Kubonakala ngathi ibeyi mpumelelo kulonyaka iBlack friday, nalapho umzuzu ngamnye kuthengwe amatyeli angapha kwamakhulu asithoba (900)  ngosuku lweBlack Friday, ze kwathengwa amatyeli angamakhulu asixhenxe (700) ngomzuzu kwiCyber Monday. Ngokokutsho kwecandelo elijongene neentlawulo iPayInc, oku kubonakalisa ukusetyenziswa kakhulu kwemali ngelixesha. Inkampani ye insurance iVouch.co.za, ithi iintlawulo zenyanga yeNkanga zonyuke nge 15% xa kuthelekiswa nabanye oonyaka. Masive kwingxelo ka Nothando Magudulela...

Isebe lorhulumento ngentsebenziswano, lichonge iqela labantu abalishumi abazakujongana nendlela yokuziphatha kumasipala ombaxa iNelson Mandela Bay eMpuma Koloni ukuqinisa ulawulo, ukulungisa iinkqubo ezisilelayo lincedise nokuvuselela uhanjiso lweenkonzo. Olungenelelo luza njengokuba unondyebo weli egrogrise ngokubamba isixa-mali esingange 546 million randi eyabelwe lomasipala, ngaphandle kokuba lo masipala uthatha amanyathelo ngemali engaphezulu kwe 30billion randi kwinkcitho engafanelekanga esele kudala isenzeka. UNandipha Plaatjie usenzele le ngxelo...

Isebe lezothutho eMpuma Koloni lisebenzisana nelezempilo, lisungula iphulo lexesha leziyunguma lika fika uphila kuKomani. Amagosa ezendlela azakunikezwa izithuthi ezintsha ezingamashumi amathathu anesithandathu, ngelinge lokuqinisekisa ukuba ayabonakala ukuqinisekisa ukhuseleko ezindleleni. Kwisithuba nje saleveki idlulileyo, sele bebahlanu abantu ababhubhe ezindleleni, kwabanjwa abangamashumi asixhenxe ngokuqhuba phantsi kweempembelelo zotywala. Ukuncokola banzi ngeliphulo, Ayabonga Kekana uncokola nothethela isebe lezothutho apha ephondweni u Unathi Binqose......

ISebe lamagqala omkhosi libambe inkqubo kwisizwe siphela sokukhangela abo bangamagqala omkhosi, nabangasawafumaniyo amaqithiqithi ebekufanele ukuba baxhamla kuwo. Le nkqubo ikwaqulathe ukucocwa koluhlu lwabo, kususwe abo baxhamla ngobuqhetseba kwiSebe. Iqela elityunjwe ngumongameli elichongelwe ukubumba olu luhlu lwamagqala omkhosi, ukuqinisekisa ukuba kukho abantu abafanele ukuba kulo ngokwenene, ukucoca olu luhlu kwa nokomeleza umsebenzi wamagosa eli qela, sithethanje likuMntla Koloni isithuba esingangeeveki ezimbini ngelokukhangela amajoni angaqukwanga kolu luhlu. UZukiswa Tshume uza nengxelo kaKarabo Siyoko...

Kubanjwe oonogada ababini baka Katiso KT Molefe nongumtyholwa kwityala lobulala. Oku kwenzeke kwinkundla kamantyi yaseAlexandra eRhawutini. UMolefe kwakunye nesithathu atyholwa naso, bavele okwethutyana enkundleni phambi kokuba ityala labo lithunyelwe kwinkundla ephakamileyo yaseRhawutini. UMolefe utyholwa ngokuba ngungqongqondo wokuqesha iinkabi zibulale abantu ekunye natyholwa nabo. Lamatyala aquka ukubulawa kwenjineli uArmand Swart, uOupa Sefoka nowaziwa ngoDJ Sumbody, uHector Buthelezi nowaziwa ngoDJ Vintos kwakunye nosomashishini, uDon Tindleni. UVuyolwethu Mabeqa ukwenzele le ngxelo kaSashin Naidoo...

