原作︱Flora Annie Steel

翻譯︱蔡逸民 BuLuhSuh／柯王炳勳 Bí-leng

講古︱柯王炳勳 Bí-leng

配樂︱陳曉怡 Niau-tāu

人聲編輯︱蔡逸民 BuLuhSuh／柯王炳勳 Bí-leng

字幕︱林于真 A-chin

校對︱蔡逸民 BuLuhSuh

圖︱AI製圖

影片︱陳姿樺 Ko͘-chiáu

訂閱做工á人Youtube頻道：https://www.youtube.com/@chokangalang

完整ê英文／漢羅／POJ對照文稿khǹg ti官方網站：https://cho-kang-a-lang.github.io/

漢羅全文：

Niáu鼠á Thí-thih Kah Niáu鼠á Thá-thih

Niáu鼠á Thí-thih kah Niáu鼠á Thá-thih lóng tòa tī kāng 1間厝內底。

Niáu鼠á Thí-thih去田--ni̍h khioh穗，ah Niáu鼠á Thá-thih mā去田--ni̍h khioh穗。

所pái in 2 ê lóng去田--ni̍h khioh穗。

Niáu鼠á Thí-thih去khioh tio̍h 1穗番麥á，ah Niáu鼠á Thá-thih mā去khioh tio̍h 1穗番麥á。

所pái in 2 ê lóng去khioh tio̍h 1穗番麥á。

Niáu鼠á Thí-thih去做1 ê phú-lìn，ah Niáu鼠á Thá-thih mā去做1 ê phú-lìn。

所pái in 2 ê lóng去做1 ê phú-lìn。

Niáu鼠á Thá-thih kā伊ê phú-lìn hē落去oe-á--ni̍h beh煮ho͘滾。

M̄-koh Niáu鼠á Thí-thih beh kā伊ê phú-lìn hē--lòe ê時，oe-á soah chhia-chhia--倒，kā伊燙燙--死，Niáu鼠á Thá-thih to̍h坐落來哭。

Koh來三脚椅á to̍h問講：「Thá-thih，你是án-chóaⁿ leh哭？」

「Thí-thih死--去-ah，」Thá-thih koh ìn講：「所以我leh哭。」

「Án-ne，」三脚椅á講：「我to̍h beh跳，」三脚椅á chŏaⁿ開始跳。

Koh來tī房間ê角--á有1支掃帚問講：「三脚椅á，你是án-chóaⁿ leh跳？」

「喔！」三脚椅á ìn講：「Thí-thih死--去-ah，Thá-thih leh哭，所以我to̍h開始跳。 」

「Án-ne，」掃帚講：「我to̍h beh掃，」掃帚chŏaⁿ開始掃。

Koh來門to̍h問講：「掃帚，你是án-chóaⁿ leh掃？」

「喔！」掃帚ìn講：「Thí-thih死--去-ah，Thá-thih leh哭，三脚椅á leh跳，所以我to̍h開始掃。 」

「Án-ne，」門講：「我to̍h beh īⁿ-oāiⁿ叫，」門chŏaⁿ開始īⁿ-oāiⁿ叫。

Koh來窗á to̍h問講：「門，你是án-chóaⁿ leh īⁿ-oāiⁿ叫？」

「喔！」門ìn講：「Thí-thih死--去-ah，Thá-thih leh哭，三脚椅á leh跳，掃帚leh掃，所以我to̍h īⁿ-oāiⁿ叫。 」

「Án-ne，」窗á講：「我to̍h beh khi̍h-kho̍k叫，」窗á chŏaⁿ開始khi̍h-kho̍k叫。

Chit-chūn厝外口有1隻舊椅liâu，tī窗á teh khi̍h-kho̍k叫 ê時，椅liâu問講：「窗á，你是án-chóaⁿ leh khi̍h-kho̍k叫？」

