Nuacht Mhall. Príomhscéalta na seachtaine, léite go mall.

*

Inniu an naoú lá déag de mhí Eanáir. Is mise Niall Ó Siadhail.

Tá géarchéim an chorónvíris dulta in olcas arís in Éirinn agus sa Bhreatain agus na huimhreacha is airde feicthe ó bhí tús na paindéime ann, in ainneoin srianta nua curtha i bhfeidhm sa dá thír. Tá eagla ar na húdaráis nach mbeidh leapacha ospidéil ar fáil roimh i bhfad, agus d’fhógair Méara Londan, Sadiq Khan, go bhfuil príomhchathair na Ríochta Aontaithe i staid éigeandála. Iarrtar ar dhaoine sa dá thír fanacht sa bhaile, agus beidh scolaíocht bhaile ar siúl ar feadh míosa.

Dé Céadaoin, rinne drong de lucht tacaíochta Donald Trump ruathar ar an Chaipeatól in Washington DC, le linn do Chomhdháil na Stát Aontaithe bheith bailithe chun bua Joe Biden sa toghchán uachtaránachta a dheimhniú. Fuair cúigear bás sa chíréib agus cáineadh Trump as an chorraíl a chothú. Cuireadh cosc ar a chuntais Facebook agus Twitter agus phléigh Daonlathaithe mór le rá féidearthacht Trump a tháinseamh roimh oirniú Joe Biden ar 20ú Eanáir. Roghnaigh Biden fear de bhunús Éireannach, Méara Bhostúin Marty Walsh, mar Rúnaí Oibre ina chomh-aireacht. As Conamara do thuismitheoirí Walsh agus deirtear go bhfuil Gaeilge aige.

Dea-scéala eile don Ghaeilge an tseachtain seo, nuair a ghlac Comhairle Cathrach Bhéal Feirste le polasaí nua chun comharthaíocht sráide dhátheangach a chur ar fáil sa chathair. Amach ó seo, má ghlacann 15% de na toghthóirí a chónaíonn ar an tsráid leis, beidh cead comharthaí dátheangacha a chur suas. Is mór an bua é do Ghaeilgeoirí Bhéal Feirste, atá ag obair go dian ar phobal na Gaeilge a spreagadh agus a leathnú ó cuireadh tús le Pobal Bhóthar Seoighe in 1969.

*

Léirithe ag Conradh na Gaeilge i Londain. Tá script ar fáil i d'aip phodchraolta.

*

GLUAIS

in ainneoin - despite

staid éigeandála - state of emergency

scolaíocht bhaile - home schooling

ruathar - attack

círéib - riot

táinseamh - impeach

Rúnaí Oibre - Secretary of Labour

comh-aireacht - cabinet (politics)

toghthóirí - electors