Usihlalo we ANC eMpuma Koloni, uOscar Mabuyane, uzibhebhethile iingxelo zokuba ufuna ithuba lesithathu njengosihlalo wephondo nokuba sithetha nje wenza iinzame zokuba kwisikhundla esiphezulu salo mbutho kuzwelonke, xa kubanjwe unyulo lukazwelonke ngo2027. Uthi uyakuzicinga ezimbono xa kufike ixesha. UMabuyane ebethetha nejelo leSABC ngethuba lentlanganiso yebhunga lalombutho ephondweni, ngaphambi kwentlanganiso yesihlanu yebhunga kuzwelonke, nezakubanjwa ngoMvulo eBoksburg. UHlumisa Qabaka usenzele le ngxelo

Ibhunga lamadoda oMzantsi Afrika liqalisa iphulo elizakunceda abantu abangootata abangaphangeliyo, ukwenza isimo sibengcono kwelixesha leziyunguma. Eliphulo libizwa "Support a Man in Need- Restore a Family, Rebuild a Nation". Elibhunga limemelela oosomashishini, amaziko ohlukileyo nabantu abanokukwazi ukuxhasa ukuba bafake isandla ekuncedeni ootata ngelixesha. Lilindeleke ukuba lifikelele kuwo onke amaphondo woMzantsi Afrika eliphulo. Ayabonga Kekana uncokola nomongameli we Mens Council of South Africa, u Fikile Dyantyi......

Isebe lezempilo eMpuma Koloni lithi ukufuduka kwabantu besuka kwezinye izixeko besiya kwezinye, kusengumngeni ekuqinisekiseni ukuba abantu abanentsholongwane kagawulayo bafumana amachiza abo ngalolonke ixesha kweli phondo. Eliphondo liphawule usuku oluqwalasela ugawulayo kwihlabathi jikelele, kwaZakhele eGqeberha. Ngokokwengxelo esuka kwelisebe, ngabantu abasondele kwikhulu lamawaka namashumi amane anesibhozo abaphila nale ntsholongwane nabazaziyo, kodwa bengawasebenzisi amachiza okuyithomalalisa. Isebe lithi liphehlelele amaphulo amabini azakugxila ekubeni kungenwe umzi nomzi ukuze kufikelelwe ebantwini abangatyi mayeza. UNtombozuko Balintulo usenzele le ngxelo...

Umhla wesithathu kweyeNkanga, ukuyakuthi ga kowesithathu kweyoMnga, qho ngonyaka, uMzantsi Afrika uphawula inyanga ebekelwe bucala ukunika ingqwalasela, nokubhiyozela amalungelo abantu abanokhubazeko, i-Disability Rights Awareness Month ngolwasemzini. Ukhubazeko lwenzeka esazalwa umntwana, kodwa ngamanye amaxesha umntu ulufumana ngexa esakhula, okanye ekukhuleni kwakhe. Le nyanga ke inika ithuba kuthi sonke ukuba sisuse imiqobo ebangela ukuba abantu abanokhubazeko bangawangcamli ngokupheleleyo amalungelo abo, kuquka nokuphucula ubomi babo, ngokuthi kuthatyathwe amanyathelo angawo.  Urhulumente unoxanduva lokuqinisekisa umakulinganwe nokuxhotyiswa kwaye wonke umntu onokhubazeko. Kungenziwa njani ke ngoku ukuqinisekisa ukuba umntu onokhubazeko uphila ubomi bakhe ngokupheleleyo, axhamle kumathuba ngokufanayo nogxa wakeh ongenakhubazeko? Ukuxoxa banzi ngalo mba, emnxebeni uAyabonga Kekana ubambe usekela-sihlalo wombutho iDisabled Youth South Africa uNana Skenjana, kwakunye netshantliziyo elililizwi labantu abanokhubazeko uThembelihle Ngcai...

Umbutho ongekho phantsi korhulumente, iCodeNgwana, uzakube uphehlelela iveki ebizwa iFuture Innovators Coding Week, eGqeberha kwiMpuma Koloni, nalapho kwakube kuqeqeshwa abafundi nootitshala abaphuma kwizikolo ezintandathu zesi sixeko, kwizifundo ze Coding. Olu qeqesho lwakubanjelwa kwisikolo samabanga aphakamileyo iSoqhayisa eMotherwell, ngomhla wokuqala ukuya kowesihlanu kweyoMnga. Ukuva banzi ngale nkqubo, emnxebeni uAmanda Xhala ubambe ingqonyela ye CodeNgwana, uNoluvuyo Gqadu...