文稿／主持／配樂︱陳曉怡 Niau-tāu

潤稿／校對︱蔡逸民 BuLuhSuh

人聲編輯︱柯王炳勳 Bí-leng

字幕︱林于真 A-chin

圖︱AI製圖

影片︱陳姿樺 Ko͘-chiáu

訂閱做工á人Youtube頻道：https://www.youtube.com/@chokangalang

完整ê漢羅／POJ對照文稿khǹg ti官方網站：https://cho-kang-a-lang.github.io/

各位聽眾朋友，ta̍k-ê好，我是主持人Niau-tāu，歡迎收聽做工á人phá-kheh-su̍h-to͘h。Piak劇情警告！Chit擺beh紹介--ê是推理類型ê戲齣，若是有按算beh看chit齣戲，m̄-koh無ài先知影是siáng死--去-ah ê朋友，會當考慮先kā戲看了，chiah來hâm阮討論neh！Chit-má故事beh開始--lo͘h~

Louise hâm in翁婿離緣，家己1 ê人teh chhiâⁿ囝，伊感覺真孤單。有1日，伊去tn̄g-tio̍h 1 ê緣投ê查埔人David。In 2 ê真投機，話講kah tng歡喜ê時，David soah雄雄鬱卒--起-來，伊chŏaⁿ kā Louise講伊已經結婚--a，對伊真歹勢，人to̍h走--ah。Louise感覺家己運氣實在真bái。

隔轉工去上班ê時，看tio̍h新來ê頂司竟然to̍h是David，Louise感覺運氣有影m̄是普通bái niâ，根本to̍h是beh hō͘伊無路thang行，m̄-koh David啥to無講。Louise對chit-ê頂司感覺hòⁿ玄，1 ê體貼，善良，緣投，koh事業成功ê人，是按怎看--khài chiah-nī-á無快樂。

Koh翻轉工Louis無意中去tú-tio̍h 1 ê看--起-來美麗koh溫柔ê查某人Adele。Adele想beh hâm伊做朋友，伊是tăⁿ搬--來-ê，無熟似ê朋友tī chia。Adele雖罔真友善ê款，m̄-koh soah hō͘人1種怪怪ê感覺，beh講tó位奇怪koh講bē出--來。Louise想無，to̍h當做是家己厚猜疑，烏白想。

Hō͘ Louise想攏bē到ê代誌to̍h是，Adele hâm David in 2 ê竟然是翁á某。有1工，伊上班ê時，David青磅白磅來ka講m̄-thang hâm Adele行siuⁿ近，因端是啥soah無講，m̄-koh表現kah親像真防備Adele ê款！另外1 pêng Louise hâm Adele mā愈來愈親密，伊發見Adele hâm伊有仝款ê病，有夢遊症koh兼會做惡夢，另外，Adele koh要求Louise mài kā David講in 2 ê有teh往來ê代誌。

Louise hâm David因為khang-khòe ê關係，ta̍k工見面， in 2 ê愈行愈óa，無偌久，in 2 ê to̍h有leh行--ah。仝chit段時間，Louise mā定定hâm Adele做夥去咖啡廳lim咖啡、運動，分享in ê病情，2 ê人mā變做好朋友，伊照Adele講--ê，無kā David講hâm in某有teh往來ê代誌。To̍h án-ne，In 3 ê人ê關係to̍h變kah足奇怪。

有1工Adele去Louise ê厝--ni̍h chhōe--伊，伊kā Louise講，因為伊ê爸母同齊時過身--去，hō͘伊受tio̍h真大ê打擊，伊to̍h去療養院治療。伊teh療養院內底熟似Rob，Rob mā hâm in有仝款ê病症，koh有ka教講ài按怎控制家己ê病。了後，Adele the̍h Rob ê筆記出--來，mā beh教Louise ài按怎做；in用ê方式真奇妙，是hō͘靈魂hâm身軀分--開，án-ne to̍h會使知影家己是tī夢--ni̍h a̍h是tī現實世界，利用chit-ê方式來控制病情。Adele講，因為in是真特別ê人，chiah有法度靈魂出竅。