「喔！」窗á ìn講：「Thí-thih死--去-ah，Thá-thih leh哭，三脚椅á leh跳，掃帚leh掃，門leh īⁿ-oāiⁿ叫，所以我to̍h khi̍h-kho̍k叫。 」

「Án-ne，」舊椅liâu講：「我to̍h beh se̍h chit間厝kho̍k-kho̍k-chông，」舊椅liâu chŏaⁿ開始se̍h厝kho̍k-kho̍k-chông。

厝邊--á有1叢生tio̍h真將才ê大胡桃樹，胡桃樹對椅liâu講：「椅liâu，你是án-chóaⁿ leh se̍h chit間厝kho̍k-kho̍k-chông？」

「喔！」椅liâu ìn講：「Thí-thih死--去-ah，Thá-thih leh哭，三脚椅á leh跳，掃帚leh掃，門leh īⁿ-oāiⁿ叫，窗á leh khi̍h-kho̍k叫，所以我to̍h se̍h厝kho̍k-kho̍k-chông。 」

「Án-ne，」胡桃樹講：「我to̍h beh lak葉á，」胡桃樹chŏaⁿ開始hō͘伊美麗青leng ê葉á lóng總lak--落-來。

有1隻細隻鳥á hioh tī胡桃樹ê 1枝樹oe頂koân，tī所有ê葉á lóng lak--落-來ê時，伊問講：「胡桃樹，你是án-chóaⁿ beh hō͘你ê葉á lak--落-來？」

「喔！」胡桃樹ìn講：「Thí-thih死--去-ah，Thá-thih leh哭，三脚椅á leh跳，掃帚leh掃，門leh īⁿ-oāiⁿ叫，窗á leh khi̍h-kho̍k叫，舊椅liâu leh se̍h厝間kho̍k-kho̍k-chông，所以我hō͘我ê葉á lak--落-來。 」

「Án-ne，」細隻鳥á講：「我to̍h beh kā我ê毛草thǹg--落-來，」細隻鳥á chŏaⁿ開始kā伊花血ê毛草lóng總thǹg--落-來。

有1 ê細漢chŏ͘-gín-á ùi ē脚行--過，手--ni̍h kōaⁿ 1罐牛奶，是暗頓beh hō͘ in小弟小妹lim--ê，伊去看tio̍h hit隻苦憐ê細隻鳥á kā伊ka-tī ê毛草lóng總thǹg--落-來ê時，伊講：「細隻鳥á，你是án-chóaⁿ beh kā ka-tī ê毛草lóng總thǹg--落-來？」

「喔！」細隻鳥á ìn講：「Thí-thih死--去-ah，Thá-thih leh哭，三脚椅á leh跳，掃帚leh掃，門leh īⁿ-oāiⁿ叫，窗á leh khi̍h-kho̍k叫，舊椅liâu leh se̍h厝間kho̍k-kho̍k-chông，胡桃樹leh lak葉á，所以我kā我ê毛草lóng總thǹg--落-來。 」

「Án-ne，」細漢chŏ͘-gín-á講：「我to̍h beh kā我ê牛奶chhia倒了了，」細漢chŏ͘-gín-á chŏaⁿ kā牛奶罐á tàn--leh，牛奶to̍h chhia--倒-ah。

有1 ê老人to̍h tī附近，khiā tī 1支梯頂koân，伊tng teh kā草pû khàm茅草，tī伊看tio̍h細漢chŏ͘-gín-á chhia倒牛奶ê時，伊講：「細漢chŏ͘-gín-á，你是án-chóaⁿ beh kā牛奶chhia--倒？Án-ne你ê小弟小妹暗頓to̍h無thang食--ah。」

細漢chŏ͘-gín-á ìn講：「Thí-thih死--去-ah，Thá-thih leh哭，三脚椅á leh跳，掃帚leh掃，門leh īⁿ-oāiⁿ叫，窗á leh khi̍h-kho̍k叫，舊椅liâu leh se̍h厝間kho̍k-kho̍k-chông，胡桃樹leh lak葉á，細隻鳥á kā伊ê毛草lóng總thǹg--落-來，所以我to̍h kā牛奶chhia倒了了。 」

