用台語來表現，ǹg望ta̍k家聽liáu會感覺趣味。

[Podcast]

SoundOn

https://bit.ly/ChKaL_SO

Spotify

https://spoti.fi/48jD2tI

KKBOX Podcast

https://bit.ly/ChKaL_KK

Apple Podcast

https://apple.co/3HZyfD3

YouTube Podcast

https://bit.ly/ChKaL_YT

[社交平台 Siā-kau Pêⁿ-tâi]

YouTube

https://bit.ly/ChKaL_YT

Facebook

https://bit.ly/ChKaL_FB

Instagram

https://www.instagram.com/chokangalang/

X (Twitter)

https://twitter.com/chokangalang

方格子

https://vocus.cc/salon/cho-kang-a-lang

以下內容是漢羅kah pe̍h-ōe-jī原稿，有需要歡迎ta̍k-ke來參考。

【漢羅版】

歡迎收聽「台語講怪奇」。

Ta̍k家好，我是Chiá-siông，我是Niau-tāu。

咱chit ê節目是用台語來kā ta̍k-ke介紹chit ê世界上 ，chiâⁿ chōe奇奇怪怪ê代誌。

用台語來表現，ǹg望ta̍k-ke聽liáu會感覺趣味。

頂1回咱講--ê是chiok有名ê hit ê Atlantis大陸，今á日第2集，咱beh來講另外1 ê大陸。

Ŏ͘，koh是tó 1 ê大陸--leh。

中~國！

Ăⁿ，中國to̍h中國，啥物大陸--lah！

照in ê標準，較早tī hit塊土地頂頭發生ê代誌，lóng算是中國大陸--a。

咱做節目--ê， a̍h m̄ bián照in ê標準--lah，照咱ka-tī ê標準來tio̍h好。

Nā beh照咱ka-kī ê標準，he to̍h m̄ sī中國ê代誌，算是明帝國ê怪奇事件o͘h。

Ŏ͘-ò͘，to̍h是臭頭á皇帝起造--ê hit ê帝國--mah，明帝國有270外冬，是發生啥物怪奇事件，chiah請你講看māi。

Chit ê事件to̍h叫做「王恭廠大爆炸」。

Tī 1626年5月30 hit工，tī北京西南pêng ê王恭廠地區，雄雄發生1 ê爆炸事件。

Ăi-iò，nah ē án-ne 。

王恭廠chit ê所在本底to̍h是1 ê兵工場，明帝國siōng厲害ê神機營，in裝備ê火銃，to̍h是tī chia製造--ê。

Ŏ͘，所以chia一定有chiâⁿ chōe火藥，凡勢hit工to̍h是tó 1 ê白目--ê tī chia pok薰，chiah會爆炸。

是m̄是有人teh pok薰我是m̄知--lah，m̄-koh hōⁿh，nā是講tio̍h爆炸，你會想到啥物狀況？

爆炸m̄ tio̍h親像炸彈chà-tân piāng--開án-ne，有chiok強ê衝擊波，溫度chiok koân，hit ê燒滾滾ê風siàn--過-來會to̍h火án-ne。

Hèⁿ，一般咱lóng想講爆炸應該是án-ne，m̄-koh，hit工王恭廠ê爆炸chiok奇怪。

Ŏ͘？ 爆炸m̄是piāng--1-ē to̍h結束--ah。

無ŏ͘，我為啥物講伊真奇怪，hit工ê狀況是án-ne，早時差不多10點左右，本底天氣chiâⁿ好，雄雄m̄知影是啥，chiok大聲，ùi東北pêng ǹg西南pêng去。

Ăi-iò，ah m̄ tio̍h好天tân雷公。

然後雄雄天色to̍h變烏--來，sòa--落-來….大地動--ā！

Ah~~~雷公跋1 ē烏暗hîn--lah！

你teh烏白講啥--lah，雷公跋倒會死萬外人o͘h。

Hăⁿ？啥？ Án-ne to̍h死萬外人o͘h！

Hèⁿ ā，he爆炸了後，kán-ná原子彈án-ne，tī天頂種一粒香菇。

He一定是in khǹg chiâⁿ chōe火藥tī hia，chiah會chiah-nī-á嚴重。

我to̍h知影你會án-ne想，m̄-koh我kā你講，hit當時in使用ê烏火藥，根本to̍h無chiah-nī大ê威力，ē-sái hō͘ chiah chē人死kah chiok悽慘koh奇奇怪怪。