尾後，Louise to̍h真用心teh看筆記學習，因為chit-ê病已經hō͘伊困擾足久--ah。伊驚家己夢遊ê時，會去傷害tio̍h家己或者是伊ê後生。

Adele hâm Louise開講ê時，有去講tio̍h David定定teh偷食，咖啡廳ê頭家娘to̍h是其中1 ê。Mā無意中hâm Louise講David開1大堆藥á ho͘食，定定敲電話問伊chit-má人tī toeh？Koh看tio̍h伊ê身軀頂有烏青，種種ê情形hō͘ Louise憢疑David m̄-nā會phah某，而且用心理醫生ê專業teh控制--伊！Louise想tio̍h David ê生張樣siùⁿ，無法度相信伊是彼款人。M̄-koh Adele chit ê人是hiah-nī-á好鬥陣，kám講伊會講白賊？雖罔，Adele有時陣會hō͘人感覺無啥爽快，chit時伊mā無法度判斷siáng講--ê是真--ê！

有1日半暝Louise走去診所偷掀David ê物件，tī David ê thoah-á內底揣tio̍h Adele ê病歷，頂koân有註解1句奇怪ê話，「伊無可能知影chit寡代誌chiah tio̍h！」Louise感覺代誌愈來愈khi-khiau。尾--á伊tòng-bē-tiâu，to̍h直接問David，David 1-ē知影伊hâm in某有teh往來niâ，kui-ê人強欲掠狂，叫伊離Adele較遠--leh，Louise真受氣，失嘴講：「我知影你kā Adele ê錢攏the̍h走，to̍h是beh控制--伊！」David聽tio̍h伊án-ne ìn，直接to̍h kā Louise辭頭路。

傷心ê Louise規氣to̍h看筆記練習控制家己ê夢，尾--á伊成功--ah。M̄-koh伊tī夢--ni̍h看tio̍h 1寡情景，雄雄想tio̍h David ê hit句註解，伊koh詳細去看Rob ê筆記，chiah發現筆記內底寫ê Adele，hâm伊所熟似--ê無啥相siâng。而且筆記siōng尾幾頁hông拆破--去，是siáng做--ê？為怎樣beh thiah？伊ê疑問siuⁿ濟--ā，só͘-pái，伊決定beh家己loeh調查，看事實到底是怎樣。

伊敲電話hō͘ Rob ê阿姊，in姊--á講療養院ê治療根本to無效，Rob出--來了後，無jōa久to̍h koh去食毒--ah，人mā m̄知走對toeh去，伊lóng無Rob ê消息。Louise to̍h koh去問咖啡廳ê頭家娘，頭家娘講，David是1 ê苦憐ê查埔人，伊bat問過頭家娘，kám相信有人ē-tàng m̄免tī現場，to̍h thang知影所有ê代誌--leh？因為David憢疑家己kám是規工攏teh hông監視，m̄-koh在伊看--來，che koh是無可能做會到--ê。David koh bat kā頭家娘講，較早伊所愛ê Adele已經變--ah，伊無法度親像進前án-ne繼續愛--伊，che hō͘ David感覺足痛苦。是講，mā m̄知David kám是有啥cháng頭hō͘ Adele掠--tio̍h，伊bē-tàng離開Adele，m̄-koh伊mā無想beh轉去厝--ni̍h，to̍h規工攏tī咖啡廳坐。Chit-lō情形soah引起Adele怨妒，伊感覺David hâm頭家娘2人一定有teh偷來暗去，chŏaⁿ走去kā頭家娘威脅。頭家娘路尾勸Louise，hit對翁á某ê代誌，伊iáu是mài chhap較好。

聽到chia，Louise已經完全了解--ah，伊liâm-mi敲電話hō͘ David，ka講，Adele是刁工接近--伊，koh講真濟白賊話引伊誤解David，David講伊瞭解--ah，代誌伊來處理to̍h好，叫Louise m̄通接近Adele。

Louise轉到厝，對空氣講，Adele你kám teh看--我？話chiah講soah，電話隨liang，Adele tī電話hit-pêng講，「你kám是beh揣--我？」

In 2 ê冤--起-來，Adele現出真面目，ná像起siáu仝款，大聲lé罵，Louise叫Adele放David自由，講David已經知--a。Adele chŏaⁿ掠狂，講伊nā無David，伊bē活--chit，電話to̍h切斷。