「喔，」老人講：「án-ne我to̍h beh對梯頂koân摔--落-來，kā我ê ām-kún-á摔ho͘斷。」

伊chŏaⁿ ùi梯頂koân摔--落-來，ām-kún-á摔斷--去；to̍h tī老人ām-kún-á摔斷--去ê時，大胡桃樹phiáng--1-ē倒--落-來，kā舊椅liâu kah厝間lòng kah總péng--過，厝間倒--落-來ê時，窗á mā ho͘ lòng kah飛--走，窗á koh kā門lòng--倒，門koh去lòng倒掃帚，掃帚koh去lòng倒三脚椅á，ah苦憐ê Niáu鼠á Thá-thih to̍h去hông tâi tī破磚á瓦ē底--ah。

Pe̍h-ōe-jī choân-bûn:

Niáu-chhí-á Thí-thih Kah Niáu-chhí-á Thá-thih

Niáu-chhí-á Thí-thih kah Niáu-chhí-á Thá-thih lóng tòa tī kāng 1 keng chhù lāi-té.

Niáu-chhí-á Thí-thih khì chhân--ni̍h khioh sūi, ah Niáu-chhí-á Thá-thih mā khì chhân--ni̍h khioh sūi.

Só͘-pái in 2 ê lóng khì chhân--ni̍h khioh sūi.

Niáu-chhí-á Thí-thih khì khioh tio̍h 1 sūi hoan-be̍h-á, ah Niáu-chhí-á Thá-thih mā khì khioh tio̍h 1 sūi hoan-be̍h-á.

Só͘-pái in 2 ê lóng khì khioh tio̍h 1 sūi hoan-be̍h-á.

Niáu-chhí-á Thí-thih khì chò 1 ê phú-lìn, ah Niáu-chhí-á Thá-thih mā khì chò 1 ê phú-lìn.

Só͘-pái in 2 ê lóng khì chò 1 ê phú-lìn.

Niáu-chhí-á Thá-thih kā i ê phú-lìn hē lo̍h-khì oe-á--ni̍h beh chú ho͘ kún.

M̄-koh Niáu-chhí-á Thí-thih beh kā i ê phú-lìn hē--lòe ê sî, oe-á soah chhia-chhia--tó, kā i thǹg-thǹg--sí, Niáu-chhí-á Thá-thih to̍h chē lo̍h-lâi khàu.

Koh lâi saⁿ-kha-í-á to̍h mn̄g kóng: “Thá-thih, lí sī án-chóaⁿ leh khàu?”

“Thí-thih sí--khì-ah,” Thá-thih koh ìn kóng: “Só͘-í góa leh khàu.”

“Án-ne,” saⁿ-kha-í-á kóng: “góa to̍h beh thiàu,” saⁿ-kha-í-á chŏaⁿ khai-sí thiàu.

Koh lâi tī pâng-keng ê kak--á ū 1 ki sàu-chhiú mn̄g kóng: “Saⁿ-kha-í-á, lí sī án-chóaⁿ leh thiàu?”

“O͘h!” Saⁿ-kha-í-á ìn kóng: “Thí-thih sí--khì-ah, Thá-thih leh khàu, só͘-í góa to̍h khai-sí thiàu.”

“Án-ne,” sàu-chhiú kóng: “Góa to̍h beh sàu,” sàu-chhiú chŏaⁿ khai-sí sàu.

Koh lâi mn̂g to̍h mn̄g kóng: “Sàu-chhiú, lí sī án-chóaⁿ leh sàu?”

“O͘h!” Sàu-chhiú ìn kóng: “Thí-thih sí-khì--ah, Thá-thih leh khàu, saⁿ-kha-í-á leh thiàu, só͘-í góa to̍h khai-sí sàu.”