Hăⁿ？死kah悽慘我是知--lah，猶m̄-koh啥物hō做死kah奇奇怪怪？

譬如講hoⁿh，咱2 ê teh講話，講講--eh你ê頭soah雄雄飛--出-去。

是án-chóaⁿ是我ê頭飛--出-去--lah！

好，án-ne我ê頭飛--出-去！血噴kah你kui身軀lóng是。

你kám會使mài chiah-nī-á thái-ko。

Koh有koh有，hit ê 時陣hoⁿh koh有人teh跳“科目三”，跳跳--eh頭雄雄飛--出-去

你jú講jú離譜á neh，hit當陣無“科目三”--lah

He無重要，我beh講--ê是，一般nā是tú tio̍h爆炸，應該是附近ê人lóng會受tio̍h到影響--ā。

Hèⁿ--ā，kám m̄是án-ne。

我tú chiah講--ê，teh跳“科目三” hit kho͘--a，伊ê頭m̄是飛--出-去-ah。

Hò͘，你koh來--ā。

M̄-koh，tī伊邊--á，teh聽podcast hit ê，完全無代誌。

Án-ne伊一定是teh聽咱做工á人ê節目。

Koh有1 ê真奇怪ê現象，hit工不幸死亡ê人，kui身軀衣á褲lóng hông ká到天頂去。

Hăⁿ？Koh有chiah奇怪ê代誌？

In ê衣á褲，腳，手，我ê頭kah你ê良心，lóng hông ká到天頂去。

Hò͘，是beh kah我ê良心ká kah tó位去--lah！

Lóng總ká到天頂去，了後親像落雨án-ne，lak--落-來，to̍h án-ne落2點鐘。

Ăi-iŏ-ó，án-ne聽--起-來kài恐怖neh，ah m̄ to̍h天地尾--ah！

Hèⁿ ā。

人teh講水nā退，to̍h知影siáng無chhēng褲，che王恭廠chi̍t爆炸，chiah知影原來所有ê人lóng無chhēng褲neh。

Hèⁿ ā，hit ê時陣ê明帝國，政治腐敗，kui-ê國家hō͘ in舞kah亂chhau-chhau，koh tú tio̍h chit款代誌，人to̍h會想講，是神明teh kā in責罰，無法度，皇帝to̍h下1 ê詔書，kā ta̍k-ê會失禮

。

歹勢，是我chit ê做皇帝--ê做liáu無好，我早tǹg無應該食牛排kah雞腿，牛排應該ài要配紅酒tio̍h好。

自án-ne，十外冬了後，明帝國to̍h滅亡--ā。

是講hoⁿh，死萬外人neh，chiah-nī嚴重ê事件，到底是án-chóaⁿ發生--ê？

我teh ioh hoⁿh，凡勢是1隻S-lái-muh ，beh要進化做魔王，tio̍h ài吸收2萬人ê性命。

Ĕ？Che劇情我kán-ná tī tó位bat看過neh。

Ah無to̍h是勇者kah魔王teh決鬥，in團隊hit ê活1千年ê魔法師，用伊ê絕招，叫出1粒火流星，to̍h án-ne kā伊kiat--lòe。

你mài kā我騙，che攏a-ní-meh ê劇情--lah，你叫是我m̄知--o͘h。

M̄是o͘h，火流星hit ê部分，是現代人講--ê，ùi天頂lak--落，tú好tī王恭廠頂頭爆炸，che to̍h有合in講--ê hit kóa狀況，chiok大聲，然後to̍h大地動，大爆炸，香菇！

Hò͘，地球hiah-nī-á大，1粒火流星tú好lak tī leh京城，he是ài做外濟歹代誌，chiah會去tú tio̍h chit款--ê。

Hèⁿ ā，所以講hoⁿh，人teh做，天teh看，做人hoⁿh，良心chiok重要，你kám beh去chhōe看māi，你ê良心lak tī tó位。

O͘h，mài koh講我ê良心--ā-lah！

我是想beh知影你今á日講--ê，到底是真--ê a̍h是假--ê？

我ah知，我講話a̍h無teh負責--ê-ah。

無負責koh敢講chiah大聲。

Án-ne今á日感謝ta̍k-ke收聽「台語講怪奇」，我是Chiá-siông，我是Niau-tāu，咱後回再會o͘h！

【Pe̍h-ōe-jī pán】

Hoan-gêng siu-thiaⁿ “Tâi-gí Kóng Koài-kî”.