Louise chhoah 1 tiô，緊走去Adele in tau，mā順sòa報警察。伊到tè ê時，看tio̍h Adele竟然放火，tng teh緊張，門koh鎖tiâu--leh，伊只好the tī門口用靈魂出竅ê方式，入去揣Adele。

Adele ê身軀倒tī眠床，眠床邊khiā 1 ê伊m̄-bat看--過ê「靈魂」，是Rob。

警察來ê時，Adele已經死--去-ah，kan-na chhun Louise teh吼。

故事最後David hâm Louise結婚--a，David看--起-來真歡喜。M̄-koh Louise ê囡á，有淡薄á煩惱，伊感覺媽媽nah會hâm較早無啥仝！伊斟酌ka看，chit時Louise寬寬á回頭，對伊笑--1-ē，hit-ê笑，hō͘囡á感覺怪怪。M̄-koh beh講tó位怪怪koh講bē啥ē出--來。

Tăⁿ開始我ioh是Adele精神有問題，伊看--起-來to̍h hông感覺怪怪。後--來掠準問題是tī David hia，伊利用Adele對伊ê愛來ka控制；而且koh kā Rob刣--死。尾--á chiah知影所有ê代誌攏是Adele做--ê；本底想講結局--ah，siáng知藏鏡人竟然是Rob，外表是Adele，內底soah是Rob ê靈魂。

結局hō͘我看了規身軀起雞母皮，莫怪Adele會hông感覺怪怪，所以David會感覺in某無對同，會感覺規工攏teh hông監視。因為David ê愛人á，hit-ê心肝善良、軟心ê Adele，已經hō͘伊真心對待ê朋友害--死-ah。

有bē少看--過ê人teh討論，親像有人講David無離開Adele，是因為Adele tàn Rob ê死體，kā David ê手錶á lak tī leh死體ê邊--á，伊hō͘假ê Adele威脅。M̄-koh我感覺上大ê原因是伊不忍心離開Adele。Adele ê爸母攏死--去-ah，koh對伊有恩情tī--leh，伊讀醫學院ê學費to̍h是Adele出--ê。Adele kán-ná變1 ê人，伊本底是bē曉煮飯--ê，後--來為tio̍h挽回David ê心soah煮1大桌ê菜；David是心理醫生，伊可能會感覺Adele是破病--ā，像出現第二ê人格彼款，chiah會強迫伊食藥á。不過án-ne是無法度解說Adele按怎會知影，伊無應該知影ê代誌，mā無法度解說伊hông監視ê感覺。Só͘-pái，伊會感覺真痛苦，尤其Adele會因為怨妒去傷害--人；看Louise ka講伊拄tio̍h Adele，David隨叫伊離Adele較遠--leh，to̍h知影Adele進前定定án-ne做，in可能mā是姑不將chiah搬來chia。

推薦chit齣影集，若是kah意輕鬆á看ê人，tòe劇情loeh行，看劇情teh轉se̍h，會hō͘你bē-bái ê體驗，看了，會感覺：Óa！竟然是án-ne！若是kah意推理細節ê人，mā足適合看第2遍，伊ê安排有夠巧妙，細節真濟。看--過koh看，to̍h會知影線索真早to̍h出現--ā，會發現，我leh，原來chit ê所在已經有暗示--ā！Ah，án-ne解說mā會通neh！

親像靈魂ê色水是無仝--ê，Adele是粉紅á色，Rob是藍色，Louise是綠色。

劇情teh行會發現，若畫面，是頂懸向ē-kha--ê，che to̍h是Rob ê靈魂teh偷看、監視。

「3 ê人beh守祕密，其中2 ê to̍h ài死」，chit齣戲，kan-na台灣是號做án-ne，其他ê所在，攏是照英文名loeh翻譯。M̄-koh，我認為翻譯了真好

，

我to̍h是因為戲齣ê名chiah點出來看，結果真kah意。本底想講chit齣戲是teh講婚姻，結果m̄是--leh，講--ê是「貪」。

Hō͘人感覺上恐怖--ê，是chit-má khiā tī你面頭前ê人，kám真正是你認捌ê hit-ê？

你nā有Rob ê能力，你ê選擇是啥？Kám會做相siâng ê代誌？

今á日hâm各位觀眾朋友紹介--ê，m̄知ta̍k-ê kám有揣tio̍h無仝款ê細節？A̍h是對chit齣戲有無仝ê想法？歡迎留話kā阮講ŏ͘！咱會使做夥來討論！感謝各位聽眾朋友今á日ê收聽，咱後回再會ō͘！

