Inkundla ephakamileyo yaseGqeberha kwiMpuma Koloni, isikhabile isicelo sebhunga lezotshutshiso kwisizwe, iNPA, nalapho iNPA ibifuna ukuba le nkundla icacise ngesigwebo sayo kwityala abejamelene nalo uTimothy Omotoso. I-NPA kungokunje iza kubhena kwisigwebo sale nkundla kwinkundla yezibheno. Lenkundla yamfumanisa engenatyala uOmotoso nababini abetyholwa nabo, uLusanda Sulani noZukiswa Sitho. Nangona kunjalo, ngaphambi kokuba yenze njalo, i-NPA iza kuthumela imibuzo yezomthetho kuJaji Irma Schoeman owawisa esisigwebo sika Omotoso.  U-Omotoso nabo ebetyholwa nabo babejamelene nothotho lwamatyala, naquka ukunaniselana ngemali, ukuthutyeleziswa kwabantu nokudlwengula, ze baphuma betshaya ngenyanga kaTshazimpuzi kulonyaka.  UNandipha Plaatjie uza nengxelo...

Kwamkelwe yimibutho yezopolitiko eyohlukileyo ukususwa kukaMphathiswa wesebe lemfundo ephakamileyo noqeqesho, uGqirha uNobuhle Nkabane. Emva kwemini izolo, i-ofisi kamongameli uCyril Ramaphosa ivakalise ukuchongwa kwalowo ebengusekelwa mphathiswa kweli sebe uButi Manamela njengomphathiswa omtsha, ngethuba uGqirha Nomusa Ncube-Dube ebhengezwe njengosekela-mphathiswa omtsha kweli sebe. UNkabane ubesematheni kwezinyanga zidlulileyo ngokunganyaniseki kwakhe ePalamente ngenkqubo yokuchongwa koosihlalo bamaqumrhu eebhodi ezohlukileyo ze-SETA, neziphantsi kweli sebe. UAyabonga Kekana uncokole  nomhlalutyi uGqirha Mkhuseli Vimba. 

Umphathiswa weenguqu kwezomhlaba, uMzwanele Nyhontso neKumkani yabaThembu uBuyelekhaya Dalindyebo, bachonge umhlaba apho kuzakwakhiwa, kuhlaliswe khona isigxina iintsapho ezichaphazeleke kwizikhukhula zaseMthatha eMpuma Koloni. UNyhontso utyelele iKumkani kwibhotwe layo iNkululekweni, ukuyakuxoxa ngokunikela ngomhlaba kwezintsapho. Kwisithuba senyanga, iimvula ezine ngamandla nezikhukhula zintlithe imimandla yaseSlovo Park naseDecoligny, nalapho ngaphaya kwekhulu labantu eliye lasweleka. UFundiswa Mhlekude usenzele le ngxelo...

Kukho iingxelo zokuba inkokheli yombutho uMkhonto we-Sizwe Party, uJacob Zuma, utyelele ilizwe laseMorocco. Kukho uluvo lokuba oko kwenziwe nguZuma akuhambisani nesigqibo esathathwayo sokuxhasa ilizwe iWestern Sahara. Kukho ukungaboni ngasonye phakathi kweMorocco neWestern Sahara, nalapho kubangwa khona umhlaba. UMzantsi Afrika wathatha isigqibo sokuxhasa ilizwe iWestern Sahara ukuze bafumane ukukhululeka. Ukusihlalutyela banzi uAyabonga Kekana uncokole nomhlalutyi wezopolitiko ugqirhalwazi uXolisile Ngumbela. 

UNdileka Mandela nongumzukulwa wowayesakuba ngumongameli weli, uNelson Mandela, uthi uMadiba ebengazokonwaba yimeko eli lizwe elikuyo. Uthi izinga eliphezulu lorhwaphilizo kwakunye nokungasiwa kweenkonzo eluntwini, azihambisani noko wayekulwela. Ebethetha nabendaba zeSABC eNxukhwebe eMpuma Koloni, nalapho urhulumente wephondo ebephawula usuku lukaMadiba. UAbongile Jantjies usenzela lengxelo. 