“Án-ne,” mn̂g kóng: “Góa to̍h beh īⁿ-oāiⁿ-kiò,” mn̂g chŏaⁿ khai-sí īⁿ-oāiⁿ-kiò.

Koh lâi thang-á to̍h mn̄g kóng: “Mn̂g, lí sī án-chóaⁿ leh īⁿ-oāiⁿ-kiò?”

“O͘h!” Mn̂g ìn kóng: “Thí-thih sí--khì-ah, Thá-thih leh khàu, saⁿ-kha-í-á leh thiàu, sàu-chhiú leh sàu, só͘-í góa to̍h īⁿ-oāiⁿ-kiò.”

“Án-ne,” thang-á kóng: “Góa to̍h beh khi̍h-kho̍k-kiò,” thang-á chŏaⁿ khai-sí khi̍h-kho̍k-kiò.

Chit-chūn chhù gōa-kháu ū 1 chiah kū í-liâu, tī thang-á teh khi̍h-kho̍k-kiò ê sî, í-liâu mn̄g kóng: “Thang-á, lí sī án-chóaⁿ leh khi̍h-kho̍k-kiò?”

“O͘h!” Thang-á ìn kóng: “Thí-thih sí-khì--ah, Thá-thih leh khàu, saⁿ-kha-í-á leh thiàu, sàu-chhiú leh sàu, mn̂g leh īⁿ-oāiⁿ-kiò, só͘-í góa to̍h khi̍h-kho̍k-kiò.”

“Án-ne,” kū í-liâu kóng: “góa to̍h beh se̍h chit keng chhù kho̍k-kho̍k-chông,” kū í-liâu chŏaⁿ khai-sí se̍h chhù kho̍k-kho̍k-chông.

Chhù piⁿ--á ū 1 châng seⁿ tio̍h chin chiòng-châi ê tōa ô͘-thô-chhiū, ô͘-thô-chhiū tùi í-liâu kóng: “Í-liâu, lí sī án-chóaⁿ leh se̍h chit keng chhù kho̍k-kho̍k-chông?”

“O͘h!” Í-liâu ìn kóng: “Thí-thih sí--khì-ah, Thá-thih leh khàu, saⁿ-kha-í-á leh thiàu, sàu-chhiú leh sàu, mn̂g leh īⁿ-oāiⁿ-kiò, thang-á leh khi̍h-kho̍k-kiò, só͘-í góa to̍h se̍h chhù kho̍k-kho̍k-chông.”

“Án-ne,” ô͘-thô-chhiū kóng: “góa to̍h beh lak hio̍h-á,” ô͘-thô-chhiū chŏaⁿ khai-sí hō͘ i bí-lē chheⁿ-leng ê hio̍h-á lóng-chóng lak--lo̍h-lâi.

Ū 1 chiah sè-chiah chiáu-á hioh tī ô͘-thô-chhiū ê 1 ki chhiū-oe téng-koân, tī só͘-ū ê hio̍h-á lóng lak--lo̍h-lâi ê sî, i mn̄g kóng: “Ô͘-thô-chhiū, lí sī án-chóaⁿ beh hō͘ lí ê hio̍h-á lak--lo̍h-lâi?”

“O͘h!” Ô͘-thô-chhiū ìn kóng: “Thí-thih sí--khì-ah, Thá-thih leh khàu, saⁿ-kha-í-á leh thiàu, sàu-chhiú leh sàu, mn̂g leh īⁿ-oāiⁿ-kiò, thang-á leh khi̍h-kho̍k-kiò, kū í-liâu leh se̍h chhù-keng kho̍k-kho̍k-chông, só͘-í góa hō͘ góa ê hio̍h-á lak--lo̍h-lâi.”

“Án-ne,” sè-chiah chiáu-á kóng: “góa to̍h beh kā góa ê mn̂g-chháu thǹg--lo̍h-lâi,” sè-chiah chiáu-á chŏaⁿ khai-sí kā i hoe-hiat ê mn̂g-chháu lóng-chóng thǹg--lo̍h-lâi.