3** ê lâng beh siú pì-bi̍t, kî-tiong 2 ê to̍h ài sí| Behind Her Eyes **

Kok-ūi thiaⁿ-chiòng pêng-iú, ta̍k-ê hó, góa sī chú-chhî-jîn Niau-tāu, hoan-gêng siu-thiaⁿ chò-kang-á-lâng phá-kheh-su̍h-to͘h. Piak kio̍k-chêng kéng-kò! Chit pái beh siāu-kài--ê sī chhui-lí lūi-hêng ê hì-chhut, nā sī ū àn-sǹg beh khòaⁿ chit chhut hì, m̄-koh bô-ài seng chai-iáⁿ sī siáng sí--khì-ah ê pêng-iú, ē-tàng khó-lū seng kā hì khòaⁿ liáu, chiah lâi hâm gún thó-lūn neh! Chit-má kò͘-sū beh khai-sí--lo͘h~

Louise hâm in ang-sài lî-iân, ka-tī 1 ê lâng teh chhiâⁿ kiáⁿ, i kám-kak chin ko͘-toaⁿ. Ū 1 ji̍t, i khì tn̄g-tio̍h 1 ê iân-tâu ê cha-po͘-lâng David. In 2 ê chin tâu-ki, ōe kóng kah tng hoaⁿ-hí ê sî, David soah hiông-hiông ut-chut--khí-lâi, i chŏaⁿ kā Louise kóng i í-keng kiat-hun--a, tùi i chin pháiⁿ-sè, lâng to̍h cháu--ah. Louise kám-kak ka-tī ūn-khì si̍t-chāi chin bái.

Keh-tńg-kang khì siōng-pan ê sî, khòaⁿ tio̍h sin lâi ê téng-si kèng-jiân to̍h sī David, Louise kám-kak ūn-khì ū-iáⁿ m̄ sī phó͘-thong bái niâ, kin-pún to̍h sī beh hō͘ i bô-lō͘ thang kiâⁿ, m̄-koh David siáⁿ to bô kóng. Louise tùi chit-ê téng-si kám-kak hòⁿ-hiân, 1 ê thé-thiap, siān-liông, iân-tâu, koh sū-gia̍p sêng-kong ê lâng, sī án-chóaⁿ khòaⁿ--khài chiah-nī-á bô khoài-lo̍k.

Koh hoan-tńg-kang Louis bô-ì-tiong khì tú-tio̍h 1 ê khòaⁿ--khí-lâi bí-lē koh un-jiû ê cha-bó͘-lâng Adele. Adele siūⁿ beh hâm i chò pêng-iú, i sī tăⁿ poaⁿ--lâi-ê, bô se̍k-sāi ê pêng-iú tī chia. Adele sui-bóng chin iú-siān ê khoán, m̄-koh soah hō͘-lâng 1 chióng koài-koài ê kám-kak, beh kóng tó-ūi kî-koài koh kóng bē chhut--lâi. Louise siūⁿ bô, to̍h tòng-chò sī ka-tī kāu chhai-gî, o͘-pe̍h siūⁿ.

Hō͘ Louise siūⁿ lóng bē kàu ê tāi-chì to̍h sī, Adele hâm David in 2 ê kèng-jiân sī ang-á-bó͘. Ū 1 kang, i siōng-pan ê sî, David chheⁿ-pōng-pe̍h-pōng lâi ka kóng m̄-thang hâm Adele kiâⁿ siuⁿ kīn, in-toaⁿ sī siáⁿ soah bô kóng, m̄-koh piáu-hiān kah chhin-chhiūⁿ chin hông-pī Adele ê khoán! Lēng-gōa 1 pêng Louise hâm Adele mā jú lâi jú chhin-bi̍t, i hoat-kiàn Adele hâm i ū kāng-khoán ê pēⁿ, ū bāng-iû-chèng koh kiam ē chò ok-bāng, lēng-gōa, Adele koh iau-kiû Louise mài kā David kóng in 2 ê ū teh óng-lâi ê tāi-chì.

