Ten spyte van ‘n moeilike jaar wêreldwyd, kyk Wiele2Wiele terug na hulle 2020 Wiele-hoogtepunte. Hulle deel ‘n inspirerende storie oor ‘n seuntjie wat se droom 51 jaar later bewaardheid is en Dunlop Tyres gee wenke wat selfs jou kroos op die langpad sal besig hou.

Hierdie week gesels Wiele2Wiele oor ‘n voertuig wat sy verrigting onder ‘n dekmantel wegsteek – Audi se S6-sedan. Hulle gaan ry ook met Toyota se nuwe kragtiger Fortuner en met Volvo se luukse XC60-sportnuts. Die span vertel jou ook meer oor die Kyalami-9-uur-uithouren en gesels met die manne van Toyota Gazoo Racing SA wat ons vlag hoog gaan hou by die 2021 Dakar-ren.

Hierdie week vir Wiele2Wiele rol die wiele saam met Ford SA om ‘n verskil te maak met hulle “RangeHER Drives with a Mission”-projek. Hulle gaan ry ook met BMW se nuwe 4-reeks, Kia se opgeknapte Rio en vertel jou hoe jy musiek met ‘n uitlaatsisteem kan maak.

In hierdie week se episode van Wiele2Wiele rol die wiele teen ‘n spoed met drie bekendstellings – Volkswagen se langverwagte T-Roc in hulle T-sportnuts reeks, Hyundai se spliternuwe Creta en Toyota se nuwe intree A-segment-model, die Agya.

Hierdie week skyn Wiele2Wiele die kollig op Audi se nuwe Q7, gaan ry met Nissan se spesiale Qashqai Midnight Edition en deel Nissan se nuus oor hulle nuwe Navara-bakkie. Hulle gee ook raad oor dinamometers en vertel jou wie is ons Suider-Afrika-deelnemers aan die 2021-Dakar-ren.

Hierdie week gaan ry Wiele2Wiele met die Mercedes-AMG A 35, Honda se nuwe Ballade en hulle nuwe WR-V. Toyota se opgekikkerde Fortuner is hier en hulle het 2021 Dakar-nuus. Powerflow Bellville verduidelik die verskil tussen vlekvrye staal en sagte saal en dan kan jou sesde sintuig jou beskerm op jou motorfiets.

Hierdie week is Wiele2Wiele rooi en mooi met Porsche se giftige Cayenne GTS. Hulle vertel vir jou meer oor die oulike Mazda2 en voel of hulle in ‘n luukse sitkamer sit met Mercedes-Benz se V300d-bussie. Hulle het ‘n interessante wenk en gesels met Neil van der Vyver, die nuwe 65cc- Suid-Afrikaanse Motocross-kampioen.

Hierdie week vir Wiele2Wiele gaan jy styf moet vasklou vir Porsche se blitsige 911 Turbo S. Hulle vat jou ook op ‘n Land Rover Defender-ekspedisie saam met die Kingsley Holgate-stigting om ‘n verskil te maak, raak groen oor Car-tydskrif se ‘Performance Shootout’ en raak lus vir ‘n motorfietsavontuur saam met Bike Routes.

Hierdie week vertel Wiele2Wiele jou meer oor Hyundai se nuwe Grand i10, gaan rits rond met Honda se Civic Sport-sedan en vat die pad saam met Dunlop-bande en hulle ‘Grandtrek Uncharted’-projek. Hulle vertel jou ook meer oor hul ervaring van BMW se R 180-motorfiets en maak jou lus om weer ‘n Superbike-tydskrif in jou hande vas te hou.

Hierdie week het die Wiele2Wiele-span ‘n giggelgeel-laggie van lekkerte wanneer hulle gaan ry met die Porsche 718 Cayman GT4. Hulle vertel jou ook oor Renault se Sandero-reeks wat opgeknap is met ‘n Stepway Techroad-model, hoor hoe klink dit binne-in ‘n SVI Max 3 koeëlvaste voertuig en gee raad vir 2-wiele.