廣告內底，一對翁仔某𤆬兩个囝仔徛咧淋雨，
𪜶上頭仔攑的雨傘頂懸寫「10萬」，毋過因為傷小支，規身軀沃到澹漉漉。
換一支「30萬」的了後，遮閘的效果猶是有限。
一直到頂頭寫「500萬」、上大支的雨傘出現，
規家伙仔才真正有保障。

落尾，逐家就共特別大支的雨傘號做「五百萬」。

Powered by Firstory Hosting