Louise hâm David in-ūi khang-khòe ê koan-hē, ta̍k kang kìⁿ-bīn, in 2 ê jú kiâⁿ jú óa, bô-jōa-kú, in 2 ê to̍h ū leh kiâⁿ--ah. Kâng chit tōaⁿ sî-kan, Louise mā tiāⁿ-tiāⁿ hâm Adele chò-hóe khì ka-pi-thiaⁿ lim ka-pi, ūn-tōng, hun-hióng in ê pēⁿ-chêng, 2 ê lâng mā piàn-chò hó pêng-iú, i chiàu Adele kóng--ê, bô kā David kóng hâm in bó͘ ū teh óng-lâi ê tāi-chì. To̍h án-ne, In 3 ê lâng ê koan-hē to̍h piàn kah chiok kî-koài.

Ū 1 kang Adele khì Louise ê chhù--ni̍h chhōe--i, i kā Louise kóng, in-ūi i ê pē-bú tâng-chê-sî kòe-sin--khì, hō͘ i siū tio̍h chin tōa ê tá-kek, i to̍h khì liâu-ióng-īⁿ tī-liâu. I teh liâu-ióng-īⁿ lāi-té se̍k-sāi Rob, Rob mā hâm in ū kāng-khoán ê pēⁿ-chèng, koh ū ka kà kóng ài án-chóaⁿ khòng-chè ka-tī ê pēⁿ. Liáu-āu, Adele the̍h Rob ê pit-kì chhut--lâi, mā beh kà Louise ài án-chóaⁿ chò; in iōng ê hong-sek chin kî-biāu, sī hō͘ lêng-hûn hâm seng-khu hun--khui, án-ne to̍h ē-sái chai-iáⁿ ka-tī sī tī bāng--ni̍h a̍h sī tī hiān-si̍t sè-kài, lī-iōng chit-ê hong-sek lâi khòng-chè pēⁿ-chêng. Adele kóng, in-ūi in sī chin te̍k-pia̍t ê lâng, chiah ū hoat-tō͘ lêng-hûn chhut khiàu.

Bóe-āu, Louise to̍h chin iōng-sim teh khòaⁿ pit-kì ha̍k-si̍p, in-ūi chit-ê pēⁿ í-keng hō͘ i khùn-jiáu chiok kú--ah. I kiaⁿ ka-tī bāng-iû ê sî, ē khì siong-hāi tio̍h ka-tī he̍k-chiá sī i ê hāu-seⁿ.

Adele hâm Louise khai-káng ê sî, ū khì kóng tio̍h David tiāⁿ-tiāⁿ teh thau-chia̍h, ka-pi-thiaⁿ ê thâu-ke-niû to̍h sī kî-tiong 1 ê. Mā bô-ì-tiong hâm Louise kóng David khui 1 tōa tui io̍h-á ho͘ chia̍h, tiāⁿ-tiāⁿ khà tiān-ōe mn̄g i chit-má lâng tī toeh? Koh khòaⁿ tio̍h i ê seng-khu téng ū o͘-chheⁿ, chióng-chióng ê chêng-hêng hō͘ Louise giâu-gî David m̄-nā ē phah bó͘, jî-chhiáⁿ iōng sim-lí i-seng ê choan-gia̍p teh khòng-chè--i! Louise siūⁿ tio̍h David ê seⁿ-tiuⁿ iūⁿ-siùⁿ, bô-hoat-tō͘ siong-sìn i sī hit khoán lâng. M̄-koh Adele chit ê lâng sī hiah-nī-á hó tàu-tīn, kám kóng i ē kóng pe̍h-chha̍t? Sui-bóng, Adele ū sî-chūn ē hō͘-lâng kám-kak bô siáⁿ sóng-khoài, chit sî i mā bô-hoat-tō͘ phòaⁿ-toàn siáng kóng--ê sī chin--ê!