Ta̍k-ke hó, góa sī Chiá-siông, góa sī Niau-tāu.

Lán chit ê chiat-bo̍k sī iōng Tâi-gí lâi kā ta̍k-ke siāu-kài chit ê sè-kài siōng, chiâⁿ chōe kî-kî-koài-koài ê tāi-chì.

Iōng Tâi-gí lâi piáu-hiān, ǹg-bāng ta̍k-ke thiaⁿ liáu ē kám-kak chhù-bī.

Téng 1 hôe lán kóng--ê sī chiok ū-miâ hit ê Atlantis tāi-lio̍k, kin-á-ji̍t tē 2 chi̍p, lán beh lâi kóng lēng-gōa 1 ê tāi-lio̍k.

Ŏ͘, koh sī tó 1 ê tāi-lio̍k--leh.

Tiong-kok!

Ăⁿ, Tiong-kok to̍h Tiong-kok, siáⁿ-mih tāi-lio̍k--lah!

Chiàu in ê phiau-chún, khah chá tī hit tè thó͘-tē téng-thâu hoat-seng ê tāi-chì, lóng sǹg-sī Tiong-kok tāi-lio̍k--a.

Lán chò chiat-bo̍k--ê, a̍h m̄ bián chiàu in ê phiau-chún--lah, chiàu lán ka-kī ê phiau-chún lâi tio̍h hó.

Nā beh chiàu lán ka-tī ê phiau-chún, he to̍h m̄ sī Tiong-kok ê tāi-chì, sǹg-sī Bêng tè-kok ê koài-kî sū-kiāⁿ o͘h.

Ŏ͘, to̍h sī chhàu-thâu-á hông-tè khí-chō--ê hit ê tè-kok--mah, Bêng tè-kok ū 270 gōa tang, sī hoat-seng siáⁿ-mih koài-kî sū-kiāⁿ, chiah chhiáⁿ lí kóng khòaⁿ-māi.

Chit ê sū-kiāⁿ to̍h kiò-chò “Ông-kiong-chhiúⁿ Tōa-po̍k-chà”.

Tī 1626 nî 5 goe̍h 30 hit kang, tī Pak-kiaⁿ sai-lâm pêng ê Ông-kiong-chhiúⁿ tē-khu, hiông-hiông hoat-seng 1 ê po̍k-chà sū-kiāⁿ.

Ăi-iò，nah ē án-ne .

Ông-kiong-chhiúⁿ chit ê só͘-chāi pún-té to̍h sī 1 ê peng kang-tiûⁿ, Bêng tè-kok siōng lī-hāi ê Sîn-ki-iâⁿ, in chong-pī ê hóe-chhèng, to̍h sī tī chia chè-chō--ê.

Ŏ͘-ò͘, só͘-í chia it-tēng ū chiâⁿ chōe hóe-io̍h, hoān-sè hit kang to̍h sī tó 1 ê pe̍h-ba̍k--ê tī chia pok-hun, chiah-ē po̍k-chà.

Sī m̄ sī ū lâng teh pok-hun góa sī m̄-chai--lah, m̄-koh hoⁿh, nā sī kóng tio̍h po̍k-chà, lí ē siūⁿ tio̍h siáⁿ-mih chōng-hóng?

Po̍k-chà m̄ tio̍h chhin-chhiūⁿ chà-tân piāng khui án-ne, ū chiok kiông ê chhiong-kek pho, un-tō͘ chiok koân, hit ê sio-kún-kún ê hong siàn--kòe-lâi ē to̍h-hóe án-ne.

Hèⁿ, it-poaⁿ lán lóng siūⁿ kóng po̍k-chà èng-kai sī án-ne, m̄-koh, hit kang Ông-kiong-chhiúⁿ ê po̍k-chà chiok kî-koài.

Ŏ͘? Po̍k-chà m̄ sī piāng--1-ē to̍h kiat-sok--ah.