Ū 1 ê sè-hàn chŏ͘-gín-á ùi ē-kha kiâⁿ--kòe, chhiú--ni̍h kōaⁿ 1 koàn gû-leng, sī àm-tǹg beh hō͘ in sió-tī sió-mōe lim--ê, i khì khòaⁿ tio̍h hit chiah khó͘-liân ê sè-chiah chiáu-á kā i ka-tī ê mn̂g-chháu lóng-chóng thǹg--lo̍h-lâi ê sî, i kóng: “Sè-chiah chiáu-á, lí sī án-chóaⁿ beh kā ka-tī ê mn̂g-chháu lóng-chóng thǹg--lo̍h-lâi?”

“O͘h!” Sè-chiah chiáu-á ìn kóng: “Thí-thih sí--khì-ah, Thá-thih leh khàu, saⁿ-kha-í-á leh thiàu, sàu-chhiú leh sàu, mn̂g leh īⁿ-oāiⁿ-kiò, thang-á leh khi̍h-kho̍k-kiò, kū í-liâu leh se̍h chhù-keng kho̍k-kho̍k-chông, ô͘-thô-chhiū leh lak hio̍h-á, só͘-í góa kā góa ê mn̂g-chháu lóng-chóng thǹg--lo̍h-lâi.”

“Án-ne,” sè-hàn chŏ͘-gín-á kóng: “góa to̍h beh kā góa ê gû-leng chhia-tó liáu-liáu,” sè-hàn chŏ͘-gín-á chŏaⁿ kā gû-leng koàn-á tàn--leh, gû-leng to̍h chhia--tó-ah.

Ū 1 ê lāu-lâng to̍h tī hū-kīn, khiā tī 1 ki thui téng-koân, i tng teh kā chháu-pû khàm hm̂-chháu, tī i khòaⁿ tio̍h sè-hàn chŏ͘-gín-á chhia-tó gû-leng ê sî, i kóng: “Sè-hàn chŏ͘-gín-á, lí sī án-chóaⁿ beh kā gû-leng chhia--tó? Án-ne lí ê sió-tī sió-mōe àm-tǹg to̍h bô-thang chia̍h--ah.”

Sè-hàn chŏ͘-gín-á ìn kóng: “Thí-thih sí--khì-ah, Thá-thih leh khàu, saⁿ-kha-í-á leh thiàu, sàu-chhiú leh sàu, mn̂g leh īⁿ-oāiⁿ-kiò, thang-á leh khi̍h-kho̍k-kiò, kū í-liâu leh se̍h chhù-keng kho̍k-kho̍k-chông, ô͘-thô-chhiū leh lak hio̍h-á, sè-chiah chiáu-á kā i ê mn̂g-chháu lóng-chóng thǹg--lo̍h-lâi, só͘-í góa to̍h kā gû-leng chhia-tó liáu-liáu.”

“O͘h,” lāu-lâng kóng: “án-ne góa to̍h beh ùi thui téng-koân siak--lo̍h-lâi, kā góa ê ām-kún-á siak ho͘ tn̄g.”

I chŏaⁿ ùi thui téng-koân siak--lo̍h-lâi, ām-kún-á siak-tn̄g--khì; to̍h tī lāu-lâng ām-kún-á siak-tn̄g--khì ê sî, tōa ô͘-thô-chhiū phiáng--1-ē tó--lo̍h-lâi, kā kū í-liâu kah chhù-keng lòng kah chóng péng--kòe, chhù-keng tó--lo̍h-lâi ê sî, thang-á mā ho͘ lòng kah poe--cháu, thang-á koh kā mn̂g lòng--tó, mn̂g koh khì lòng tó sàu-chhiú, sàu-chhiú koh khì lòng tó saⁿ-kha-í-á, ah khó͘-liân ê Niáu-chhí-á Thá-thih to̍h khì hông tâi tī phòa-chng-á-hiā ē-té--ah.

--

Hosting provided by SoundOn