Ū 1 ji̍t pòaⁿ-mê Louise cháu khì chín-só͘ thau hian David ê mi̍h-kiāⁿ, tī David ê thoah-á lāi-té chhōe tio̍h Adele ê pēⁿ-le̍k, téng-koân ū chù-kái 1 kù kî-koài ê ōe, “i bô khó-lêng chai-iáⁿ chit-kóa tāi-chì chiah tio̍h!” Louise kám-kak tāi-chì jú lâi jú khi-khiau. Bóe--á i tòng-bē-tiâu, to̍h ti̍t-chiap mn̄g David, David 1-ē chai-iáⁿ i hâm in bó͘ ū teh óng-lâi niâ, kui ê lâng kiōng-beh lia̍h-kông, kiò i lī Adele khah hn̄g--leh, Louise chin siū-khì, sit-chhùi kóng: “Góa chai-iáⁿ lí kā Adele ê chîⁿ lóng the̍h cháu, to̍h sī beh khòng-chè--i!” David thiaⁿ tio̍h i án-ne ìn, ti̍t-chiap to̍h kā Louise sîthâu-lō͘.

Siong-sim ê Louise kui-khì to̍h hòaⁿ pit-kì liān-si̍p khòng-chè ka-tī ê bāng, bóe--á i sêng-kong--ah. M̄-koh i tī bāng--ni̍h khòaⁿ tio̍h 1-kóa chêng-kéng, hiông-hiông siūⁿ tio̍h David ê hit kù chù-kái, i koh siông-sè khì khòaⁿ Rob ê pit-kì, chiah hoat-hiān pit-kì lāi-té siá ê Adele, hâm i só͘ se̍k-sāi--ê bô siáⁿ sio-siâng. Jî-chhiáⁿ pit-kì siōng bóe kúi ia̍h hông thiah-phòa--khì, sī siáng chò--ê? Ūi chóaⁿ-iūⁿ beh thiah? I ê gî-būn siuⁿ chē--ā, só͘-pái, i koat-tēng beh ka-tī loeh tiâu-cha, khòaⁿ sū-si̍t tàu-té sī chóaⁿ-iūⁿ.

I khà tiān-ōe hō͘ Rob ê a-chí, in chí--á kóng liâu-ióng-īⁿ ê tī-liâu kin-pún to bô-hāu, Rob chhut--lâi liáu-āu, bô-jōa-kú to̍h koh khì chia̍h-to̍k--ah, lâng mā m̄ chai cháu tùi toeh--khì, i lóng bô Rob ê siau-sit. Louise to̍h koh khì mn̄g ka-pi-thiaⁿ ê thâu-ke-niû, thâu-ke-niû kóng, David sī 1 ê khó͘-liân ê cha-po͘-lâng, i bat mn̄g kòe thâu-ke-niû, kám siong-sìn ū lâng ē-tàng m̄-bián tī hiān-tiûⁿ, to̍h thang chai-iáⁿ só͘-ū ê tāi-chì--leh? In-ūi David giâu-gî ka-tī kám sī kui-kang lóng teh hông kàm-sī, m̄-koh chāi i khòaⁿ--lâi, che koh sī bô khó-lêng chò ē kàu--ê. David koh bat kā thâu-ke-niû kóng, khah-chá i só͘ ài ê Adele í-keng piàn--ah, i bô-hoat-tō͘ chhin-chhiūⁿ chìn-chêng án-ne kè-sio̍k ài--i, che hō͘ David kám-kak chiok thòng-khó͘. Sī kóng, mā m̄ chai David kám sī ū siáⁿ cháng-thâu hō͘ Adele lia̍h--tio̍h, i bē-tàng lī-khui Adele, m̄-koh i mā bô siūⁿ beh tńg-khì chhù--ni̍h, to̍h kui-kang lóng tī ka-pi-thiaⁿ chē. Chit-lō chêng-hêng soah ín-khí Adele oàn-tò͘, i kám-kak David hâm thâu-ke-niû 2 lâng it-tēng ū teh thau-lâi-àm-khì, chŏaⁿ cháu khì kā thâu-ke-niû ui-hia̍p. Thâu-ke-niû lō͘-bóe khǹg Louise, hit tùi ang-á-bó͘ ê tāi-chì, i iáu-sī mài chhap khah hó.

Thiaⁿ kàu chia, Louise í-keng oân-choân liáu-kái--ah, i liâm-mi khà tiān-ōe hō͘ David, ka kóng, Adele sī thiau-kang chiap-kīn--i, koh kóng chin chē pe̍h-chha̍t-ōe ín i gō͘-kái David, David kóng i liáu-kái--ah, tāi-chì i lâi chhú-lí to̍h hó, kiò Louise m̄-thang chiap-kīn Adele.