Bô ŏ͘, góa ūi-siáⁿ-mi̍h kóng i chin kî-koài, hit kang ê chōng-hóng sī án-ne, chái-sî chha-put-to 10 tiám chó-iū, pún-té thiⁿ-khì chiâⁿ hó, hiông-hiông m̄ chai-iáⁿ sī siáⁿ chiok tōa-siaⁿ, ùi tang-pak pêng ǹg sai-lâm pêng khì .

Ăi-iò, ah m̄ tio̍h hó-thiⁿ tân lûi-kong.

Jiân-āu hiông-hiông thiⁿ-sek to̍h piàn o͘--lâi, soah--lo̍h-lâi, tōa tē-tāng--ā!

Ah, lûi-kong poa̍h 1 ē o͘-àm-hîn--lah!

Lí teh o͘-pe̍h kóng siáⁿ--lah, lûi-kong poa̍h-tó ē sí bān gōa lâng o͘h.

Hăⁿ? Siáⁿ? Án-ne to̍h sí bān gōa lâng o͘h!

Hàⁿ--ā, he po̍k-chà liáu-āu, kan-na goân-chú-tôaⁿ án-ne, tī thiⁿ-téng chèng 1 lia̍p hiuⁿ-ko͘.

He it-tēng sī in khǹg chiâⁿ chōe hóe-io̍h tī hia, chiah ē chiah-nī-á giâm-tiōng.

Góa to̍h chai-iáⁿ lí ē án-ne siūⁿ, m̄-koh góa kā lí kóng, hit tong-sî in sú-iōng ê o͘ hóe-io̍h, kin-pún to̍h bô chiah-nī tōa ê ui-le̍k, ē-sái hō͘ chiah chē lâng sí kah chiok chhi-chhám koh kî-kî-koài-koài.

Hăⁿ? Sí kah chhi-chhám góa sī chai--lah, iáu m̄ koh siáⁿ-mih hō chò sí kah kî-kî-koài-koài?

Phí-jū kóng hoⁿh, lán 2 ê teh kóng-ōe, kóng-kóng--eh lí ê thâu soah hiông-hiông poe--chhut-khì.

Sī án-chóaⁿ sī góa ê thâu poe chhut-khì--lah!

Hó, án-ne góa ê thâu poe--chhut--khì-lah! Hoeh phùn kah lí kui seng-khu lóng sī.

Lí kám ē-sái mài chiah-nī-á thái-ko.

Koh ū koh ū, hit ê sî-chūn hoⁿh koh ū lâng teh thiàu “科目三”, thiàu-thiàu--eh thâu hiông-hiông poe--chhut-khì.

Lí jú kóng jú lī-phó͘-á neh, hit-tang-chūn bô “科目三”--lah.

He bô tiōng-iàu, góa beh kóng ê sī, it-poaⁿ nā-sī tú tioh po̍k-chà, èng-kai sī hū-kīn ê lâng lóng ē siū-tio̍h éng-hióng--ā.

Hèⁿ--ā, kám m̄ sī án-ne.

Góa tú-chiah kóng--ê, teh thiàu ““科目三” hit kho͘--a, i ê thâu m̄ sī poe--chhu-khì-ah.

Hò͘, lí koh lâi--ā.

M̄-koh, tī i piⁿ--á, teh thiaⁿ podcast hit ê, oân-choân bô tāi-chì.

Án-ne i it-tēng sī teh thiaⁿ lán chò-kang-á-lâng ê chiat-bo̍k.

Koh ū 1 ê chin kî-koài ê hiān-siōng, hit kang put-hēng sí-bông ê lâng, kui seng-khu saⁿ-á-khò͘ lóng hông ká kàu thiⁿ-téng khì.

Hăⁿ? Koh ū chiah kî-koài ê tāi-chì?

In ê saⁿ-á-khò͘, kha, chhiú, góa ê thâu kah lí ê liông-sim, lóng hông ká kàu thiⁿ-téng khì.

Hò͘, sī beh kah góa ê liông-sim ká kah tó-ūi khì--lah!

Lóng-chóng ká kàu thiⁿ-téng khì, liáu-āu chhin-chhiūⁿ lo̍h-hō͘ án-ne, lak--lo̍h-lâi, to̍h án-ne lak 2 tiám-cheng.

