Þjóðmál

Þjóðmálastofan færir sig suður með sjó og kemur sér fyrir í húsgagnaversluninni Bústoð í Keflavík. Örn Arnarson og Þórður Gunnarsson fjalla um umfjöllun um fjármagnstekjur og hvaða hlutverki þær gegna í samfélaginu, hvernig umræða um þær hafa þróast með einkennilegum hætti og fleira. Þá er rætt um delluhugmyndir um það hvernig sjálfbærni fyrirtækja er mæld, ummæli um ungar þingkonur og margt fleira. Að sjálfsögðu er einnig fjallað um Ljósanótt sem verður haldin í Keflavík um helgina.

Hörður Ægisson og Stefán Einar Stefánsson ræða um flokksráðsfund Sjálfstæðisflokksins og stöðuna í pólitíkinni, um ný húsaleigulög, úttekt um eftirlitsiðnaðinn og viðbrögð þeirra sem alltaf vilja verja kerfið, slakt uppgjör sjávarútvegsfyrirtækja, hvort líkur séu á vaxtalækkunum, tilraun Gildis til að hemja kaupréttarkerfi skráðra fyrirtækja og margt fleira.

Brynjar Níelsson og Óli Björn Kárason ræða um fylgi Sjálfstæðisflokksins, hvað kunni að skýra lækkandi fylgi flokksins, um það hvort og þá hvaða skilaboð flokkurinn er að gefa frá sér, hvort að flokkurinn hafi sinnt kjósendum sínum nægilega vel og þar fram eftir götunum. Þá er fjallað almennt um stöðuna í stjórnmálum, um fylgi annarra flokka, ríkisstjórnarsamstarfið og fleira.

Áslaug Arna Sigurbjörnsdóttir ræðir um hugmyndafræði Sjálfstæðisflokksins, hvort og þá hvaða erindi flokkurinn eigi við fólk, hvað kunni að skýra minna fylgi flokksins, hvort möguleiki sé á því að auka fylgið og þar mætti áfram telja. Þá er rætt um „fría“ hluti í boði stjórnmálamanna, baráttuna um hugmyndafræði flokka, hvort að líklegt sé að stjórnmálamenn vindi ofan af vaxandi hlutverki ríkisins, hvaða möguleika hún sér á næsta stjórnarsamstarfi og margt fleira.

Sigurður Ingi Jóhannsson, fjármálaráðherra og formaður Framsóknarflokksins, ræðir um stöðuna í hagkerfinu, ákvörðun Seðlabankans um að halda stýrivöxtum óbreyttum, gagnrýni á fjármálastjórn ríkisstjórnarinnar, fjármögnunarþörf ríkisins, hvort að breytinga sé að vænta á skattamálum eða tollamálum og fleira. Þá er jafnframt rætt um stöðuna á stjórnarheimilinu, stöðu Framsóknarflokksins bæði á landsvísu og í borginni, hvað hafi breyst í stjórnmálunum frá því að hann settist á þing fyrir 15 árum, leiðtoga stjórnarflokkanna og margt fleira.

Björn Brynjúlfur Björnsson, framkvæmdastjóri Viðskiptaráðs, og Stefán Einar Stefánsson ræða um lækkun tolla sem gætu bætt hag heimilanna til muna, námsmat í grunnskólum og umræðu um menntamál, hvort að þörf sé á því að skólamáltíðir og námsgögn séu ókeypis, vindorku og það hver á rétt á því að virkja vindinn, allt of stórt framkvæmdavald og þann gífurlega fjölda sem starfar hjá stofnunum með eftirlitshlutverk, nýja opinbera verðlagsnefnd um leigumarkað, óeirðir í Bretlandi og fangelsisdóma þar sem tjáningarfrelsið er skert til muna og margt fleira.

Bogi Nils Bogason, forstjóri Icelandair, fer yfir stöðu félagsins, það bakland sem liggur í hluthöfum þess, aðlögun á leiðarkerfinu í ljósi breyttra aðstæðna á markaði, samkeppnisumhverfið, fyrri ummæli sín um að það sé erfitt að reka tvö flugfélög með heimahöfn á Íslandi, af hverju lögð var áhersla á að bjarga félaginu í kórónuveiru-faraldrinum, samninga við stéttarfélög, mýtuna um ríkisstyrki og margt fleira.

Hörður Ægisson og Örn Arnarson fara yfir titringinn sem varð á alþjóðlegum hlutabréfamörkuðum í upphafi vikunnar, horfurnar á vaxtalækkun hér á landi, dýrar skuldir ríkisins sem hafa neikvæð áhrif á atvinnulífið og aðra þætti hagkerfisins, bréf Jóns Sigurðssonar í Stoðum til hluthafa, horfur á hlutabréfamarkaði, skammir eyðslusamra stjórnmálamanna sem kenna fyrirtækjum um að ýta undir verðbólgu og margt fleira.

Stefán Einar Stefánsson og Sigríður Á. Andersen undirbúa þjóðina fyrir verslunarmannahelgina sama dag og nýr forseti tekur við völdum. Við höldum aðeins áfram að ræða um réttmæti og starfsemi erlendra veðmálasíðna, ræðum um óraunhæf markmið stjórnvalda í loftlagsmálum og möguleikana á orkuskiptum, hlutverk ríkisvaldsins, glæpamenn sem skipta um nafn, stöðuna í stjórnmálunum, sálarangist stuðningsmanna Hamas-samtakanna sem misstu einn leiðtoga sinn í vikunni, hvort að embættismenn hafi of mikil völd og margt fleira.