Louise tńg kàu chhù, tùi khong-khì kóng, Adele lí kám teh khòaⁿ--góa? Ōe chiah kóng soah, tiān-ōe sûi liang, Adele tī tiān-ōe hit-pêng kóng, “Lí kám sī beh chhōe--góa?”

In 2 ê oan--khí-lâi, Adele hiàn chhut chin bīn-bo̍k, ná-chhiūⁿ khí-siáu kāng-khoán, tōa-siaⁿ lé-mē, Louise kiò Adele pàng David chū-iû, kóng David í-keng chai--a. Adele chŏaⁿ lia̍h-kông, kóng i nā bô David, i bē oa̍h--chit, tiān-ōe to̍h chhiat-tn̄g.

Louise chhoah 1 tiô, kín cháu khì Adele in tau, mā sūn-sòa pò kèng-chhat. I kàu-tè ê sî, khòaⁿ tio̍h Adele kèng-jiân pàng-hóe, tng teh kín-tiuⁿ, mn̂g koh só tiâu--leh, i chí-hó the tī mn̂g-kháu iōng lêng-hûn chhut khiàu ê hong-sek, ji̍p-khì chhōe Adele.

Adele ê seng-khu tó tī bîn-chhn̂g, bîn-chhn̂g piⁿ khiā 1 ê i m̄-bat khòaⁿ--kòe ê “lêng-hûn”, sī Rob.

Kèng-chhat lâi ê sî, Adele í-keng sí--khì-ah, kan-na chhun Louise teh háu.

Kò͘-sū chòe-āu David hâm Louise kiat-hun--a, David khòaⁿ--khí-lâi chin hoaⁿ-hí. M̄-koh Louise ê gín-á, ū tām-po̍h-á hoân-ló, i kám-kak ma-ma nah ē hâm khah-chá bô-siáⁿ kâng! I chim-chiok ka khòaⁿ, chit sî Louise khoaⁿ-khoaⁿ-á hôe-thâu, tùi i chhiò--1-ē, hit-ê chhiò, hō͘ gín-á kám-kak koài-koài. M̄-koh beh kóng tó-ūi koài-koài koh kóng bē siáⁿ ē chhut--lâi.

Tăⁿ khai-sí góa ioh sī Adele cheng-sîn ū būn-tê, i khòaⁿ--khí-lâi to̍h hông kám-kak koài-koài. Āu--lâi lia̍h-chún būn-tê sī tī David hia, i lī-iōng Adele tùi i ê ài lâi ka khòng-chè; jî-chhiáⁿ koh kā Rob thâi--sí. Bóe--á chiah chai-iáⁿ só͘-ū ê tāi-chì lóng sī Adele chò--ê; pún-té siūⁿ kóng kiat-kio̍k--ah, siáng chai chông-kiàⁿ-jîn kèng-jiân sī Rob, gōa-piáu sī Adele, lāi-té soah sī Rob ê lêng-hûn.

Kiat-kio̍k hō͘ góa khòaⁿ liáu kui seng-khu khí ke-bú-phôe, bo̍k-koài Adele ē hông kám-kak koài-koài, só͘-í David ē kám-kak in bó͘ bô-tùi-tâng, ē kám-kak kui kang lóng teh hông kàm-sī. In-ūi David ê ài-jîn-á, hit ê sim-koaⁿ siān-liông, nńg-sim ê Adele, í-keng hō͘ i chin-sim tùi-thāi ê pêng-iú hāi--sí-ah.