Ăi-iŏ-ó, án-ne thiaⁿ--khí-lâi kài khióng-pò͘ neh, ah m̄ to̍h thiⁿ-tē-bóe--ah!

Hèⁿ ā.

Lâng teh kóng chúi nā thè, to̍h chai-iáⁿ siáng bô chhēng khò͘, che Ông-kiong-chhiúⁿ chi̍t po̍k-chà, chiah chai-iáⁿ goân-lâi só͘-ū ê lâng lóng bô chhēng khò͘ neh.

Hèⁿ--ā hit ê sî-chūn ê Bêng tè-kok, chèng-tī hú-pāi, kui-ê kok-ka hō͘ in bú kah loān-chhau-chhau, koh tú tio̍h chit khoán tāi-chì, lâng to̍h ē siūⁿ kóng, sī sîn-bêng teh kā in chek-hoa̍t, bô hoat-tō͘, hông-tè to̍h hā 1 ê chiàu-chu, kā ta̍k-ê hōe-sit-lé.

Pháiⁿ-sè, sī góa chit ê chò hông-tè--ê chò liáu bô hó, góa chá-tǹg bô èng-kai chia̍h gû-pâi kah ke-thúi, gû-pâi èng-kai ài phòe âng-chiú tio̍h hó.

Chū án-ne, cha̍p gōa tang liáu-āu, Bêng tè-kok to̍h bia̍t-bông--ā.

Sī kóng hoⁿh, sí bān gōa lâng neh, chiah-nī giâm-tiōng ê sū-kiāⁿ, tàu-té sī án-chóaⁿ hoat-seng--ê?

Góa teh ioh hoⁿh, hoān-sè sī 1 chiah S-lái-muh, beh chìn-hòa chò mô͘-ông, tio̍h ài khip-siu 2 bān lâng ê sèⁿ-miā.

Ĕ? Che kio̍k-chêng góa kán-ná tī tó-ūi bat khòaⁿ kòe neh.

Ah bô to̍h sī ióng-chiá kah mô͘-ông teh koat-tàu, in thoân-tūi hit ê oa̍h 1 chheng nî ê mô͘-hoat-su, iōng i ê choa̍t-chiau, kiò chhut 1 lia̍p hóe liû-chheⁿ, to̍h án-ne kā i kiat--lòe.

Lí mài kā góa phiàn, che lóng a-ní-meh ê kio̍k-chêng--lah, lí kiò sī góa m̄ chai--o͘h.

M̄ sī o͘h, hóe liû-chheⁿ hit ê pō͘-hūn, sī hiān-tāi-lâng kóng--ê, ùi thiⁿ-téng lak--lo̍h, tú-hó tī Ông-kiong chhiúⁿ téng-thâu po̍k-chà, che to̍h ū ha̍h in kóng--ê hit kóa chōng-hóng, chiok tōa siaⁿ, jiân-āu to̍h tōa tē-tāng, tōa po̍k-chà, hiuⁿ-ko͘!

Hò͘, Tē-kiû hiah-nī-á tōa, 1 lia̍p hóe liû-chhiⁿ tú-hó lak tī teh kiaⁿ-siâⁿ, he sī ài chò gōa-chē pháiⁿ tāi-chì, chiah ē khì tú tio̍h chit khoán--ê.

Hèⁿ ā, só͘-í kóng hoⁿh, lâng teh chò, thiⁿ teh khòaⁿ, chò-lâng hoⁿh, liông-sim chiok tiōng-iàu, lí kám beh khì chhōe khòaⁿ-māi, lí ê liông-sim lak tī tó-ūi.

O͘h, mài koh kóng góa ê liông-sim--ā-lah!

Góa sī siūⁿ beh chai-iáⁿ lí kin-á-ji̍t kóng--ê, tàu-té sī chin--ê a̍h-sī ké--ê?

Góa ah chai, góa kóng-ōe a̍h bô teh hū-chek--ê-ah.

Bô hū-chek koh káⁿ kóng chiah tōa-siaⁿ.

Án-ne kin-á-ji̍t kám-siā ta̍k-ke siu-thiaⁿ “Tâi-gí Kóng Koài-kî”, góa sī Chiá-siông, góa sī Niāu-tāu, lán āu-hôe chài-hōe o͘h!

--

Hosting provided by SoundOn