Amabanjwa amahlanu achazwa njenga nobungozi asuka kwiintolongo zaseMelika, athunyelwe kwintolongo yelizwe lase Swatini. Lamabanjwa ajamelene namatyala ohlukileyo aquka ukubulala nokudlwengula abantwana. Amazwe abo okuzalwa yi-Vietnam, Jamaica, Yemen, Cuba kwakunye naseLaos. Urhulumente waseMelika uthe oorhulumente balamazwe lamabanjwa asuka kuwo, bayala ukuwamkela. UAyabonga Kekana uncokole  nomhleli weendaba kwiphepha ndaba iSwaziland News, uZweli Martin Dlamini

Iindaba zeSABC zifinca iminyaka engamashumi asixhenxe anesihlanu zinika uluntu iindaba kweli lizwe. Ezinye zeentatheli noonondaba abasebenzele elijelo loluntu, bathi iindaba zeSABC zalixhonkxa ikamva labo, ngenxa yeqonga abalinikwayo kuloo minyaka. Kwinkqubo-ndaba yakho ekhethekileyo namhlanje sincokole nobambele nje ngomlawuli weendaba kwijelo iSABC, uDeidre Uren, ababesakuba ngabahleli beendaba kunomathotholo uZolisa Sigabi noFikile Lubisi, iintatheli uJudy Ngoloyi no Mzwandile Ngcivana kwakunye nowayesakuba yiTechnical Producer uCharles Hart...

Umphathiswa kwisebe elilawula i-ofisi nemisebenzi kamongameli, uKhumbudzo Ntshavheni, uthi ubuntlola beli lizwe bufumanise ukuba bezikho iintshukumo zokubhukuqa umbuso. UNtshavheni oku ukuvakalise ngethuba ethetha noonondaba izolo nalapho enikeza ingxelo ngesicwangciso sikarhulumente sokhuselo nokhuseleko lwelizwe, nesaphunyezwa yikhabhinethi kunyaka odlulileyo. Kwelinye icala, kukho izimemelelo zokuba makalahle kwisikhundla sakhe umongameli uCyril Ramaphosa. Oku kuvakaliswe liziko i-Walter and Albertina Sisulu Foundation. Wona umbutho iMK Party ubhenela kwinkundla yomgaqo-siseko icela umngeni kwisigqibo sikamongameli sokusebenzisa isolotya lomgaqo-siseko uSection 98, nalapho achonge uNjingalwazi uFiroz Cachalia njengebambela mphathiswa kwisebe lenkonzo yesipolisa.Ayabonga Kekana uncokola nomhlalutyi wezopolitiko uHlumelo Xaba…

Umbutho i-Build One South Afrika, iBOSA, uthe thaca umthetho oyilwayo epalamente, nonjongo yawo ikukuyilwa ngokutsha komthetho kamakulinganwe ngokwengqesho, i-Employment Equity Act. Phakathi kwezinye izihlomelo, lo mthetho ujolise ekuqinisekiseni ukuba kukho umakulinganwe ekuhlawulweni komvuzo kubasebenzi abenza umsebenzi ofanayo, nokuba umqeshi anganyanzelisi isiqinisekiso sentlawulo somqeshwa (pay slip) kwindawo ebesebenza kuyo, xa eza kuqeshwa kwindawo entsha yengqesho. Ayabonga Kekana unchokola nophuma kulombutho uHenry Masuku.

Ingxelo ekhutshwe kutshanje, negxile kumba wokuhlawulwa emva kwexesha kwabanikezeli ngeenkonzo ngamaSebe ka rhulumente, ibonisa umbono ombi wokungathotyelwa komgaqonkqubo obizwa iTreasury Regulation 8.2.3 ophantsi kwesolotya 38 (1) yomthetho ongqamene nokulawulwa kwemali karhulumente ka-1999. Iphondo iMpuma Koloni lelinye lamaphondo acatshulwe kule ngxelo nje ngawona enza kakubi kakhulu ekuhlawuleni abanikezeli ngeenkonzo. Yimali engaphaya kwe R4,5 yee-billion zeerandi ebekufanele ukuba eli phondo liyihlawule aba banikezeli ngeenkonzo, kwisithuba eside sadlula nakwiintsuku ezingamashumi amathathu. UAyabonga Kekana uncokole nophuma kwiofisi kangondyebo ephondweni uPhumelele Godongwana...