Ū bē chió khòaⁿ--kòe ê lâng teh thó-lūn, chhin-chhiūⁿ ū lâng kóng David bô lī-khui Adele, sī in-ūi Adele tàn Rob ê sí-thé, kā David ê chhiú-pió-á lak tī leh sí-thé ê piⁿ--á, i hō͘ ké ê Adele ui-hia̍p. M̄-koh góa kám-kak siōng tōa ê goân-in sī i put-jím-sim lī-khui Adele. Adele ê pē-bú lóng sí--khì-ah, koh tùi i ū un-chêng tī--leh, i tha̍k i-ha̍k-īⁿ ê ha̍k-hùi to̍h sī Adele chhut--ê. Adele kán-ná piàn 1 ê lâng, i pún-té sī bē-hiáu chú-pn̄g--ê, āu--lâi ūi-tio̍h bán-hôe David ê sim soah chú 1 tōa toh ê chhài; David sī sim-lí i-seng, i khó-lêng ē kám-kak Adele sī phòa-pēⁿ--ā, chhiūⁿ chhut-hiān tē jī ê jîn-keh hit khoán, chiah ē kiông-pek i chia̍h io̍h-á. Put-kò án-ne sī bô-hoat-tō͘ kái-soeh Adele án-chóaⁿ ē chai-iáⁿ, i bô èng-kai chai-iáⁿ ê tāi-chì, mā bô-hoat-tō͘ kái-soeh i hông kàm-sī ê kám-kak. Só͘-pái, i ē kám-kak chin thòng-khó͘, iû-kî Adele ē in-ūi oàn-tò͘ khì siong-hāi--lâng; khòaⁿ Louise ka kóng i tú tio̍h Adele, David sûi kiò i lī Adele khah hn̄g--leh, to̍h chai-iáⁿ Adele chìn-chêng tiāⁿ-tiāⁿ án-ne chò, in khó-lêng mā sī ko͘-put-chiong chiah poaⁿ lâi chia.

Chhui-chiàn chit chhut iáⁿ-chi̍p, nā sī kah-ì khin-sang-á khòaⁿ ê lâng, tòe kio̍k-chêng loeh kiâⁿ, khòaⁿ kio̍k-chêng teh tńg-se̍h, ē hō͘ lí bē-bái ê thé-giàm, khòaⁿ liáu, ē kám-kak: Óa! Kèng-jiân sī án-ne! Nā sī kah-ì chhui-lí sè-chiat ê lâng, mā chiok sek-ha̍p khòaⁿ tē 2 piàn, i ê an-pâi ū-kàu khá-biāu, sè-chiat chin chē. khòaⁿ--kòe koh khòaⁿ, to̍h ē chai-iáⁿ sòaⁿ-soh chin chá to̍h chhut-hiān--ā, ē hoat-hiān, góa leh, goân lâi chit ê só͘-chāi í-keng ū àm-sī--ā! Ah, án-ne kái-soeh mā ē thong neh!

Chhin-chhiūⁿ lêng-hûn ê sek-chúi sī bô-kâng--ê, Adele sī hún-âng-á-sek, Rob sī nâ-sek, Louise sī le̍k-sek.

Kio̍k-chêng teh kiâⁿ ē hoat-hiān, nā ōe-bīn, sī téng-koân hiòng ē-kha--ê, che to̍h sī Rob ê lêng-hûn teh thau khòaⁿ, kàm-sī.

“3 ê lâng beh siú pì-bi̍t, kî-tiong 2 ê to̍h ài sí”, chit chhut hì, kan-na Tâi-oân sī hō-chò án-ne, kî-thaⁿ ê só͘-chāi, lóng sī chiàu Eng-bûn miâ loeh hoan-e̍k. M̄-koh, góa jīn-ûi hoan-e̍k liáu chin hó,** **góa to̍h sī in-ūi hì-chhut ê miâ chiah tiám chhut-lâi khòaⁿ, kiat-kó chin kah-ì. Pún-té siūⁿ kóng chit chhut hì sī teh kóng hun-in, kiat-kó m̄ sī--leh, kóng--ê sī “tham”.

Hō͘-lâng kám-kak siōng khióng-pò͘--ê, sī chit-má khiā tī lí bīn-thâu-chêng ê lâng, kám chin-chiàⁿ sī lí jīn-bat ê hit-ê?

Lí nā ū Rob ê lêng-le̍k, lí ê soán-te̍k sī siáⁿ? Kám ē chò sio-siâng ê tāi-chì?

Kin-á ji̍t hâm Kok-ūi koan-chiòng pêng-iú siāu-kài--ê, m̄ chai ta̍k-ê kám ū chhōe tio̍h bô kāng-khoán ê sè-chiat? A̍h sī tùi chit chhut hì ū bô-kâng ê siūⁿ-hoat? Hoan-gêng lâu ōe kā gún kóng ŏ͘! Lán ē-sái chò-hóe lâi thó-lūn! Kám-siā kok-ūi thiaⁿ-chiòng pêng-iú kin-á-ji̍t ê siu-thiaⁿ, lán āu-hôe chài-hōe ō͘!

--

Hosting provided by SoundOn